সোমবাৰে বিয়লি নিৰ্বাচনৰ ফলাফল মোটামুটি স্পষ্ট হৈ পৰাৰ পিছতে মানুহৰ মাজত কৌতুহলৰ সৃষ্টি হয় যে মমতা বেনাৰ্জীয়ে (Mamta Banerjee) কেতিয়া পদত্যাগ (Resignation) কৰিব। কাৰণ সেইটোৱেই প্ৰথা। মমতাৰ পূর্বে গাদী হেৰুওৱা মুখ্যমন্ত্রীসকলেও একেই কাম কৰিছে৷ দৰাচলতে সোমবাৰে নিশা মমতাই যেতিয়া সাখাৱট স্মৃতিসৌধৰ পৰা ওলাই যায় তেতিয়া বহুতে ভাবিছিল যে তেওঁ লোকভৱনলৈ গৈ পদত্যাগ-পত্ৰ ৰাজ্যপালৰ ওচৰত দাখিল কৰিব। কিন্তু মমতাৰ কনভয় কালিঘাটৰ ঘৰলৈ যোৱাৰ পথত ৰাওনা হয়। কৌতুহল তেতিয়াও আছিল। কিন্তু মঙলবাৰে দুপৰীয়া মমতাই পোনপটীয়াকৈ ঘোষণা কৰে যে তেওঁ পদত্যাগ নকৰে (Does not resign)। কাৰণ তেওঁ পৰাস্ত যোৱা নাই। গতিকে লোকভৱনলৈ যোৱাৰ কোনো প্ৰশ্নই নাই। মমতাই কয়, “মই কিয় পদত্যাগ কৰিম? আমি পৰাজিত হোৱা নাই। ভোটবোৰ জোৰকৈ চুৰি হৈছে। পদত্যাগৰ প্ৰশ্নটো ক’ৰ পৰা আহিছে?”
কিন্তু মমতাই আনুষ্ঠানিকভাৱে পদত্যাগ নকৰিলে কি হ’ব? সংবিধানৰ নিয়মে কি কয়?
এনে পৰিস্থিতিৰ বিষয়ে সংবিধানত বিশেষভাৱে কোনো কথা উল্লেখ কৰা হোৱা নাই। কাৰণ নিৰ্বাচনত পৰাস্ত হোৱাৰ পিছতো মুখ্যমন্ত্ৰীয়ে ৰাজ্যপালৰ ওচৰত পদত্যাগ নকৰা পৰিস্থিতিৰ সৃষ্টি হ’ব বুলি কোনেও ভবা নাছিল। অৱশ্যে সাংবিধানিক বিশেষজ্ঞসকলে কেইবাটাও ধাৰণা লৈ কথা পাতিছে। যিটো আগতে কোনোবা ৰাজ্যত ঘটিছে। কিন্তু বিদায়ী মুখ্যমন্ত্রীয়ে নির্বাচনত পৰাস্ত হোৱাৰ পাছতো পদত্যাগ নকৰাৰ কোনো নজিৰ দেশত নাই৷ ফলত মমতাই যদি অৱশেষত পদত্যাগ নকৰে তেন্তে ভাৰতৰ সংসদীয় গণতন্ত্ৰৰ ইতিহাসত এক নতুন নজিৰৰ সৃষ্টি হ’ব।
অহা ৭ মে’ বৃহস্পতিবাৰে পশ্চিমবংগ বিধানসভাৰ কাৰ্যকাল সমাপ্ত হ’ব। তেওঁ পদত্যাগ নকৰিলে সেইদিনালৈকে মমতা আনুষ্ঠানিকভাৱে ৰাজ্যখনৰ মুখ্যমন্ত্ৰী হৈ থাকিব। কিন্তু ৭ তাৰিখৰ পিছত আৰু তেওঁৰ হাতত মুখ্যমন্ত্ৰীৰ পদ নাথাকিব। পদত্যাগ নকৰিলেও তেওঁৰ নামৰ আগত সংযোজন হ’ব প্ৰাক্তন মুখ্যমন্ত্ৰী। বিদায়ী মুখ্যমন্ত্ৰীয়ে নিৰ্বাচনত পৰাস্ত হৈ ৰাজ্যপালক সাক্ষাৎ কৰি পদত্যাগ কৰাটো কোনো ‘নিয়ম’ নহয়। সাধাৰণতে এইটো এটা প্ৰথা, পৰম্পৰা বা সাংবিধানিক শিষ্টাচাৰ। উদাহৰণস্বৰূপে, ১৫ বছৰ আগতে ২০১১ চনৰ ১৩ মে’ত দুপৰীয়া প্ৰায় ১ বজাত নিৰ্বাচনৰ ফলাফল স্পষ্ট হোৱাৰ পিছত তদানীন্তন মুখ্যমন্ত্ৰী বুদ্ধদেৱ ভট্টাচাৰ্যই ৰাজভৱনলৈ গৈ তদানীন্তন ৰাজ্যপাল গোপালকৃষ্ণ গান্ধীক সাক্ষাৎ কৰি পদত্যাগ পত্ৰ দাখিল কৰিছিল। কেৱল সেয়াই নহয়, ৰাজভৱনত চৰকাৰী গাড়ীখন এৰি আলিমুদ্দিন ষ্ট্ৰীটৰ দলৰ কার্যালয়লৈও দলৰ গাড়ীত উঠি গৈছিল৷
নতুন চৰকাৰ গঠন কৰিব বিজেপিয়ে। কিন্তু মঙলবাৰে বিয়লিলৈকে চৰকাৰে কেতিয়া শপত গ্ৰহণ কৰিব সেই কথা আনুষ্ঠানিকভাৱে ঘোষণা কৰা নাই। অৱশ্যে সোমবাৰে প্ৰধানমন্ত্ৰী নৰেন্দ্ৰ মোদীৰ ভাষণৰ পৰা এটা ইংগিত পোৱা গৈছিল যে ৰবীন্দ্ৰ জয়ন্তী অৰ্থাৎ ৯ তাৰিখ শনিবাৰে বিজেপিয়ে শপত গ্ৰহণ কৰিব পাৰে। ৰাজ্যিক বিজেপিতো বিভিন্ন সূত্ৰৰ পৰাও একেধৰণৰ ইংগিত পোৱা গৈছে।
