গুজৰাটত (Fraud Doctors arrested) এইবাৰ ‘মুন্নাভাই এমবিবিএছ’। ১৫ দিনীয়া অভিযানত ৰাজ্যখনৰ পৰা ৩৮ জন ভুৱা চিকিৎসক চিনাক্ত কৰা হৈছে। ইয়াৰ ভিতৰত আৰক্ষীয়ে ৩৫ জনৰ বিৰুদ্ধে গোচৰ ৰুজু কৰিছে। এই অভিযানৰ মূল লক্ষ্য আছিল মেডিকেল ডিগ্ৰী বা শৈক্ষিক অৰ্হতা অবিহনে চিকিৎসা বিজ্ঞানৰ চৰ্চা কৰাসকলক কৰায়ত্ত কৰা। সৰ্বাধিক ভুৱা চিকিৎসকৰ পৰিসংখ্যা ৰাজকোটৰ পৰা উদ্ধাৰ। ৰাজকোটৰ পৰা ১৭ জনক গ্ৰেপ্তাৰ কৰা হয়। ইয়াৰ উপৰি চুৰাটৰ পৰা ৯ জন, গীৰ সোমনাথৰ পৰা ৩ জন আৰু সুৰেন্দ্ৰনগৰৰ পৰা ২ জন লোকক গ্ৰেপ্তাৰ কৰা হৈছে। আন ৭ খন জিলাৰ পৰা এজনকৈ ভুৱা চিকিৎসক গ্ৰেপ্তাৰ কৰা হৈছে।
তালাচী অভিযানত স্থানীয় আৰক্ষী, অপৰাধ দমন শাখা, বিশেষ অভিযান গোট (এছঅ’জি) আৰু স্বাস্থ্য বিভাগৰ বিষয়াসকলে প্ৰমাণৰ সৈতে সহায় কৰিছিল। এই অভিযান সন্দৰ্ভত ৰাজ্যৰ স্বাস্থ্যমন্ত্ৰী প্ৰফুল্ল পানশ্বেৰিয়াই কয়, “স্বাস্থ্য বিভাগৰ নেতৃত্বত ২৯৮টা দল গঠন কৰা হৈছিল। ১৫ দিন ধৰি প্ৰতিখন জিলাতে পুংখানুপুংখ তালাচী চলাই ৩৮ জন ভুৱা চিকিৎসকক গ্ৰেপ্তাৰ কৰে। ইয়াৰে ৩৫ জনৰ বিৰুদ্ধে গোচৰ ৰুজু কৰা হৈছে।” স্বাস্থ্য বিভাগৰ তথ্য অনুসৰি, ভুৱা চিকিৎসকৰ দপদপনি বন্ধ কৰিবলৈ ৰাজ্য চৰকাৰে বিভিন্ন বিভাগৰ পৰামৰ্শমতে প্ৰতিখন জিলাতে দল গঠন কৰিছিল।
এই দলসমূহৰ ভিতৰত আছিল বিভিন্ন তালুকৰ স্বাস্থ্য বিষয়া, স্থানীয় আৰক্ষী, স্বাস্থ্য পৰিদৰ্শক আৰু গ্ৰাম্য পৰ্যায়ৰ দায়িত্বপ্ৰাপ্ত বিষয়াসকল। তেওঁলোকৰ কাম আছিল ভুৱা ডিগ্ৰী থকা বা ডিগ্ৰী নথকা মেডিকেল প্ৰেকটিছ কৰা মানুহক চিনাক্ত কৰি তেওঁলোকৰ ওপৰত চকু ৰখা। কিন্তু অভিযানৰ সময়ত এই তথ্য লাভ কৰি ইতিমধ্যে কেইবাজনো অভিযুক্তই ক্লিনিক বন্ধ কৰি পলায়ন কৰা বুলি জানিব পৰা গৈছে। আৰক্ষী আৰু স্বাস্থ্য বিভাগে তেওঁলোকক বিচাৰি উলিয়াই গ্ৰেপ্তাৰ কৰাৰ প্ৰক্ৰিয়া আৰম্ভ কৰিছে।
‘উৎসৱৰ বতৰ’ শেষ হোৱাৰ পাছত এই অভিযান অধিক জোৰদাৰভাৱে চলোৱা হ’ব বুলি স্বাস্থ্যমন্ত্ৰীগৰাকীয়ে জানিবলৈ দিয়ে। তেওঁ দাবী কৰে যে ৰাজ্যৰ সকলো ভুৱা চিকিৎসকক ভুল চিকিৎসা প্ৰদান কৰি ‘নাগৰিকৰ স্বাস্থ্য আৰু জীৱন বিপন্ন’ কৰাৰ আগতেই ধৰা পেলাব। সেই অনুসৰি স্বাস্থ্য বিভাগে স্থানীয় বাসিন্দা, স্বেচ্ছাসেৱী সংগঠন আৰু সাধাৰণ ৰাইজক কোনো ভুৱা চিকিৎসকৰ খবৰ পালে প্ৰাথমিক স্বাস্থ্য কেন্দ্ৰ (পিএইচচি) বা স্থানীয় আৰক্ষী থানাত খবৰ দিবলৈ অনুৰোধ জনাইছে।
