ৰাজ্যৰ বান পৰিস্থিতি কিছু উন্নয়ন হৈছে যদিও উজনি অসমৰ তিনিখন জিলা শিৱসাগৰ, যোৰহাট আৰু চৰাইদেউ জিলাৰ পৰিস্থিতি এতিয়াও অপৰিৱৰ্তিত হৈ আছে৷ আনহাতে, শেহতীয়া বানত এতিয়ালৈকে ৪১ জনৰো অধিক লোকৰ মৃত্যু হৈছে৷ লগতে ক্ষতিগ্ৰস্ত হৈছে হাজাৰ হাজাৰ হেক্টৰ কৃষিভূমি৷
ইফালে মুখ্যমন্ত্ৰীৰ ভাষ্য অনুসৰি, বৰ্তমানলৈকে শিৱসাগৰ জিলাকে ধৰি সৰ্বমুঠ ১০০ লোক সন্ধানহীন হৈ আছে৷ নাজিৰাতে সৰ্বাধিক ৬০ জন লোক সন্ধানহীন হৈ থকা বুলি জানিব পৰা গৈছে। অৱশ্যে কিছু কিছু অঞ্চলত বান পৰিস্থিতি উন্নত হৈছে যদিও তিনিখন জিলাৰ প্ৰায়সংখ্যক অঞ্চলতে বান পৰিস্থিতি অপৰিৱৰ্তিত হৈ আছে৷
অসম ৰাজ্যিক দুৰ্যোগ ব্যৱস্থাপনা প্ৰাধিকৰণৰ তথ্য অনুসৰি, ৰাজ্যৰ ৪০টা ৰাজহ চক্ৰৰ অন্তৰ্গত ৯৩৯ খন গাঁও বৰ্তমানো পানীৰ তলত বুৰ গৈ আছে। আনহাতে, কাৰ্বি আংলং, গোলাঘাট, চৰাইদেউ, কামৰূপ, শিৱসাগৰ, যোৰহাট, ডিব্ৰুগড়, নগাঁও, ধেমাজি, হোজাই, কামৰূপ (মহানগৰ) জিলাৰ ৬.৫৩ লাখৰো অধিক লোক বানৰ ফলত ক্ষতিগ্ৰস্ত হৈছে। আটাইতকৈ ক্ষতিগ্ৰস্ত শিৱসাগৰ জিলাতে ৩,৯২,১৯৫ জন লোক বানত ক্ষতিগ্ৰস্ত হোৱাৰ বিপৰীতে চৰাইদেউ জিলাত ১,১০,৭৫৫ জন, যোৰহাটত ৯,৭৬,৯০ জন, গোলাঘাটত ২,৫৫,৯১ জন আৰু ডিব্ৰুগড় জিলাত ১৩,৩৯০ জন লোক ক্ষতিগ্ৰস্ত হৈছে ।
আনহাতে, আটাইতকৈ শোচনীয় পৰিস্থিতিৰ সৃষ্টি হোৱা শিৱসাগৰ জিলাৰ নাঙলমুৰাঘাটত দিচাং নদীৰ জলপৃষ্ঠ সৰ্বোচ্চ বিপদসীমাৰ ওপৰেদি বৈছে । চেনিমাৰীৰ (খোৱাং) বুঢ়ীদিহিং, শিৱসাগৰৰ দিখৌ, নুমলীগড়ৰ ধনশিৰি, শ্ৰীভূমিৰ কুশিয়াৰা নদীৰ জলপৃষ্ঠ বিপদসীমাৰ ওপৰেৰে বৈ আছে।
অসম ৰাজ্যিক দুৰ্যোগ ব্যৱস্থাপনা প্ৰাধিকৰণৰ দৈনিক বান বুলেটিনত প্ৰকাশিত তথ্য অনুসৰি, বুধবাৰৰ দিনটোত ৰাজ্যত চলিত বানত চাৰিটা শিশুসহ ১০ জন লোকৰ মৃত্যু হয়৷ ইয়াৰে ভিতৰত শিৱসাগৰ আৰু যোৰহাট জিলা তিনিজনকৈ, চৰাইদেউত দুজন আৰু ধেমাজি আৰু কাৰ্বি আংলং জিলাত এজনকৈ লোকৰ মৃত্যু হৈছে৷ ফলত ৰাজ্যত বানত মৃত্যু হোৱা লোকৰ সংখ্যা ৪১ জনলৈ বৃদ্ধি পাইছে ৷আনহাতে, তিনিজন পুৰুষ আৰু তিনিগৰাকী মহিলাকে ধৰি ৬ জন লোক এতিয়াও সন্ধানহীন হৈ আছে বুলি প্ৰকাশ।
