পশ্চিম এছিয়া পুনৰ উত্তপ্ত হৈ পৰিছে। ইয়াৰ পূৰ্বে আমেৰিকাৰ ৰাষ্ট্ৰপতি ড’নাল্ড ট্ৰাম্পে ইৰাণৰ (US Iran) বিৰুদ্ধে অধিক সামৰিক আক্ৰমণৰ ভাবুকি দিছিল। তাৰ পিছত বুধবাৰে মাজনিশা ইৰাণৰ ওপৰত আমেৰিকাই নতুনকৈ আক্ৰমণ আৰম্ভ কৰে। হৰমুজৰ সমীপত বাণিজ্যিক জাহাজত আক্ৰমণৰ প্ৰতিশোধ ল’বলৈ আৰম্ভ কৰিছে আমেৰিকান বাহিনীয়ে। ইৰাণৰ সংবাদ সংস্থাসমূহৰ মতে, দেশখনৰ উপসাগৰীয় উপকূলৰ সমীপৰ দক্ষিণৰ দুটা অঞ্চল বান্দাৰ আব্বাছ আৰু ছিৰিকত বিস্ফোৰণৰ শব্দ শুনা গৈছে।
আমেৰিকাৰ আক্ৰমণ প্ৰতিহত কৰিবলৈ ইৰাণী বাহিনীয়ে বান্দাৰ আব্বাছৰ ওচৰত এয়াৰ ডিফেন্স ছিষ্টেম সক্ৰিয় কৰিছে। কোনাৰাক আৰু চাবাহাৰৰ সমীপতো বিস্ফোৰণৰ শব্দ শুনা যায়। ইৰাণৰ চাবাহাৰৰ কিছু অংশত বিস্ফোৰণৰ শব্দ শুনা পোৱাৰ পিছতে বিদ্যুৎ বিচ্ছিন্ন হৈ পৰে। বুধবাৰে নিশা আমেৰিকাৰ চেণ্ট্ৰেল কমাণ্ডে ইৰাণৰ ওপৰত আক্ৰমণৰ কথা ছ’চিয়েল মিডিয়াত ঘোষণা কৰে। তেওঁলোকৰ এক্স হেণ্ডেলত লিখা আছিল, “ৰাষ্ট্ৰপতি ট্ৰাম্পৰ নিৰ্দেশত আমাৰ বাহিনীয়ে হৰমুজ প্ৰণালীত ইৰাণৰ ওপৰত আক্ৰমণ চলাইছে। তেওঁলোকৰ বিৰুদ্ধে কঠোৰ ব্যৱস্থা ল’ব লাগিব। ইৰাণৰ এই আক্ৰমণ অযুক্তিকৰ, বিপজ্জনক আৰু যুদ্ধবিৰতিৰ স্পষ্ট উলংঘা। আমেৰিকাৰ সেনাই ইয়াৰ বিৰুদ্ধে ব্যৱস্থা গ্ৰহণ কৰিছে।”
বুধবাৰে ট্ৰাম্পে এই আক্ৰমণৰ কথা ঘোষণা কৰি ইৰাণৰ সৈতে যুদ্ধবিৰতিৰ অন্ত পেলায়। পিছলৈ অৱশ্যে দেশখনৰ সৈতে হোৱা আক্রমণ আৰু প্রত্যাক্রমণৰ ফলস্বৰূপে নতুন যুদ্ধ নহ’ব বুলি কয়৷ তেওঁ বাৰে বাৰে ইৰাণক আক্ৰমণ কৰাৰ ভাবুকি দি আহিছে। কূটনৈতিক অগ্ৰগতিৰ দাবীতো তেওঁ পিছুৱাই গৈছে। বুধবাৰে ট্ৰাম্পে কয়, “আজি ৰাতি আমেৰিকাই ইৰাণক ডাঙৰ আঘাত কৰাৰ সম্ভাৱনা আছে।” যদিও তেওঁ নিজৰ বিবৃতিত স্পষ্ট কৰি দিছে, “শেহতীয়া আক্ৰমণ আৰু প্ৰত্যাক্ৰমণে কোনো দীৰ্ঘম্যাদী ৰূপ নলয়।” ট্ৰাম্পে লগতে কয়, “যি হয়, অতি সোনকালে হ’ব।” অৱশ্যে তেওঁ ইংগিত দিছিল যে আমেৰিকান সেনাই হয়তো তেওঁলোকৰ কাম একেবাৰে শেষ কৰিব পাৰিব।
মঙলবাৰে হৰমুজ প্ৰণালীত তিনিখন মালবাহী জাহাজত আক্ৰমণ কৰা হয়। ইয়াৰ পিছতে আমেৰিকাই দাবী কৰিছিল যে এই আক্ৰমণৰ আঁৰত তেহৰাণ আছে। তাৰে এখন জাহাজ ভাৰতলৈ গৈ আছিল। সেই কাণ্ডৰ কেইঘণ্টামান পিছত বুধবাৰে পুৱাৰে পৰা (স্থানীয় সময় অনুসৰি) ইৰাণৰ ওপৰত একাধিক ক্ষেপণাস্ত্ৰ আক্ৰমণৰ বাতৰি পোৱা গৈছিল। ইয়াৰ প্ৰতিশোধ হিচাপে ইৰাণে বাহৰেইন আৰু কুৱেইটত থকা আমেৰিকাৰ সামৰিক ঘাটিসমূহকো আক্ৰমণ কৰে। ইৰাণৰ বিদ্যুৎ কেন্দ্ৰ আৰু ডিচেলাইনেচন প্লাণ্টত আক্ৰমণ কৰি তেল উৎপাদন কেন্দ্ৰ ‘খাৰ্গ দ্বীপ’ অৱৰোধ কৰাৰ হুংকাৰ দিছে ট্ৰাম্পে।
তুৰস্কৰ আংকাৰাত অনুষ্ঠিত নাটোৰ সন্মিলনৰ সময়ত ট্ৰাম্পে কয়, “এই আক্ৰমণসমূহ হৰমুজ প্ৰণালীত বাণিজ্যিক জাহাজত ইৰাণৰ আক্ৰমণৰ প্ৰতিশোধ হিচাপে সংঘটিত কৰা হৈছে। আমি যোৱানিশা অধিক তীব্ৰতাৰে আঘাত কৰিলোঁ। অতি, অতি কঠিন। আজি হয়তো পুনৰ আঘাত পাব। মই তেওঁলোকক অলপ সতৰ্কবাণী দিম, আমি আজি ৰাতি তেওঁলোকক জোৰেৰে আঘাত কৰিবলৈ ওলাইছোঁ।” ট্ৰাম্পে দাবী কৰে যে ইৰাণে জাহাজসমূহত মিছাইল আৰু ড্ৰোন নিক্ষেপ কৰি আছে । তেওঁ কয়, ”তেওঁলোকে অতি বেয়া আচৰণ কৰিছে।”
আফালে ইৰাণে দাবী কৰিছে যে অন্তৱৰ্তীকালীন যুদ্ধবিৰতি চুক্তি অনুসৰি এই প্ৰণালীত যাতায়াত নিয়ন্ত্ৰণ কৰাৰ অধিকাৰ তেওঁলোকৰ আছে। শত্ৰুতা স্থায়ীভাৱে বন্ধ কৰাৰ অন্যতম মূল আলোচনাপন্থী তথা ইৰাণৰ সংসদৰ অধ্যক্ষ মহম্মদ বাঘেৰ গালিবাফে এক্স হেণ্ডেলত পোষ্ট কৰি লিখিছে, “দাদাগিৰিৰ যুগ শেষ হ’ল। ইয়াত কোনো লাভ নহ’ব। আমি শিৰ নত নকৰো।” আনহাতে, ইৰাণে এই উত্তেজনাপূৰ্ণ পৰিস্থিতি নিয়ন্ত্ৰণ কৰিবলৈ আগ্ৰহী হৈছে। মধ্যস্থতাকাৰী কাটাৰলৈ বাৰ্তা প্ৰেৰণ কৰিছে। তেহৰানে আলোচনা আৰু সমন্বয় অব্যাহত ৰখাৰ প্ৰয়োজনীয়তাৰ ওপৰত গুৰুত্ব আৰোপ কৰিছে।
