উত্তৰ প্ৰদেশৰ (Uttar Pradesh) হৰদয় জিলাত ধৰ্ষণৰ অভিযুক্তক (Rape accused) গুলীয়াই হত্যা কৰে আৰক্ষীয়ে (Police shoot and kill)। আৰক্ষীয়ে দাবী কৰিছে যে অভিযুক্তই বাইকেৰে পলায়ন কৰিছিল। তেওঁক আত্মসমৰ্পণ কৰিবলৈ কোৱা হৈছিল। কিন্তু বাইক পেলাই পলাবলৈ চেষ্টা কৰে। অভিযুক্ত যুৱকজনে আৰক্ষীক লক্ষ্য কৰি গুলীচালনা কৰাৰো অভিযোগ। আৰক্ষীয়েও প্ৰত্যুত্তৰত গুলীচালনা কৰাত এটা গুলীয়ে অভিযুক্তৰ বুকু ভেদি যায়। ফলত তেওঁৰ থিতাতে মৃত্যু হয়।
আৰক্ষীয়ে জনোৱা মতে, অভিযুক্তক বিচাৰি উলিয়ালে ৫০ হাজাৰ টকাৰ পুৰস্কাৰ ঘোষণা কৰা হৈছিল। বুধবাৰে পুৱা আৰক্ষীয়ে হৰদয়ৰ পৰা ৫০ কিলোমিটাৰ নিলগৰ বাবাটামৌ অঞ্চলত অভিযুক্তই আশ্ৰয় লোৱাৰ তথ্য লাভ কৰে।
সেই তথ্য লাভ কৰাৰ লগে লগে আৰক্ষীৰ এটা দল অঞ্চলটোলৈ যায়। আৰক্ষীৰ দলটো দেখি অভিযুক্তই পলাবলৈ চেষ্টা কৰে। কিন্তু দুয়োপক্ষৰ মাজত হোৱা গুলীচালনাৰ ফলত অভিযুক্ত থিতাতে নিহত হয়।
আৰক্ষীয়ে জনোৱা মতে, অভিযানৰ নেতৃত্ব দিয়া আৰক্ষী বিষয়াজনো অভিযুক্তই নিক্ষেপ কৰা গুলীত আহত হয়। তেওঁক চিকিৎসালয়ত ভৰ্তি কৰা হৈছে। উল্লেখ্য যে ৩ মে’ত মাল্লাবান থানা এলেকাত এটি সাত বছৰীয়া শিশুক অপহৰণ কৰি ধৰ্ষণ কৰি হত্যা কৰা হৈছিল। আৰক্ষীয়ে জনোৱা মতে, অপহৃত শিশুটিৰ ঘৰত ৭ লাখ টকাৰ মুক্তিপণ দাবী কৰা হৈছিল। শিশুটিৰ পৰিয়ালে উক্ত ধন দিবলৈ সময় বিচাৰিছিল। কিন্তু বাৰে বাৰে ভাবুকি দিয়া ফোন আহিবলৈ ধৰে। অৱশেষত শিশুটিৰ পৰিয়ালে আৰক্ষীৰ কাষ চাপে। তেতিয়াৰে পৰাই অনুসন্ধান চলি আছিল। বুধবাৰে পুৱা অভিযুক্তৰ অৱস্থান উদ্ধাৰ কৰে আৰু আৰক্ষীৰ গুলীত তেওঁ নিহত হয়।
