কেন্দ্রই এইবাৰ আবকাৰী শুল্কৰ পৰা ৰেহাই (Excise duty exemption) দিলে ২২-৩০ শতাংশ ইথানল মিহলি পেট্ৰ’ল (22-30 percent ethanol blended petrol)ক৷ এই কথা বিত্ত মন্ত্ৰালয়ে এক অধিসূচনাযোগে অৱগত কৰিছে। নতুন ঘোষণা অনুসৰি, চাৰি প্ৰকাৰৰ ইন্ধন ই-২২, ই-২৫, ই-২৭ আৰু ই-৩০ৰ ওপৰত আবকাৰী শুল্ক সম্পূৰ্ণৰূপে ৰেহাই দিয়া হৈছে।
দেশত ইন্ধনৰ উদ্বেগ হ্ৰাস কৰিবলৈ ই-২০ (২০ শতাংশ ইথানল মিশ্ৰিত) ইন্ধন পূৰ্বে প্ৰৱৰ্তন কৰা হৈছিল। এইবাৰ কেন্দ্ৰই অধিক হাৰত ইথানল মিশ্ৰিত ইন্ধনৰ ব্যৱহাৰত গুৰুত্ব দিব বিচাৰিছে। শেহতীয়াকৈ ইথানলৰ অনুপাত আৰু অধিক বৃদ্ধি কৰি ই-৮৫ (৮৫ শতাংশ ইথানল মিশ্ৰিত) প্ৰৱৰ্তন কৰা হৈছে। কেন্দ্ৰীয় পেট্ৰ’লিয়াম মন্ত্ৰী হৰদীপ সিং পুৰীয়ে নিজেই দিল্লীৰ এটা পাম্পৰ পৰা ই-৮৫ ইন্ধন বিতৰণ কৰি এই পদক্ষেপ আৰম্ভ কৰে।
এনে পৰিস্থিতিত ইথানল মিহলি পেট্ৰ’লৰ ওপৰত ২২-৩০ শতাংশ পৰ্যন্ত শুল্ক ৰেহাইৰ ঘোষণাই ইন্ধনৰ ক্ষেত্ৰত কেন্দ্ৰৰ মতামত অধিক স্পষ্ট কৰি তুলিছে বুলি ধাৰণা কৰা হৈছে। এই সিদ্ধান্তৰ পৰা স্পষ্ট যে কেন্দ্ৰই ইথানল মিশ্ৰিত পেট্ৰ’লৰ ব্যৱহাৰৰ ওপৰত অধিক গুৰুত্ব দিব বিচাৰে।
উল্লেখ্য যে ভাৰতত যি ইন্ধনৰ প্ৰয়োজন হয় তাৰ অধিকাংশই আন দেশৰ পৰা আমদানি কৰিবলগা হয়। কিন্তু বৰ্তমান কেন্দ্ৰই দেশৰ বৈদেশিক মুদ্ৰাৰ মজুত সুৰক্ষাৰ ওপৰত গুৰুত্ব আৰোপ কৰিছে। সেয়েহে ইন্ধনৰ বাবে আন দেশৰ ওপৰত নিৰ্ভৰশীলতাও হ্ৰাস কৰিবলৈ কেন্দ্ৰই চেষ্টা চলাইছে। কাৰণ খাৰুৱা তেল আমদানি কৰিলে দেশৰ বৈদেশিক মুদ্ৰাৰ মজুতত হেঁচা পৰে। শেহতীয়াকৈ প্ৰধানমন্ত্ৰী নৰেন্দ্ৰ মোদীয়ে দেশবাসীক ইন্ধনৰ অপচয় হ্ৰাস কৰিবলৈ অনুৰোধ জনাইছে। তেওঁ ঘৰৰ পৰা কাম কৰি প্ৰয়োজন হ’লে ৰাজহুৱা পৰিবহণ ব্যৱহাৰ কৰাৰ পৰামৰ্শ দিছে।
বিগত এমাহত পৰ্যায়ক্ৰমে বৃদ্ধি পাইছে পেট্ৰ’ল-ডিজেলৰ মূল্য। ১৫ মে’ৰ পৰা ২৫ মে’ৰ ভিতৰত চাৰিটা পৰ্যায়ত বৃদ্ধি পাইছে ইন্ধনৰ মূল্য। ১৫ মে’ত সমগ্ৰ দেশতে পেট্ৰ’লৰ মূল্য প্ৰতি লিটাৰত তিনি টকাকৈ বৃদ্ধি পাইছিল। ইয়াৰ পিছত ১৯ মে’ত পুনৰ মূল্যবৃদ্ধি হয়। পেট্ৰ’লৰ মূল্য আৰু ৯০ পইচা বৃদ্ধি হয়। ইয়াৰ পিছত ২৩ মে’ শনিবাৰে পুনৰ ৮৭ পইচাকৈ মূল্য বৃদ্ধি কৰা হয়। তাৰ পিছত ২৫ মে’ত মূল্যবৃদ্ধিৰ আন এটা পৰ্যায় হয়। মে’ মাহৰ দ্বিতীয়াৰ্ধত ১০ দিনত পেট্ৰ’ল আৰু ডিজেলৰ মূল্য সাত টকাতকৈ অধিক বৃদ্ধি পালে। এই পৰিস্থিতিত সাধাৰণ মানুহক ইথানল মিশ্ৰিত ইন্ধন ব্যৱহাৰ কৰিবলৈ অধিক উৎসাহিত কৰিবলৈ কেন্দ্ৰই ২২-৩০ শতাংশ ইথানল মিহলি পেট্ৰ’লৰ আবকাৰী শুল্কমুক্ত কৰিলে।
