প্ৰধান মন্ত্ৰী নৰেন্দ্ৰ মোডীৰ চৰকাৰে পেট্ৰ’লত ইথানল মিশ্ৰণ (Petrol mixed with ethanol) ২০ শতাংশলৈ বৃদ্ধি (Increase by 20 percent) কৰিছে। অৱশ্যে, কেন্দ্ৰই মঙলবাৰে উচ্চতম ন্যায়ালয়ক কয় যে সামগ্ৰিক ফলাফল (বাহনৰ পৰিৱেশ আৰু ইঞ্জিনৰ ওপৰত প্ৰভাৱ) ভাল নে বেয়া সেয়া এতিয়াও জানিব পৰা হোৱা নাই। কেন্দ্ৰই শীৰ্ষ আদালতক কয় যে পেট্ৰ’লত ইথানল মিহলি কৰাটো এতিয়াও পৰীক্ষাৰ পৰ্যায়ত আছে। ফলাফল অহা বছৰ জনা যাব৷ ভাৰত পেট্ৰ’লিয়াম কৰ্প’ৰেচন লিমিটেডে (বিপিচিএল) কৰ্ণাটক উচ্চ ন্যায়ালয়ৰ ২০২৫-২৬ বৰ্ষৰ বাবে ইথানল আৱণ্টন বৃদ্ধি কৰাৰ নিৰ্দেশক প্ৰত্যাহ্বান জনাই উচ্চতম ন্যায়ালয়ৰ দ্বাৰস্থ হৈছে।
গোচৰটোৰ শুনানিৰ সময়ত উচ্চতম ন্যায়ালয়ে মঙলবাৰে এই বিষয়ে জনায়। ন্যায়াধীশ এম এম সুন্দৰেশ আৰু শীল নাগুৰৰ বিচাৰপীঠে ইথানল আৱণ্টনত স্থিতাৱস্থা বজাই ৰাখিবলৈ বিপিচিএলৰ আবেদনৰ ওপৰত কৰ্ণাটক উচ্চ ন্যায়ালয়ৰ আদেশ স্থগিত ৰাখে। কৰ্ণাটক উচ্চ ন্যায়ালয়ে তেল কোম্পানীবোৰক (বিপিচিএল, এইচপিচিএল, আইঅ’চিএল) ইথানল উৎপাদনকাৰী কোম্পানীবোৰে (যেনে বিনোপ ডিষ্টিলাৰীৰ দৰে) দাখিল কৰা আবেদন বিবেচনা কৰাৰ পিছত তেওঁলোকক আৱণ্টন কৰা ইথানলৰ পৰিমাণ বৃদ্ধি কৰিবলৈ নিৰ্দেশ দিছিল। এটা ব্যক্তিগত ডিষ্টিলাৰীয়ে কৰ্ণাটক উচ্চ ন্যায়ালয়ত ইয়াৰ ইথানল আৱণ্টন ৯.৯ কোটি লিটাৰলৈ বৃদ্ধি কৰিবলৈ এখন আবেদন দাখিল কৰিছিল।
তেওঁলোকে অভিযোগ কৰিছিল যে তেওঁলোকে আৰ্থিক লোকচানৰ সন্মুখীন হৈছিল যিহেতু মাত্ৰ ৩.৯২ কোটি লিটাৰ আবণ্টন দিয়া হৈছিল। কৰ্ণাটক উচ্চ ন্যায়ালয়ে তেল বিপণন কোম্পানীসমূহক বিষয়টোৰ ওপৰত সিদ্ধান্ত ল’বলৈ নিৰ্দেশ দিছিল। অৱশ্যে, বিপিচিএলৰ হৈ উপস্থিত থকা এটৰ্ণী জেনেৰেল আৰ ভেংকটৰমণিয়ে অভিযোগ কৰিছিল যে ই কেন্দ্ৰৰ ইথানল মিশ্ৰণ নীতিক বিপদত পেলাব। তেওঁ উচ্চতম ন্যায়ালয়ক কৈছিল যে কৰ্ণাটক উচ্চ ন্যায়ালয়ৰ আদেশে ২০ শতাংশ ইথানল-পেট্ৰ’ল মিশ্ৰণৰ ৰাষ্ট্ৰীয় নীতিক অস্থিৰ কৰিব পাৰে। কেন্দ্ৰৰ ইথানল মিশ্ৰণ কাৰ্যসূচী অনুসৰি, ২০ শতাংশ ইথানল পেট্ৰ’লৰ সৈতে মিহলি কৰা হয়।
ইয়াক জনপ্ৰিয়ভাৱে E20 ইন্ধন হিচাপে জনা যায়। যোৱা মাহত কেন্দ্ৰই পশ্চিম এছিয়াৰ অস্থিৰতা আৰু বিশ্ব বজাৰত খাৰুৱা তেলৰ বৰ্ধিত মূল্যৰ বাবে আমদানি ব্যয় হ্ৰাস কৰিবলৈ পেট্ৰ’লত অধিক ইথানল মিহলি কৰাৰ সিদ্ধান্ত লৈছিল। চৰকাৰী জাননী অনুসৰি, ইথানল পেট্ৰ’লৰ সৈতে ৩০ শতাংশ মিহলি কৰিব পাৰি। অৱশ্যে ইয়াক এতিয়াও মুকলি কৰা হোৱা নাই। এটৰ্নি জেনেৰেলে মঙলবাৰে উচ্চতম ন্যায়ালয়ক কয় যে ইথানল মিশ্ৰণ কাৰ্যসূচী এক নিৰন্তৰ পৰীক্ষা আৰু অনাগত বছৰত নীতিৰ প্ৰভাৱ অধিক স্পষ্ট হ’ব। তেওঁ কয়, “ইথানল আৱণ্টন প্ৰক্ৰিয়া ১৭ অক্টোবৰ, ২০২৫ তাৰিখে চূড়ান্ত কৰা হৈছিল আৰু ৩৭৮ জন যোগানকাৰীক মুঠ ১,০৫০ কোটি লিটাৰ ইথানলৰ অৰ্ডাৰ দিয়া হৈছিল। যাৰ ভিতৰত ৬৮০ কোটি লিটাৰ ইতিমধ্যে ১৮ জুনলৈকে যোগান ধৰা হৈছে।”
একে সময়তে চৰকাৰে ইথানল মিশ্ৰণৰ হাৰ বৃদ্ধি কৰাৰ প্ৰস্তাৱ দিছে, এটৰ্নি জেনেৰেলে কয়। কেন্দ্ৰৰ ইথানল মিশ্ৰণ কাৰ্যক্ৰম ইতিমধ্যে দেশত বিতৰ্কৰ বিষয় হৈ পৰিছে। ফলস্বৰূপে, পুৰণি বাহনৰ ক্ষতি আৰু ইন্ধন দক্ষতা হ্ৰাস হোৱাৰ অভিযোগ উত্থাপিত হৈছে। অৱশ্যে চৰকাৰে এই আশংকা নাকচ কৰি কয় যে ইথানল-মিশ্ৰিত পেট্ৰ’লৰ যান্ত্ৰিক ক্ষতিৰ কোনো বৈজ্ঞানিক প্ৰমাণ নাই। ইথানল মিশ্ৰিত ইন্ধন কাৰ্যকাৰীতা আৰু মাইলেজও বিশুদ্ধ পেট্ৰ’লতকৈ কম। অটোমোবাইল উদ্যোগৰ এটা অংশই দাবী কৰে যে ই ইঞ্জিনৰ শক্তি উৎপাদন ২ৰ পৰা ৫ শতাংশ হ্ৰাস কৰিব পাৰে। দীৰ্ঘম্যাদী সময়ত, কিছুমান অংশৰ জীৱনকাল হ্ৰাস কৰিব পাৰি। কিন্তু এই সকলোবোৰ গাড়ীৰ প্ৰকাৰৰ ওপৰত নিৰ্ভৰ কৰে। এটৰ্ণী জেনেৰেলে কয় যে এতিয়ালৈকে ইথানল মিশ্ৰণ ২০ শতাংশতকৈ অধিক বৃদ্ধি কৰাৰ চৰকাৰী নীতিত কোনো সিদ্ধান্ত নাই। অৱশ্যে, কেন্দ্ৰীয় মন্ত্ৰী নীতিন গাডকাৰী আৰু হৰদীপ সিং পুৰীয়ে ইথানলৰ পৰিমাণ ৮৫ শতাংশলৈকে বৃদ্ধি কৰাৰ ইংগিত দিছে।
