চলিত বানত ৰাজ্যত (Assam Flood) মৃত্যুৰ সংখ্যা ৯৫ জনলৈ বৃদ্ধি (death toll rise to 95) পাইছে। বুধবাৰে উদ্ধাৰ হয় ৬ জন লোকৰ মৃতদেহ৷ আনহাতে, ১৪ খন জিলাত এতিয়ালৈকে বানত ক্ষতিগ্ৰস্ত হৈছে ১ লাখ ৬০ হাজাৰ লোক। অসম ৰাজ্যিক দুৰ্যোগ প্ৰশমন বিভাগৰ বুধবাৰৰ নিশাৰ দৈনিক বান বুলেটিনত এই কথা প্ৰকাশ।
তথ্য অনুসৰি, বুধবাৰে শিৱসাগৰ আৰু বিশ্বনাথ জিলাত ২জনকৈ লোকৰ বানত মৃত্যু হোৱাৰ বিপৰীতে গোলাঘাট আৰু মৰিগাঁৱত এজনকৈ লোকৰ মৃত্যু হৈছে।
শেহতীয়া তথ্য মতে, বান অধ্যুষিত বিশ্বনাথ, চৰাইদেউ, দৰং, ধেমাজি, গোলাঘাট, যোৰহাট, কামৰূপ মহানগৰ, কাৰ্বি আংলং, লখিমপুৰ, নগাঁও, শিৱসাগৰ, শোণিতপুৰ, তিনিচুকীয়া আৰু ওদালগুৰি জিলাৰ ৩৮ টা ৰাজহ চক্ৰৰ ৫৬৩ খন গাঁও বানৰ কৱলত পৰিছে।
আনহাতে, ১৬,৯৫১.৭৬ হেক্টৰ শস্যভূমিৰ শস্য বিনষ্ট হোৱাৰ লগতে ৩৫,০২৫ টা পশুধন ক্ষতিগ্ৰস্ত হৈছে। ইয়াৰ উপৰি বানত উটি গৈছে ৮,৫২৯ টা পশুধন। আটাইতকৈ বেছি ক্ষতিগ্ৰস্ত শিৱসাগৰত ৫৭ হাজাৰৰো অধিক লোক বানত আক্ৰান্ত হোৱাৰ বিপৰীতে গোলাঘাটত ৩৪,০০০ আৰু যোৰহাট জিলাত ২৫,০০০ লোক বানৰ কৱলত পৰিছে।
