কেন্দ্ৰীয় শিক্ষামন্ত্ৰী ধৰ্মেন্দ্ৰ প্ৰধানৰ পদত্যাগৰ লগে লগে যন্তৰ-মন্তৰৰ আন্দোলনো স্তব্ধ হৈ পৰিছে। এনে পৰিস্থিতিত বুধবাৰে চিজেপিৰ শীৰ্ষ নেতা (Top leader of CJP)সকলে বৈঠকত (Meeting) মিলিত হৈ ককৰোচ জনতা পাৰ্টীৰ পৰৱৰ্তী কাৰ্যসূচী (Next schedule) কি হ’ব তাৰ সিদ্ধান্ত গ্ৰহণ কৰিব। পিটিআইৰ সূত্ৰ অনুসৰি, মহাৰাষ্ট্ৰৰ সম্ভাজীনগৰত চিজেপিৰ প্ৰতিষ্ঠাপক অভিজিত দীপকেৰ ঘৰত অনুষ্ঠিত হ’ব এই বৈঠক।
বিগত কেইবছৰমানৰ পৰা দেশৰ বিভিন্ন প্ৰান্তত প্ৰশ্নকাকত ফাদিল হোৱাৰ অভিযোগ উত্থাপন হৈছে। এই পৰীক্ষাসমূহৰ কিছুমান ৰাজ্যিক পৰ্যায়ত আয়োজন কৰা হয়, যাৰ সৈতে কেন্দ্ৰৰ কোনো প্ৰত্যক্ষ সম্পৰ্ক নাই। বিজেপিৰ ক্ষমতা নথকা ৰাজ্যসমূহতো প্ৰশ্নকাকত ফাদিল হোৱাৰ অভিযোগ উত্থাপন হৈছে। তাৰ ভিতৰত পঞ্জাব অন্যতম। সেই ক্ষেত্ৰত পঁইতাচোৰা পাৰ্টীয়ে কেৱল নীট (NEET) প্ৰশ্নকাকত ফাদিলৰ বিৰুদ্ধেহে মাত মাতিছে বুলি শেহতীয়াকৈ বিভিন্ন মহলত প্ৰশ্ন উত্থাপন হৈছে। পঞ্জাবৰ প্ৰেক্ষাপটত পঁইতাচোৰাৰ মৌনতাক লৈ দীপকেও প্ৰশ্নৰ সন্মুখীন হ’বলগীয়া হৈছে। অৱশ্যে তেওঁ কৈছে যে পঞ্জাৱৰ বিষয়টোও তেওঁলোকৰ দৃষ্টিগোচৰ হৈছে। সেই বিষয়ে তেওঁলোকে মাত মাতিব বুলিও কয়। যন্তৰ-মন্তৰত প্ৰতিবাদ প্ৰত্যাহাৰ কৰাৰ পিছত চিজেপিৰ প্ৰতিষ্ঠাপকগৰাকীয়ে কয়, “আমাৰ পৰৱৰ্তী কাৰ্যসূচী অতি সোনকালে ঘোষণা কৰিম। আমাক কিছু সময় দিয়ক।”
অৰাজনৈতিক সংগঠন চিজেপিৰ আহ্বানত একেৰাহে ৩৬ দিন ধৰি দিল্লীৰ যন্তৰ-মন্তৰত ছাত্ৰ-ছাত্ৰী আৰু যুৱক-যুৱতীসকলে প্ৰতিবাদ সাব্যস্ত কৰে। সূত্ৰ অনুসৰি, দীৰ্ঘদিনীয়া প্ৰতিবাদৰ অন্তত চিজেপি কৰ্মী আৰু স্বেচ্ছাসেৱকসকলক পৰিয়ালৰ সৈতে ঘৰতে কিছু সময় কটাবলৈ পৰামৰ্শ দিয়া হয়। লগতে ছাত্ৰ-ছাত্ৰীসকলৰ সৈতে কথা পাতি তেওঁলোকৰ মতামত আৰু পৰামৰ্শ ল’বলৈ কোৱা হয়। সূত্ৰৰ পৰা জানিব পৰা মতে, বুধবাৰৰ বৈঠকত ছাত্ৰ-ছাত্ৰীৰ পৰা পোৱা পৰামৰ্শ আৰু প্ৰস্তাৱৰ সবিশেষ দিবলৈ কোৱা হৈছে।
পিটিআইৰ সূত্ৰ অনুসৰি, বুধবাৰে বৈঠকৰ পিছত চিজেপিয়ে সংবাদমেল অনুষ্ঠিত কৰিব পাৰে। সংগঠনটোৰ পৰৱৰ্তী কাৰ্যসূচীৰ ৰূপৰেখা উক্ত সংবাদমেলৰ পৰাই ঘোষণা কৰিব পাৰে।
দিল্লীত ছাত্ৰ-ছাত্ৰী আৰু যুৱক-যুৱতীসকলৰ অবিৰত আন্দোলনৰ হেঁচাত ধৰ্মেন্দ্ৰ প্ৰধানে কেন্দ্ৰীয় শিক্ষামন্ত্ৰী পদৰ পৰা পদত্যাগ কৰিবলগীয়া হয়। এইটোৱেই আছিল আন্দোলনকাৰী ছাত্ৰ-ছাত্ৰী আৰু যুৱক-যুৱতীসকলৰ মূল দাবী। কিন্তু এই প্ৰতিবাদত দেশৰ যুৱক-যুৱতীসকলে স্বতঃস্ফূৰ্তভাৱে অংশগ্ৰহণ কৰাৰ আঁৰত প্ৰশ্নকাকত ফাদিল হোৱাটোৱেই একমাত্ৰ কাৰণ নহয়। বহুতৰ মতে ইয়াৰ আঁৰত দীৰ্ঘদিনীয়া ক্ষোভ আছে। অভিযোগ উত্থাপন হৈছে যে প্ৰতি বছৰে বিভিন্ন মহাবিদ্যালয়-বিশ্ববিদ্যালয়ৰ পৰা যিমান সংখ্যক ছাত্ৰ-ছাত্ৰী ডিগ্ৰী লৈ স্নাতক হৈছে, সিমান সংখ্যাত চাকৰিৰ সুবিধা বৃদ্ধি হোৱা নাই। ইয়াৰ লগতে বৃদ্ধি পোৱা ইন্ধনৰ মূল্য আৰু বৰ্ধিত সামগ্ৰীৰ মূল্যই অনুঘটকৰ দৰে যোগ দিছে। এনে পৰিস্থিতিত চিজেপিয়ে তেওঁলোকৰ পৰৱৰ্তী কাৰ্যসূচী কি ঘোষণা কৰিব সেই বিষয়েও কৌতুহল বাঢ়িছে।
