দেশৰ চিকিৎসা শিক্ষা ব্যৱস্থাৰ আমূল পৰিৱৰ্তন হ’বলৈ ওলাইছে। আগন্তুক দিনত দেশৰ পৰম্পৰাগত স্নাতকোত্তৰ (পিজি) ডিপ্লমা মেডিকেল পাঠ্যক্ৰম (Medical education) সম্পূর্ণৰূপে বন্ধ হ’ব বুলি ঘোষণা কৰিছে ৰাষ্ট্রীয় চিকিৎসা আয়োগে৷
অৱশ্যে এমডি আৰু এম ছৰ দৰে ডিগ্ৰী প্ৰগ্ৰেম চলি থাকিব। এনএমচিয়ে জাৰি কৰা এক অধিসূচনাত উল্লেখ কৰা হৈছে যে ২০২৬-২০২৭ অৰ্থাৎ চলিত শিক্ষাবৰ্ষই হৈছে পিজি ডিপ্লমা পাঠ্যক্ৰমত নামভৰ্তিৰ শেষ বছৰ।
২০২৭-২০২৮ শিক্ষাবৰ্ষৰ পৰা পিজি ডিপ্লমা পাঠ্যক্ৰমত নতুনকৈ নামভৰ্তিৰ অনুমতি দিয়া নহ’ব। এতিয়াৰে পৰা এনে সকলো পাঠ্যক্ৰম সম্পূৰ্ণৰূপে বন্ধ হৈ যাব। এনএমচিয়ে জনোৱা মতে, দুবছৰীয়া পিজি ডিপ্লমাৰ বাবে আবণ্টিত ৩৩০০ আসন এমডি আৰু এমএছ পাঠ্যক্ৰমত সংযোজন কৰা হ’ব।
শেহতীয়াকৈ এনএমচিৰ অধীনস্থ স্নাতকোত্তৰ চিকিৎসা শিক্ষা ব’ৰ্ডে এই সন্দৰ্ভত নিৰ্দেশনা জাৰি কৰিছে। তাৰ কিছুদিনৰ ভিতৰতে নিৰ্দেশনা জাৰি কৰিছে ৰাষ্ট্ৰীয় চিকিৎসা আয়োগে। পিজিএমইবিৰ সঞ্চালক চি কে ৰামাস্বামীয়ে এই সিদ্ধান্তৰ কাৰণ ব্যাখ্যা কৰে।
তেওঁ কয় যে চিকিৎসা বিজ্ঞানৰ মান উন্নত, বিশেষজ্ঞ প্ৰশিক্ষণৰ বিশ্বজনীন স্বীকৃতি আৰু সমসাময়িক শৈক্ষিক মানদণ্ডৰ সৈতে সামঞ্জস্য বজাই ৰাখিবলৈ এই পদক্ষেপ গ্ৰহণ কৰা হৈছে।
আয়োগে কয় যে বৰ্তমান দেশৰ বহু চিকিৎসা মহাবিদ্যালয়ত একেটা বিষয়তে পিজি ডিপ্লমা আৰু পিজি ডিগ্ৰী দুয়োটা পাঠ্যক্ৰম চলি আছে।
আনহাতে, একাংশ শিক্ষানুষ্ঠানত কেৱল পিজি ডিপ্লমা পাঠ্যক্ৰমহে চলি আছে। বহুক্ষেত্ৰত এই প্ৰতিষ্ঠানসমূহত ডিগ্ৰী পাঠ্যক্ৰম চলাবলৈ প্ৰয়োজনীয় আন্তঃগাঁথনি নাথাকে, শিক্ষক, অধ্যাপক আৰু ক্লিনিকেল সঁজুলি ষ্টকত আছে। গতিকে সেই আন্তঃগাঁথনিৰ সঠিক ব্যৱহাৰ অতি প্ৰয়োজনীয়।
সেই উদ্দেশ্যে এই ডিপ্লমা পাঠ্যক্ৰমসমূহক কেৱল ডিগ্ৰী পাঠ্যক্ৰমলৈ ৰূপান্তৰিত কৰাৰ সিদ্ধান্ত লোৱা হৈছে।
এনএমচিয়ে নিৰ্দেশ দিছে যে দেশৰ যিবোৰ চিকিৎসা মহাবিদ্যালয় বা শিক্ষানুষ্ঠানে বৰ্তমান পিজি ডিপ্লমা পাঠ্যক্ৰম চলাই আছে আৰু সেইবোৰক এমডি বা এমএছ ডিগ্ৰীলৈ ৰূপান্তৰিত কৰিব বিচাৰে, সেইবোৰে তৎকালীনভাৱে আবেদন কৰিব লাগে।
সংশ্লিষ্ট প্ৰতিষ্ঠানসমূহে নিৰ্ধাৰিত ফৰ্মেট অনুসৰি অনলাইন পৰ্টেলৰ জৰিয়তে ‘চিকিৎসা মূল্যায়ন আৰু ৰেটিং ব’ৰ্ড’ত (MARB) আবেদন দাখিল কৰিব লাগিব বুলিও এনএমচিয়ে জনাইছে। এনএমচিয়ে লগতে কয় যে দেশৰ সকলো চিকিৎসা মহাবিদ্যালয় আৰু প্ৰতিষ্ঠানে এই নিৰ্দেশনা কঠোৰভাৱে পালন কৰিব লাগে।
