অসম বিধানসভাৰ (Assam Legislative Assembly) চলিত অধিবেশনত বুধবাৰে গৃহীত হয় অভিন্ন দেৱানী বিধি বা ইউনিফাইড চিভিল কোড (Assam UCC) বিধেয়ক।
এই বিধেয়ক গৃহীত (Bill passed) হোৱাৰ লগে লগে এতিয়াৰে পৰা অসমত বিবাহৰ চৰকাৰী পঞ্জীয়ন বাধ্যতামূলক হ’ব। ইয়াৰ উপৰি এই আইন কাৰ্যকৰী হোৱাৰ পিছত আন বহু নিৰ্দেশনা মানি চলিব লাগিব। উল্লেখযোগ্য যে এই বিধেয়ক গ্ৰহণৰ লগে লগে
ইউচিচি গ্ৰহণ কৰা দেশৰ তৃতীয়খন ৰাজ্য আৰু উত্তৰ-পূবৰ প্ৰথমখন ৰাজ্য হিচাপে অসম পৰিগণিত হ’ল। ইয়াৰ পূৰ্বে উত্তৰাখণ্ড আৰু গুজৰাটত ইউচিচি প্ৰৱৰ্তন হৈছে। আনহাতে, অসমত চৰকাৰীভাৱে এই বিধেয়খনৰ নাম দিয়া হৈছে সমৰূপ নাগৰিক সংহিতা।
বিধেয়কখনৰ বিধান অনুসৰি, এতিয়াৰে পৰা বিবাহৰ ৬০ দিনৰ ভিতৰত চৰকাৰীভাৱে পঞ্জীয়ন কৰিব লাগিব। ৬০ দিনৰ ভিতৰত যদি কোনোৱে বিবাহ পঞ্জীয়ন নকৰে তেন্তে ১০ হাজাৰ টকাৰ জৰিমনা ভৰিব লাগিব। আনহাতে, বিবাহ বিচ্ছেদৰ ক্ষেত্ৰতো একে নিয়ম প্ৰযোজ্য হ’ব।
ইয়াৰ উপৰি একত্ৰবাস বা লিভ-ইন ৰিলেচনৰ ক্ষেত্ৰত পুৰুষ-মহিলাই সম্পৰ্ক স্থাপনৰ ৩০ দিনৰ ভিতৰত পঞ্জীয়ন কৰাটো বাধ্যতামূলক। যদি কোনোবাই এই নিয়ম ভংগ কৰে তেন্তে ৩ মাহ পৰ্যন্ত কাৰাদণ্ড বা ১০ হাজাৰ টকাৰ জৰিমনা ভৰিব লাগিব। কিন্তু এই সম্পৰ্কত থকাৰ সময়ত জন্মলাভ কৰা সন্তানক বৈধ হিচাপে বিবেচনা কৰা হ’ব।
আনহাতে, এই বিধেয়ক অনুসৰি অসমত বহুবিবাহ আৰু দ্বিতীয় বিবাহ সম্পূৰ্ণৰূপে নিষিদ্ধ কৰা হৈছে। যদি কোনোবাই এই নিয়ম ভংগ কৰে তেন্তে ভাৰতীয় ন্যায় সংহিতাৰ অধীনত ৭ বছৰ পৰ্যন্ত কাৰাদণ্ডৰ শাস্তি হ’ব। বলপূৰ্বকভাৱে বা কোনোবাই যদি প্ৰৱঞ্চনা কৰি বিয়া পাতে তেন্তে অভিযুক্তক একে শাস্তি প্ৰদান কৰা হ’ব।
উল্লেখযোগ্য যে ২০২৪ চনত উত্তৰাখণ্ড আৰু ২০২৬ চনত গুজৰাটে ইউচিচি ৰূপায়ণ কৰিছিল যদিও বৰ্তমান অসমৰ ইউচিচিত কিছু পার্থক্য আছে।
অসমত এই আইনৰ অধীনত নপৰিব জনজাতীয় লোকসকল।
একেদৰে উত্তৰাখণ্ড আৰু গুজৰাটৰ দৰে অসমতো লিভ-ইন ৰিলেচনত কঠোৰ দৃষ্টিভংগী গ্ৰহণ কৰা হৈছে যদিও অসমত এই সম্পৰ্কত জন্ম হোৱা সন্তানক বৈধতা প্ৰদান কৰা হৈছে।
আনহাতে, সম্পত্তিৰ অধিকাৰৰ ক্ষেত্ৰত পুত্ৰ-কন্যাক সমান অধিকাৰ প্ৰদানৰ কথা ইয়াত স্পষ্টভাৱে উল্লেখ কৰা হৈছে।
ইয়াৰ লগতে বিবাহ বিচ্ছেদৰ পিছত ৫ বছৰৰ তলৰ সন্তানক মাতৃৰ লগত থকাৰ নিৰ্দেশনা প্ৰদান কৰা হৈছে।
