গুৱাহাটীৰ সমীপৰ সোণাপুৰৰ টেপেচিয়া (Sonapur’s Tapecia)ত নিৰ্মাণ কৰা উত্তৰ-পূব ভাৰতৰ সৰ্ববৃহৎ আৰু দেশৰ চতুৰ্থখন ‘বিজ্ঞান নগৰী’ (science city) মঙলবাৰে আনুষ্ঠানিকভাৱে মুকলি (Formally open) কৰে মুখ্যমন্ত্ৰী ডঃ হিমন্ত বিশ্ব শৰ্মা (Himanta Biswa Sarma)ই। উদ্বোধনী অনুষ্ঠানত উপস্থিত থাকে অসম চৰকাৰৰ বিজ্ঞান আৰু প্ৰযুক্তি বিভাগৰ মন্ত্ৰী কেশৱ মহন্ত।
প্ৰায় আঢ়ৈশ বিঘা মাটিকালি সামৰি নিৰ্মাণ কৰা অভিলাষী প্ৰকল্পটোৰ নিৰ্মাণ ব্যয় হৈছে ২৮৮ কোটিৰো অধিক। উল্লেখযোগ্য যে এই প্ৰকল্পটোৰ আধাৰশিলা স্থাপন হৈছিল ২০২১ চনত। এই প্ৰকল্পটো অসম চৰকাৰৰ ‘বিজ্ঞান নগৰী গুৱাহাটী চ’ছাইটি’ আৰু কেন্দ্ৰীয় চৰকাৰৰ বিজ্ঞান সংগ্ৰহালয় ৰাষ্ট্ৰীয় পৰিষদৰ যুটীয়া উদ্যোগত নিৰ্মাণ কৰা হৈছে। এই প্ৰকল্পটোৰ বিষয়বস্তু হৈছে ‘বিজ্ঞানৰ সৈতে খেলা’ অৰ্থাৎ Play with Science। ইয়াত ছাত্ৰ-ছাত্ৰী তথা বিজ্ঞান মনস্ক লোকৰ বাবে থকা মুখ্য আকৰ্ষণসমূহ হৈছে স্পেচ অডিচি, মহাকাশ গৱেষণা আৰু বিশ্বব্ৰহ্মাণ্ডৰ ৰহস্য বুজাৰ বাবে আধুনিক সঁজুলি, ইউৰেকা, বিজ্ঞানৰ মৌলিক নীতিসমূহৰ ব্যৱহাৰিক শিকনৰ বাবে বিশেষ স্থান, ডিজিটেল গেলেৰী, উন্নতমানৰ ডিজিটেল প্ৰজেকচনৰ জৰিয়তে লাচিত বৰফুকনৰ বীৰত্বৰ কাহিনী প্ৰদৰ্শনৰ ব্যৱস্থা, এম্পি থিয়েটাৰ, মহাকাশ আৰু বিজ্ঞানৰ জটিল বিষয়বোৰ সহজতে বুজিব পৰাৰ সুবিধা।
আনহাতে, ইয়াত আছে ভার্চুৱেল ৰিয়েলিটি, ডিজিটেল এডভেন্সাৰ, জ্যোতিৰ্বিজ্ঞানৰ দৰে আধুনিক প্ৰযুক্তিৰ ব্যৱস্থা। এই প্ৰকল্পটো মুকলি কৰি মুখ্যমন্ত্ৰীয়ে কয়, “কলকাতাৰ ছায়েন্স চিটীতকৈ বৃহৎ বিজ্ঞান নগৰী এতিয়া অসমে লাভ কৰিছে। ২৫০+ বিঘা ভূমিত গুৱাহাটীৰ নিচেই ওচৰতে সোণাপুৰত এই প্ৰকল্পটি প্ৰায় ৩০০ কোটি টকা ব্যয়েৰে নিৰ্মাণ কৰা হৈছে। ইউৰেকা আৰু স্পেচ অডিচি শীৰ্ষক দুটা আকর্ষণীয় শাখা আছে, য’ত বিভিন্ন বয়সৰ লোককে আকৰ্ষিত কৰিব পৰাকৈ সুবিধা উপলব্ধ।”
তেওঁ লগতে কয়, “আপোনালোকে জানি ভাল পাব যে শীঘ্ৰেই এই পৰিসৰত ‘ছায়েন্স ইন’ভেচন’ আৰু ‘ছায়েন্স পাৰ্ক’ নামৰ আন দুটা শাখা সন্নিৱিষ্ট কৰা হ’ব। অকল এয়াই নহয়, লাচিত বৰফুকনে কিদৰে মোগলৰ সৈতে যুদ্ধ কৰি পৰাজিত কৰিছিল তাৰো এটি ভাৰ্চুৱেল ৰিয়েলিটী প্ৰদৰ্শনী প্ৰস্তুত কৰা হৈছে।”
কিন্তু এই ব্যৱস্থা কিয় কৰা হৈছে? এই সন্দৰ্ভত মুখ্যমন্ত্ৰীয়ে কয়, “বিগত কেইবছৰত বিজ্ঞান শিক্ষাৰ বাবে আমি কেইবাখনো শিক্ষা প্ৰতিষ্ঠান নিৰ্মাণ কৰিছোঁ। কিন্তু বিজ্ঞানৰ প্ৰতি ছাত্ৰ-ছাত্ৰীসকলৰ আগ্ৰহ বা অংশগ্ৰহণ আশানুৰূপ নহয়। গতিকে আমি এনেধৰণৰ উন্নত ব্যৱস্থাৰে বিজ্ঞান শিক্ষাক ছাত্ৰ-ছাত্ৰীসকলৰ বাবে অধিক মনোগ্ৰাহী কৰাৰ পদক্ষেপ হাতত লৈছোঁ। মই মৰমৰ ভাগিন-ভাগিনীসকলক বিজ্ঞান নগৰীলৈ আহি ইয়াৰ অনন্য অভিজ্ঞতা বুটলিবলৈ আহ্বান জনাইছোঁ।”
