কেৱল গুৱাহাটী, যোৰহাট, ডিব্ৰুগড় আদি ভৈয়ামৰ চহৰতে নহয়, এইবাৰ কৃত্ৰিম বানত (Artificial flood) ককবকাইছে কাৰ্বি আংলঙো (Karbi Anglong)। কাৰ্বি আংলঙৰ ধনশিৰি অঞ্চল এইবাৰ কৃত্ৰিম বানৰ কৱলত পৰিছে। প্ৰবল বৃষ্টিপাতৰ ফলত জমা হোৱা বৰষুণৰ পানীয়ে বুৰাই পেলালে জিলাখনৰ ধনশিৰি বজাৰ অঞ্চলৰ ৰে’লৱে কল’নীৰ ১২ টাকৈ গৃহ। বৰষুণৰ ফলত জমা হোৱা পানী ওলাই যোৱাৰ সঠিক ব্যৱস্থা নথকাৰ ফলতে অঞ্চলটোৰ কেইবাটাও পৰিয়াল ক্ষতিগ্ৰস্ত হয়।
আনহাতে, কৃত্ৰিম বানৰ পানী তাৎক্ষণিকভাৱে ঘৰৰ ভিতৰত প্ৰৱেশ কৰাৰ ফলত কোনো লোকেই নিজৰ বয়-বস্তু বাহিৰ কৰিবলৈ সক্ষম নহ’ল। অৱশ্যে ধনশিৰি নগৰ সমিতিয়ে পানী নিষ্কাশনৰ ব্যৱস্থা হাতত লৈছে। বন্ধ হৈ থকা নলাবোৰ এক্সকেভেটৰৰ দ্বাৰা পৰিষ্কাৰ কৰি পানী নিষ্কাশনৰ ব্যৱস্থা ধনশিৰি নগৰ সমিতিয়ে গ্ৰহণ কৰিছে।
