প্ৰতিবাদকাৰীৰ এটা অংশই অভিযোগ কৰে যে সাধাৰণ কাপোৰ পিন্ধি দিল্লী আৰক্ষীৰ লোকে যন্তৰ-মন্তৰৰ অনশনস্থলীত প্ৰৱেশ কৰি বলপূৰ্বকভাৱে সোণম ৱাংচুকক (Sonam Wangchuk) লৈ যায়। শনিবাৰে ককৰোচ জনতা পাৰ্টীৰ প্ৰতিষ্ঠাপক সভাপতি অভিজিৎ দীপকেয়ে ইয়াৰ প্ৰতিবাদত এইবাৰ অনিৰ্দিষ্টকালৰ বাবে অনশন অব্যাহত ৰখাৰ কথা ঘোষণা কৰে।
নীট কেলেংকাৰীৰ পিছত শিক্ষামন্ত্ৰী ধৰ্মেন্দ্ৰ প্ৰধানৰ পদত্যাগৰ দাবীত ককৰোচ জনতা পাৰ্টীয়ে যোৱা ২০ জুনৰ পৰা যন্তৰ-মন্তৰত প্ৰতিবাদ আৰম্ভ কৰিছিল। ৭ দিনৰ পাছত সোণম ৱাংচুকে আৰম্ভ কৰে অনশন। শনিবাৰে পুৱা অনশনৰ ২১ দিনত সাধাৰণ কাপোৰ পিন্ধা আৰক্ষী যন্তৰ-মন্তৰ চৌহদত উপস্থিত হয়।
অভিযোগ অনুসৰি, অনশন কৰি থকা সমাজকৰ্মী তথা শিক্ষাবিদজনক হঠাৎ ধৰ্ণা মঞ্চৰ পৰা উঠাই নি ওচৰৰ চফদৰজং চিকিৎসালয়ত ভৰ্তি কৰোৱা হয়। অভিযোগ অনুসৰি, হঠাৎ এই ব্যৱস্থা গ্ৰহণৰ ভিডিঅ’ যাতে ল’ব নোৱাৰে তাৰ বাবে আৰক্ষীয়ে অনশনস্থলী কাপোৰেৰে ঘেৰাও কৰে। ইালে চিকিৎসালয় কৰ্তৃপক্ষই জনোৱা মতে, শনিবাৰে পুৱা ৭.৪০ বজাত ৱাংচুকক ভৰ্তি কৰা হয়।
তেওঁলোকে মেডিকেল বুলেটিনত লিখিছে, “দীৰ্ঘদিন উপবাস আৰু জলশূন্যতাৰ বাবে ৱাংচুক দুৰ্বল হৈ পৰিছে। যদিও বৰ্তমান তেওঁৰ অৱস্থা সুস্থিৰ, তথাপিও তেওঁৰ শাৰীৰিক সূচকসমূহ স্বাভাৱিক অৱস্থালৈ ঘূৰাই আনিবলৈ নিয়মীয়াকৈ পৰ্যবেক্ষণ, তীক্ষ্ণ নিৰীক্ষণ আৰু চিকিৎসাৰ প্ৰয়োজন।”
আৰক্ষীয়ে দাবী কৰিছে যে ৱাংচুকৰ শাৰীৰিক অৱস্থা ক্ৰমান্বয়ে অৱনতি ঘটাত দিল্লী উচ্চ ন্যায়ালয়ৰ নিৰ্দেশত এই পদক্ষেপ গ্ৰহণ কৰা হৈছে। ইয়াৰ লগতে দিল্লী আৰক্ষীয়ে প্ৰতিবাদকাৰীসকলক যন্তৰ-মন্তৰৰ চৌহদ খালী কৰিবলৈও অনুৰোধ জনাইছে। উল্লেখ্য যে বৃহস্পতিবাৰে দিল্লী উচ্চ ন্যায়ালয়ে অনশন কাৰ্যসূচীত অৱতীৰ্ণ হৈ থকা সোণমৰ জীৱন ৰক্ষাৰ বাবে যি কৰিব লাগে সেয়া কৰিবলৈ কেন্দ্ৰক নিৰ্দেশ দিছিল।
দিল্লী উচ্চ ন্যায়ালয়ৰ মুখ্য ন্যায়াধীশ দেৱেন্দ্ৰ কুমাৰ উপাধ্যায় আৰু ন্যায়াধীশ তেজস কাৰিয়াৰ বিচাৰপীঠে এই নিৰ্দেশত উল্লেখ কৰিছিল যে ৱাংচুকৰ স্বাস্থ্য দৈনিক চৰকাৰী চিকিৎসকৰ দ্বাৰা পৰীক্ষা কৰিব লাগে। যদিহে চিকিৎসকৰ প্ৰতিবেদনৰ ভিত্তিত চিকিৎসাৰ প্ৰয়োজন হয়, তেন্তে সেই ক্ষেত্ৰত কেন্দ্ৰই ব্যৱস্থা ল’ব লাগিব।
কেন্দ্ৰীয় গৃহমন্ত্ৰী অমিত শ্বাহৰ মন্ত্ৰালয়ৰ দ্বাৰা পৰিচালিত দিল্লী আৰক্ষীয়ে এই নিৰ্দেশৰ দুদিনৰ ভিতৰতে ব্যৱস্থা গ্ৰহণ কৰে। ইফালে পূৰ্বৰ ঘোষণা অনুসৰি নীটৰ প্ৰশ্নকাকত ফাদিলৰ প্ৰতিবাদত সোমবাৰে দিল্লীত এক সমাবেশ আৰু সমদল উলিয়াব বুলি চিজেপিৰ মুৰব্বী অভিজিতে প্ৰকাশ কৰে।
