পশ্চিমবংগকে ধৰি দুখন ৰাজ্য আৰু এখন কেন্দ্ৰীয়শাসিত অঞ্চলৰ বিধানসভা নিৰ্বাচনত বিজেপিৰ ঐতিহাসিক বিজয়ৰ বাবে প্ৰধানমন্ত্ৰী নৰেন্দ্ৰ মোদীক অভিনন্দন জনাই আমেৰিকাৰ ৰাষ্ট্ৰপতি ড’নাল্ড ট্ৰাম্পে (Donald Trump)। মঙলবাৰে হোৱাইট হাউছৰ মুখপাত্ৰ কুশ দেশায়ে এই কথা সংবাদ সংস্থা পিটিআইক জনায়।
দেশায়ে ট্ৰাম্পৰ অভিনন্দন নিশ্চিত কৰি কয়, “ৰাষ্ট্ৰপতি ট্ৰাম্পে প্ৰধানমন্ত্ৰী মোদীক শেহতীয়া, ঐতিহাসিক আৰু নিৰ্ণায়ক এই নিৰ্বাচনী জয়ৰ বাবে অভিনন্দন জনাইছে।” দেশায়ে পিটিআইকো কয়, “মাত্ৰ যোৱা মাহত তেওঁলোকৰ ফোন কলত ৰাষ্ট্ৰপতি ট্ৰাম্পে প্ৰধানমন্ত্ৰী মোদীৰ প্ৰতি সন্মান প্ৰকাশ কৰিছিল আৰু কৈছিল, ‘ভাৰতে তেওঁক নেতা হিচাপে পোৱাটো ভাগ্যৰ কথা।’”
উল্লেখ্য যে সোমবাৰে পশ্চিমবংগৰ বিধানসভা নিৰ্বাচনত প্ৰথমবাৰৰ বাবে বিজেপিয়ে দুই তৃতীয়াংশতকৈ অধিক আসন দখল কৰি ক্ষমতা দখল কৰিবলৈ সাজু হৈছে। গেৰুৱা শিবিৰে অন্ত পোলায় মুখ্যমন্ত্ৰী মমতা বেনাৰ্জীৰ ১৫ বছৰীয়া শাসন।
আনহাতে, বিজেপিয়ে অসমতো একেৰাহে তৃতীয়বাৰৰ বাবে জয়লাভ কৰিছে। ইয়াৰ উপৰি মিত্ৰদল এন আৰ কংগ্ৰেছৰ ‘জুনিয়ৰ পাৰ্টনাৰ’ হিচাপে কেন্দ্ৰীয়শাসিত অঞ্চল পুডুচেৰীতো দ্বিতীয়বাৰৰ বাবে ক্ষমতা দখল কৰিছে।
