অন্ধ্ৰপ্ৰদেশৰ কুৰ্ণুলত (Kurnool of Andhra Pradesh) টেংকাৰ আৰু তীৰ্থযাত্ৰী (Pilgrim) কঢ়িয়াই অনা এখন বাহনৰ মাজত মুখামুখি সংঘৰ্ষত ৮ জন লোকৰ মৃত্যু (8 people died) হয়। আনহাতে, ১২ জনমান লোক আঘাতপ্ৰাপ্ত হয়। ইয়াৰে একাংশৰ অৱস্থা সংকটজনক বুলি আৰক্ষীৰ সূত্ৰই প্ৰকাশ কৰিছে। বৃহস্পতিবাৰে পুৱা ১৬৭ নং ৰাষ্ট্ৰীয় ঘাইপথত সংঘটিত হয় এই ঘটনা। আৰক্ষীয়ে জনোৱা মতে, কৰ্ণাটক-অন্ধ্ৰ সীমান্তৰ সমীপৰ ধৰ্মপুৰ টোল প্লাজাৰ পৰা ৮-৯ কিলোমিটাৰ দূৰত্বত সংঘটিত হয় এই দুৰ্ঘটনা।
জানিব পৰা মতে, কেইজনমান তীৰ্থযাত্ৰীক লৈ এখন পিকআপ ভেন মন্ত্ৰলয়ম গাঁৱৰ শ্ৰী ৰাঘবেন্দ্ৰ স্বামী মঠলৈ গৈ আছিল। পিকআপ ভেনখনত ২১ জন তীৰ্থযাত্ৰী আছিল। বৃহস্পতিবাৰে পুৱা ১৬৭ নং ৰাষ্ট্ৰীয় ঘাইপথত এই দুৰ্ঘটনাটো সংঘটিত হয়। বিপৰীত দিশৰ পৰা অহা টেংকাৰৰ সৈতে মুখামুখি সংঘৰ্ষত দুয়োখন বাহন বাগৰি পৰে। যিহেতু সময় পুৱা আছিল, সেয়ে আশে-পাশে কোনো লোক নাছিল।
অৱশ্যে আন চালকে আৰক্ষীক খবৰ দিয়ে। তথ্য লাভ কৰাৰ লগে লগে আৰক্ষীয়ে উক্ত স্থানত উপস্থিত হৈ আহতসকলক উদ্ধাৰ কৰি চিকিৎসালয়লৈ প্ৰেৰণ কৰে। কিন্তু এই সংঘৰ্ষৰ প্ৰভাৱ ইমানেই বেছি আছিল যে থিতাতে ৮ জন লোকৰ মৃত্যু হয়। নিহতসকলৰ ভিতৰত পাঁচগৰাকী মহিলা, এটি শিশু আৰু দুজন পুৰুষ। আটাইকেইজনেই কৰ্ণাটকৰ বাসিন্দা।
য়েম্মিগানুৰ মহকুমা আৰক্ষী বিষয়া ভাৰ্গৱীয়ে জনোৱা মতে, আহতসকলক কুৰ্ণুলৰ এখন চিকিৎসালয়ত ভৰ্তি কৰা হৈছে। ইয়াৰে কিছুমানৰ অৱস্থা সংকটজনক। প্ৰথম অৱস্থাত নিয়ন্ত্ৰণ হেৰুওৱাৰ বাবেই এই দুৰ্ঘটনা সংঘটিত হোৱা বুলি ধাৰণা কৰা হৈছে। অৱশ্যে দুৰ্ঘটনাৰ প্ৰকৃত কাৰণ জানিবলৈ চেষ্টা অব্যাহত আছে বুলি আৰক্ষীয়ে জানিবলৈ দিয়ে। মৃত লোক আৰু আহতসকলৰ পৰিয়ালৰ সৈতে যোগাযোগ কৰা হৈছে।
