কপালত ডাঙৰ ফোট, পিন্ধনত শাৰী। সেই সাজ-পোছাকত প্ৰথম দৃষ্টিত তেওঁ প্ৰকৃততে কোন সেইটো ধৰিব পৰা নাছিল। ৰূপান্তৰকামী বা কিন্নৰৰ সাজ (Third Gender) পৰিহিত যুৱকৰ এটা দলে (group of young men) আত্মীয়ৰ পৰা ‘নেগ’ বা বকচিচ সংগ্ৰহ কৰিবলৈ এখন বিয়াত প্ৰৱেশ কৰিছিল। কিন্তু শেষ ৰক্ষা নহ’ল। অৱশেষত গাঁৱৰ মানুহ বিশেষকৈ মহিলাসকলৰ আক্ৰমণৰ সন্মুখীন হ’বলগীয়া হয় দলটো। মধ্যপ্ৰদেশৰ ছিণ্ডৱাৰা জিলাৰ (Chhindwara district of Madhya Pradesh) পৰাছিয়া অঞ্চলৰ দৰবাই গাঁৱত সংঘটিত হোৱা এই চাঞ্চল্যকৰ ঘটনাৰ এটা ভিডিঅ’ এতিয়া ছ’চিয়েল মিডিয়াত ভাইৰেল হৈ পৰিছে।
জানিব পৰা মতে, দৰবাই গাঁৱৰ এখন বিয়াত হঠাতে কিন্নৰৰ সাজ-পোছাক পৰিহিত এদল যুৱকৰ আবিৰ্ভাৱ হয়। পৰম্পৰা অনুসৰণ কৰি তেওঁলোকে পৰিয়ালটোৰ পৰা বৃহৎ পৰিমাণৰ বকচিচ দাবী কৰিবলৈ আৰম্ভ কৰে। কিন্তু তেওঁলোকৰ আচৰণ আৰু আচাৰ-ব্যৱহাৰ দেখি উপস্থিত গাঁওবাসীৰ সন্দেহ হয়। লগে লগে স্থানীয় ৰাইজে প্ৰকৃত কিন্নৰ সম্প্ৰদায়ৰ সদস্যসকলক অৱগত কৰে। যুৱককেইজনৰ পৰিচয়-পত্ৰ আৰু প্ৰকৃত চেহেৰা পৰীক্ষা কৰিবলৈ তেওঁলোক বিয়াঘৰত উপস্থিত হোৱাৰ লগে লগে প্ৰকৃত সত্যটো ওলাই পৰে। জানিব পৰা মতে, স্থানীয় যুৱকৰ এটা দলে কিন্নৰৰ অভিনয় কৰি ধন দাবীৰ ষড়যন্ত্ৰ কৰিছিল।
ইফালে এই প্ৰতাৰণাৰ খবৰ বিয়পি পৰাৰ লগে লগে বিয়াৰ আনন্দ চৰম উত্তেজনালৈ পৰিণত হয়। অনুষ্ঠানত উপস্থিত থকা মহিলাসকলৰ ক্ষোভৰ বিস্ফোৰণ ঘটে। ভাইৰেল ভিডিঅ’টোত দেখা গৈছে যে প্ৰতাৰক যুৱককেইজনক হাতে-লোতে ধৰি সকলোৰে সন্মুখত মুখা খুলি দিয়া হয়। ক্ষুব্ধ মহিলাসকলে তেওঁলোকক চৰ-ভুকু শোধাবলৈ ধৰে আৰু এটা সময়ত তেওঁলোকৰ কাপোৰবোৰো টানি খুলি পেলোৱা হয়। চাৰিওফালে চিঞৰ-বাখৰ আৰু চৰম বিশৃংখলতাৰ সৃষ্টি হয়। উপস্থিত থকা বহু লোকে নিজৰ মোবাইল কেমেৰাত সমগ্ৰ দৃশ্য বন্দী কৰে, যিটো এতিয়া ইণ্টাৰনেটত চৰ্চাৰ কেন্দ্ৰবিন্দু হৈ পৰিছে।
স্থানীয় ৰাইজে কয় যে জিলাখনত এনে প্ৰৱঞ্চনাৰ ঘটনা এয়াই প্ৰথম নহয়। আগতে এই যুৱকসকলে সাধাৰণ মানুহৰ আৱেগ আৰু বিশ্বাসৰ শোষণ কৰি বিভিন্ন বিয়া বা শুভ অনুষ্ঠানত কিন্নৰৰ ৰূপ লৈ টকা উপাৰ্জন কৰিছিল। তেওঁলোকে বহুবাৰ ৰক্ষা পৰে যদিও এইবাৰ ভাগ্য তেওঁলোকৰ পক্ষত নাছিল। অৱশ্যে এই ভাইৰেল ভিডিঅ’ আৰু ঘটনা সন্দৰ্ভত আৰক্ষীৰ কোনো আনুষ্ঠানিক বিবৃতি বা প্ৰতিক্ৰিয়া প্ৰকাশ পোৱা নাই। সমগ্ৰ বিষয়টোক লৈ এতিয়াও অঞ্চলটোত উত্তেজনা অব্যাহত আছে।
