ওড়িশাত এজন ৰে’ল আৰক্ষী কনিষ্টবলৰ (Railway police constable in Odisha) বিৰুদ্ধে ধৰ্ষণৰ অভিযোগত (Rape accusation) বৃহস্পতিবাৰে ক্ষুব্ধ জনতাই তেওঁক প্ৰহাৰ কৰে। ফলত থিতাতে তেওঁৰ মৃত্যু হয়। প্ৰত্যক্ষদৰ্শীয়ে জনোৱা মতে, কনিষ্টবলজনৰ বিৰুদ্ধে এগৰাকী মহিলাক হাৰাশাস্তি আৰু ধৰ্ষণ কৰাৰ অভিযোগ উত্থাপন হৈছিল। বৃহস্পতিবাৰে অভিযুক্ত ধৰা পৰাৰ লগে লগে জনসাধাৰণৰ ক্ষোভৰ সৃষ্টি হয়। প্ৰথমে কনিষ্টবলজনৰ হাত-ভৰি বাঁহৰ খুঁটা এটাত বান্ধি ওলোমাই লৈ অঞ্চলটোত ঘূৰোৱা হয়। তাৰ পিছত প্ৰহাৰ কৰে। এই ঘটনাৰ খবৰ পোৱাৰ পিছতে আৰক্ষীয়ে গৈ অভিযুক্তক উদ্ধাৰৰ চেষ্টা চলায়। কিন্তু গাঁওবাসীয়ে তেওঁলোকক বাধা দিয়াৰ অভিযোগ। অৱশেষত আৰক্ষীয়ে মৌন দৰ্শক হৈ থাকিবলগা হয়। আৰক্ষীৰ সন্মুখতে অভিযুক্তক মাৰপিট কৰাত তেওঁৰ থিতাতে মৃত্যু হয়। আৰক্ষীৰ সূত্ৰ অনুসৰি, অভিযুক্ত কনিষ্টবলজন জিমৰ প্ৰশিক্ষক আছিল। প্ৰহাৰৰ সৈতে জড়িত চাৰিজন লোকক আৰক্ষীয়ে গ্ৰেপ্তাৰ কৰিছে।
তদন্তকাৰীয়ে জনোৱা মতে, বৃহস্পতিবাৰে পুৱা ১০.৩০ বজাত কনিষ্টবলজনে বন্ধুৰ সৈতে বাইক চলাই গৈ আছিল। অভিযোগ অনুসৰি, সেই সময়ত দুগৰাকী যুৱতীয়ে স্কুটি চলাই গৈ আছিল। তেওঁলোকৰ প্ৰতি অশ্লীল মন্তব্য কৰাৰ অভিযোগ। যুৱতীকেইগৰাকী ভুৱনেশ্বৰলৈ গৈ আছিল। অভিযোগ অনুসৰি, কনিষ্টবলজনে স্কুটিত থকা যুৱতীকেইগৰাকীক খুন্দা মৰাৰ ফলত তেওঁলোক ৰাস্তাত বাগৰি পৰে। ইয়াৰ পিছতে কনিষ্টবলজনে এগৰাকী যুৱতীক ধৰ্ষণৰ চেষ্টা চলায়। যুৱতীগৰাকীয়ে পথচাৰীক ঘটনাৰ কথা কোৱাত কনিষ্টবলজনেও তেওঁলোকৰ লগত অশ্লীল আচৰণ কৰে। ইয়াৰ পিছতে স্থানীয় ৰাইজৰ খং উঠে আৰু ইয়াৰ পিছতে আৰম্ভ হয় মাৰপিটৰ ঘটনা।
