পশ্চিমবঙ্গত নিৰ্বাচনী হিংসাৰ (West Bengal Election Violence) চূড়ান্ত ৰূপ। বিজেপি নেতা শুভেন্দু অধিকাৰীৰ ব্যক্তিগত সহায়ক চন্দ্ৰনাথ ৰথক গুলীয়াই হত্যা। বুধবাৰে নিশা সংঘটিত হয় এই মৰ্মান্তিক ঘটনা।
বুধবাৰে নিশা দুষ্কৃতিকাৰীয়ে বাইকেৰে মধ্যমগ্ৰামৰ দোহৰীয়ালৈ আহি চন্দ্ৰনাথৰ গাড়ীত গুলীচালনা কৰে। গাড়ীত চন্দ্ৰনাথৰ লগত আছিল আন এজন যুৱক। তেওঁৰ নাম বুদ্ধদেৱ বেৰা।
দুয়োকে উদ্ধাৰ কৰি স্থানীয় চিকিৎসালয়লৈ লৈ যোৱা হয় যদিও চিকিৎসকে চন্দ্ৰনাথক মৃত বুলি ঘোষণা কৰে। আনহাতে, সংকটজনক অৱস্থাত বুদ্ধদেৱক কলকাতাৰ ই এম বাইপাছৰ সংলগ্ন চিকিৎসালয়লৈ প্ৰেৰণ কৰা হয়।
ইফালে এই ঘটনা সংঘটিত হোৱাৰ পিছত ৰাজনৈতিক প্ৰতিশোধৰ বাবেই শুভেন্দু অধিকাৰীৰ ব্যক্তিগত সহায়ক চন্দ্ৰনাথ ৰথক হত্যা কৰা হ’ল বুলি চন্দ্ৰনাথৰ ওচৰ-চুবুৰীয়াই ধাৰণা কৰিছে।
উল্লেখযোগ্য যে চন্দ্ৰনাথৰ ঘৰ পূব মেদিনীপুৰৰ চণ্ডীপুৰত। বুধবাৰে নিশাৰ পৰা তেওঁৰ ঘৰৰ সন্মুখত আৰক্ষী মোতায়েন কৰা হৈছে। চুবুৰীয়াই শোকসন্তপ্ত পৰিয়ালটোক সমবেদনা জ্ঞাপন কৰিবলৈ আহি আছে।
কান্তি বিজেপিৰ সাংসদ দিব্যেন্দু অধিকাৰীও চন্দ্ৰনাথৰ ঘৰত উপস্থিত হয়। ওচৰ-চুবুৰীয়াৰ এজনে কয়, “হঠাৎ আমি টিভিত দেখিলোঁ যে চন্দ্ৰক গুলীয়াই হত্যা কৰা হৈছে। আমি থতমত খালোঁ। ৰাজনৈতিক প্ৰতিশোধৰ বাবেই তেওঁক হত্যা কৰা হ’ল।”
চন্দ্ৰনাথৰ ওচৰ-চুবুৰীয়াৰ এটা অংশই কয় যে দোষীক শীঘ্ৰে গ্ৰেপ্তাৰ কৰি উপযুক্ত শাস্তি দিব লাগে। অন্যথা চুবুৰীয়াই বৃহত্তৰ আন্দোলন আৰম্ভ কৰিব বুলিও কয়।
বুধবাৰে নিশা দুষ্কৃতিকাৰীয়ে বাইকেৰে মধ্যমগ্ৰামৰ দোহৰীয়ালৈ আহি চন্দ্ৰনাথৰ গাড়ীত গুলীচালনা কৰে। সেই সময়ত গাড়ীত চন্দ্ৰনাথৰ লগত আছিল বুদ্ধদেৱ বেৰা নামৰ যুৱকজন।
উক্ত ঘটনা সংঘটিত হোৱাৰ পিছত নিশা প্ৰায় ১ বজাত ঘটনাস্থলীত উপস্থিত হয় ৰাজ্যিক আৰক্ষীৰ সঞ্চালক প্ৰধান সিদ্ধনাথ গুপ্তা। তদন্ত আৰম্ভ কৰা বুলি তেওঁ জানিবলৈ দিয়ে। শুভেন্দু আৰু চন্দ্ৰনাথৰ পত্নীৰ সৈতেও তেওঁ কথা পাতে।
চন্দ্ৰনাথৰ পত্নীয়ে ডিজিক কয়, “মই মোৰ স্বামীক ঘূৰাই নাপাম। কিন্তু মই জানিব বিচাৰো কোনে এই কাম কৰিলে। মই তেওঁলোকৰ এনকাউণ্টাৰ বিচাৰো।”
আনহাতে, শুভেন্দুৱে কয় যে এই হত্যাকাণ্ডৰ লগত ৰাজনৈতিক সম্পৰ্ক থাকিব পাৰে। অৱশ্যে এই সন্দৰ্ভত তেওঁ এতিয়াই কোনো মন্তব্য দিব নিবিচাৰে। আৰক্ষীয়ে জনোৱা মতে, চিচিটিভিৰ ফুটেজ পৰীক্ষা কৰা হৈছে।
শুভেন্দুৱে দাবী কৰে যে সঠিক তদন্তৰ স্বাৰ্থত এই ফুটেজ সন্দৰ্ভত আৰক্ষীৰ পৰা কোনো তথ্য বিচৰা হোৱা নাছিল। তেওঁ আৰু কয় যে তদন্তৰ বাবে আৰক্ষীৰ ওপৰত নিৰ্ভৰ কৰা হৈছে। শীঘ্ৰে দোষীক ধৰা হ’ব বুলি তেওঁক আশ্বাস দিয়া হৈছে।
শুভেন্দুৱে এই পৰিস্থিতিত আইন নিজৰ হাতত তুলি নল’বলৈ দলৰ কৰ্মী আৰু সমৰ্থকসকলক আহ্বান জনায়। শান্তি বজাই ৰখাৰ কথাও তেওঁ কয়। বুধবাৰে চিকিৎসালয়ৰ চৌহদৰ পৰা শুভেন্দুৱে দাবী কৰে, “ৰাজ্যত ১৫ বছৰ ধৰি প্ৰতিশোধৰ ৰাজনীতি চলি আছে। বুধবাৰে খড্ডাত বিজেপি কৰ্মীক বোমা, বৰাহনগৰত ছুৰী আৰু বছিৰহাটত গুলীৰে আক্ৰমণ কৰা হয়।”
