অসম আৰু কেন্দ্ৰীয়শাসিত অঞ্চল পুডুচেৰীকে ধৰি চাৰিখন ৰাজ্যৰ পৰা আদৰ্শ আচৰণ বিধি (Code of Conduct) প্ৰত্যাহাৰ কৰিছে নিৰ্বাচন আয়োগে (Election Commission is withdrawing)। ১৫ মাৰ্চত অসম, পশ্চিমবংগ, কেৰালা, তামিলনাডু আৰু পুডুচেৰীত নিৰ্বাচনৰ দিন ঘোষণা কৰা হৈছিল। সেইদিনাৰ পৰাই আদৰ্শ আচৰণ বিধি বলৱৎ হয়। যোৱা ৪ মে’ত নিৰ্বাচনৰ ফলাফল ঘোষণা কৰাৰ পিছত নিৰ্বাচন আয়োগে এই চাৰিখন ৰাজ্য আৰু কেন্দ্ৰীয়শাসিত অঞ্চলৰ পৰা এমচিচি প্ৰত্যাহাৰ কৰিছে। চাৰিখন ৰাজ্য আৰু কেন্দ্ৰীয়শাসিত অঞ্চলটোক এই বিষয়ে অধিসূচনা জাৰি কৰি অৱগত কৰা হৈছে।
অৱশ্যে পশ্চিমবংগ বিধানসভা সমষ্টিতহে এমচিচি কাৰ্যকৰী হ’ব বুলি আয়োগে জনাইছে। কাৰণ সমষ্টিটোত সকলো ভোট বাতিল কৰা হৈছে। ২১ মে’ত তাত পুনৰ নিৰ্বাচন অনুষ্ঠিত হ’ব আৰু ২৪ মে’ত ফলাফল ঘোষণা কৰা হ’ব। সেয়েহে উক্ত সমষ্টিটোৰ বাবে আদৰ্শ আচৰণ বিধি সম্প্ৰতি কাৰ্যকৰী হৈ থাকিব বুলি আয়োগে অধিসূচনাত প্ৰকাশ কৰিছে। ২৯ এপ্ৰিলত এই সমষ্টিত দ্বিতীয় পৰ্যায়ৰ ভোটগ্ৰহণ অনুষ্ঠিত হৈছিল। কিন্তু ইভিএম টেম্পাৰিঙৰ অভিযোগ উত্থাপন হৈছিল। একে সময়তে পুনৰ নিৰ্বাচনৰ বাবে আয়োগত আবেদন দাখিল কৰা হয়।
পুনৰ নিৰ্বাচন কোনটো ভোটকেন্দ্ৰত হ’ব সেই সন্দৰ্ভত সিদ্ধান্ত লোৱাৰ পূৰ্বে আয়োগে তদন্ত চলায়। দক্ষিণ ২৪ পৰগনা জিলাৰ পৰা সৰ্বাধিকসংখ্যক পুনৰ নিৰ্বাচনৰ আবেদন দাখিল কৰা হৈছে। উক্ত তালিকাত ফাল্টাও আছে। দেশৰ মুখ্য নিৰ্বাচন আয়ুক্ত জ্ঞানেশ কুমাৰৰ নিৰ্দেশত আয়োগে নিযুক্তি দিয়া বিশেষ পৰ্যবেক্ষক সুব্ৰত গুপ্তাই ফাল্টা, মগৰাহাট, ডাইমণ্ড হাৰ্বাৰ আৰু দক্ষিণ ২৪ পৰগনাৰ বিভিন্ন অঞ্চললৈ গৈ তদন্ত প্ৰক্ৰিয়া নিৰীক্ষণ কৰে। পৰিস্থিতি পৰীক্ষা কৰি সুব্ৰত গুপ্তাই পুনৰ নিৰ্বাচনৰ প্ৰতিবেদন দিল্লীলৈ প্ৰেৰণ কৰে। সূত্ৰ অনুসৰি, উক্ত প্ৰতিবেদনত ফাল্টাৰ নাম বিশেষভাৱে উল্লেখ কৰা হৈছে। উল্লেখ্য যে ২ মে’ত মগৰাহাট পশ্চিম বিধানসভা সমষ্টিৰ ১১টা আৰু ডাইমণ্ড হাৰ্বাৰৰ ৪টা ভোটকেন্দ্ৰত পুনৰ নিৰ্বাচন অনুষ্ঠিত হয় যদিও ফাল্টা বিধানসভা সমষ্টিত পুনৰ নিৰ্বাচন অনুষ্ঠিত কৰাৰ সিদ্ধান্ত লোৱা হয়।
এই চাৰিখন ৰাজ্য আৰু কেন্দ্ৰীয়শাসিত অঞ্চলৰ বিধানসভা নিৰ্বাচনৰ উপৰি গুজৰাট, মহাৰাষ্ট্ৰ, কৰ্ণাটক, নাগালেণ্ড আৰু ত্ৰিপুৰাৰ কেইটামান সমষ্টিত উপ-নিৰ্বাচন অনুষ্ঠিত হৈছিল। সেই সমষ্টিসমূহতো আদৰ্শ আচৰণ বিধি বলৱৎ আছিল। আয়োগে জনায় যে এইবাৰ তাৰ পৰাও এই বিধি উঠাই লোৱা হৈছে।
