অভিনেতাৰ পৰা ৰাজনীতিক হোৱা বিজয়ৰ দল তামিলাগা ভেট্টি কাঝাগামে (টিভিকে) তামিলনাডুত চৰকাৰ (Tamilnadu Election) গঠন কৰিব বিচাৰিছে। বুধবাৰে ৰাজ্যপাল ৰাজেন্দ্ৰ বিশ্বনাথ আৰ্লেকাৰক সাক্ষাৎ কৰি থালাপতি বিজয়ে এই অনুৰোধ কৰে।
বিজয়ে চৰকাৰ গঠন কৰিব বিচাৰিলেও সংখ্যাগৰিষ্ঠতাত সন্তুষ্ট নহয় ৰাজ্যপাল:অৱশ্যে তেওঁ আচলতে চৰকাৰ গঠন কৰিবলৈ সক্ষম হ’বনে নাই তাত সন্দেহৰ সৃষ্টি হৈছে। কাৰণ তেওঁৰ হাতত চৰকাৰ গঠনৰ বাবে প্ৰয়োজনীয় ‘মেজিক নম্বৰ’ নাই।
যদিও কংগ্ৰেছে ৰাজহুৱাভাৱে বিজয়ৰ দলটোক সমৰ্থন কৰিছে, কিন্তু তাৰ পিছতো চৰকাৰ গঠনৰ বাবে প্ৰয়োজনীয় সংখ্যাতকৈ কেইখনমান আসন কম। সূত্ৰ অনুসৰি, টিভিকেৰ সংখ্যাগৰিষ্ঠতা আছে নে নাই সেই সন্দৰ্ভত ৰাজ্যপাল ৰাজেন্দ্ৰই সন্দেহ প্ৰকাশ কৰিছে।
বুধবাৰে তামিলনাডুৰ কংগ্ৰেছ নেতাসকলে চেন্নাইস্থিত টিভিকেৰ মুখ্য কাৰ্যালয়লৈ গৈ বিজয়ক সাক্ষাৎ কৰে। চৰকাৰ গঠনৰ বাবে টিভিকেক সম্পূৰ্ণ সমৰ্থনৰ বাৰ্তা প্ৰদান কৰে।
অৱশ্যে কংগ্ৰেছৰ সমৰ্থন পালেও বিজয়ৰ দলটোক তামিলভূমিত চৰকাৰ গঠন কৰিবলৈ আৰু পাঁচজন বিধায়কৰ সমৰ্থনৰ প্ৰয়োজন। যদি ৰাজ্যপালে চৰকাৰ গঠনৰ আহ্বান জনায় তেন্তে কেইদিনমানৰ ভিতৰতে টিভিকেয়ে বিধানসভাত সংখ্যাগৰিষ্ঠতা প্ৰমাণ কৰিব লাগিব।
তামিলনাডুত একক দল হিচাপে সৰ্বাধিক ভোট লাভ কৰিছে বিজয়ৰ টিভিকেয়ে। ১০৮ খন আসন লাভ কৰিছে দলটোৱে। অৱশ্যে চৰকাৰ গঠন কৰিবলৈ ই যথেষ্ট নহয়।
ৰাজ্যখনত চৰকাৰ গঠন কৰিবলৈ ১১৮ খন আসনৰ প্ৰয়োজন। এনে পৰিস্থিতিত কংগ্ৰেছৰ বিধায়কসকলৰ সমৰ্থনো ইয়াৰ বাবে যথেষ্ট নহয়। কংগ্ৰেছে সমৰ্থন জনোৱাৰ পিছত বিজয়ৰ পক্ষত আছে ১১৩ জন বিধায়ক। কিন্তু চৰকাৰ গঠনৰ বাবে আৰু পাঁচজন বিধায়কৰ সমৰ্থনৰ প্ৰয়োজন।
এনে পৰিস্থিতিত বিজয়ে মিত্ৰতাৰ অংশীদাৰৰ সন্ধানত চিপিআই, চিপিএম, ভিচিকেৰ দৰে দলৰ সৈতে যোগাযোগ কৰিছে। যদি টিভিকেয়ে এই দলসমূহৰ সমৰ্থন পায় তেন্তে চৰকাৰ গঠনৰ বাবে মুঠ ১১৯ জন বিধায়কৰ সমৰ্থন লাভ কৰিব। ইফালে কংগ্ৰেছে বিজয়ৰ সৈতে হাত মিলোৱাত ইতিমধ্যে অসন্তুষ্টি প্ৰকাশ কৰিছে ডিএমকে শিবিৰে।
ডিএমকেৰ মুখপাত্ৰ সৰৱনন আন্নাদুৰাইয়ে কংগ্ৰেছক ‘বিশ্বাসঘাতক’ বুলি আক্ৰমণ কৰিছে। কিন্তু কংগ্ৰেছে বিজয়ৰ দলৰ সৈতে এই মিত্ৰতা কেৱল আঞ্চলিক পৰ্যায়তহে বুলি কৈছে। ৰাষ্ট্ৰীয় পৰ্যায়ত ডিএমকে আৰু কংগ্ৰেছ ‘ইণ্ডিয়া’ মিত্ৰতাৰ অংশ।
Related Posts
