উৎকোচ আৰু জালিয়াতিৰ অভিযোগ (Bribery and fraud charges)ত উদ্যোগপতি গৌতম আদানী (Entrepreneur Gautam Adani)ৰ বিৰুদ্ধে গোচৰ খাৰিজ (Dismissal of case) কৰিছে আমেৰিকাৰ আদালতে (American court)। সোমবাৰে (স্থানীয় সময় অনুসৰি) ব্ৰুকলিনত আমেৰিকাৰ জিলা ন্যায়াধীশে এই সিদ্ধান্ত ঘোষণা কৰে। অৱশ্যে আমেৰিকাৰ ন্যায় বিভাগে গোচৰ খাৰিজ কৰাৰ সিদ্ধান্তক লৈ তেওঁ প্ৰশ্ন উত্থাপন কৰে। ন্যায়াধীশগৰাকীৰ মতে, বিষয়টো “উদ্বেগজনক”।
মে’ মাহত ৰাজহুৱা হৈছিল যে আমেৰিকা প্ৰশাসনে আদানীৰ বিৰুদ্ধে গোচৰটো আগবঢ়াই নিব নিবিচাৰে। ব্ৰুকলিনৰ এখন আদালতত চৰকাৰী অভিযুক্তই আদানীৰ বিৰুদ্ধে উৎকোচৰ গোচৰ খাৰিজ কৰিবলৈ এক অভূতপূৰ্ব অনুৰোধ জনায়। যদিও ন্যায়াধীশে এই কথাত সন্মতি দিছিল, তথাপিও তেওঁ গোচৰটোৰ ওপৰত কিছু প্ৰশ্ন উত্থাপন কৰিছিল। ২০২৪ চনৰ নৱেম্বৰৰ ভিতৰত আদানীয়ে আমেৰিকাত ১ বিলিয়ন মাৰ্কিন ডলাৰ বিনিয়োগ কৰাৰ প্ৰতিশ্ৰুতিৰ ভিত্তিত এই সিদ্ধান্ত লোৱা হৈছে নেকি সেয়াও তেওঁ জানিব বিচাৰিছিল।
সোমবাৰে ন্যায়াধীশ নিকোলাছ গাৰাউইয়ে আদানীৰ বিৰুদ্ধে গোচৰ খাৰিজ কৰি কয় যে তেওঁ বিশ্বাস নকৰে যে এই বিনিয়োগে ন্যায় বিভাগৰ সিদ্ধান্তত প্ৰভাৱ পেলাইছে। এই গোচৰত তেওঁ সোঁৱৰাই দিয়ে যে এজন ন্যায়াধীশৰ ৰাজহুৱা অভিযুক্তৰ সিদ্ধান্ত পুনৰীক্ষণ কৰাৰ ক্ষমতা সীমিত। আদানীক প্ৰতিনিধিত্ব কৰা অধিবক্তাসকলৰ সৈতে আলোচনা কৰি গোচৰটো নিষ্পত্তি কৰাৰ সিদ্ধান্ত লোৱাৰ বাবে সহকাৰী ৰাজহুৱা অভিযুক্ত ট্ৰেণ্ট মেককটাৰক সমালোচনা কৰে ন্যায়াধীশগৰাকীয়ে। ইয়াৰ পূৰ্বে ব্ৰুকলিন আদালতে আমেৰিকাৰ ন্যায় বিভাগক এই গোচৰটো নিষ্পত্তি কৰিবলৈ কিয় এই সিদ্ধান্ত লোৱা হৈছে সেই বিষয়ে জানিবলৈ অনুৰোধ জনাইছিল। ইয়াৰ উত্তৰ দিবলৈ ১৩ জুলাইলৈকে সময় দিয়া হৈছিল।
অৱশ্যে উৎকোচ গোচৰ খাৰিজ কৰাৰ সিদ্ধান্তক আদানি গ্ৰুপৰ মুৰব্বী গৌতম আদানীয়ে আদৰণি জনায়। সোমবাৰে মাজনিশা ছ’চিয়েল মিডিয়াত এটা পোষ্টত তেওঁ লিখিছে, “আমি আমেৰিকাৰ আদালতৰ সিদ্ধান্তক নম্ৰতা আৰু গভীৰ সন্মানেৰে আদৰণি জনাইছো। সংকটৰ সময়তো আমি সততা, স্বচ্ছতা আৰু আইনৰ শাসনৰ ওপৰত নিৰ্ভৰ কৰি আহিছো।” আদানীয়ে গোচৰৰ সময়ত তেওঁক বিশ্বাস কৰাসকলকো ধন্যবাদ জ্ঞাপন কৰে।
উল্লেখযোগ্য যে আদানী গ্ৰুপৰ মালিকানাধীন ‘আদানি গ্ৰীণ এনাৰ্জি লিমিটেড’ (এজিএল)-এ অন্ধ্ৰপ্ৰদেশকে ধৰি ভাৰতৰ কেইবাখনো ৰাজ্যৰ চৰকাৰী বিষয়াক (মন্ত্ৰী আৰু জনপ্ৰতিনিধিকে ধৰি) বজাৰ মূল্যতকৈ অধিক মূল্যত সৌৰশক্তিৰ বিক্ৰীৰ বাবে কোটেচন লাভ কৰিবলৈ উৎকোচ দিয়াৰ অভিযোগ উত্থাপন হৈছে। উৎকোচৰ ধনৰাশি ২৬.৫ কোটি ডলাৰ (২০২৯ কোটি টকা) বুলি দাবী কৰা হৈছে। এই তিনিটা অভিযোগৰ ভিত্তিত ২০২৪ চনত আমেৰিকাৰ ন্যায় বিভাগ আৰু বজাৰ নিয়ন্ত্ৰক এছ ই চিয়ে (চিকিউৰিটিজ এণ্ড এক্সচেঞ্জ কমিছন) ক্ৰমে অপৰাধমূলক আৰু দেৱানী অভিযোগ দাখিল কৰিছিল, যাৰ ভিত্তিত গোচৰ ৰুজু কৰা হৈছিল। আদানি গ্ৰুপে অৱশ্যে তেওঁলোকৰ বিৰুদ্ধে উত্থাপিত অভিযোগ সদায় অস্বীকাৰ কৰি আহিছে।
ড’নাল্ড ট্ৰাম্প দ্বিতীয়বাৰৰ বাবে আমেৰিকাৰ ৰাষ্ট্ৰপতি হোৱাৰ পিছত আমেৰিকাৰ ন্যায় বিভাগে ‘হাই-প্ৰফাইল’ অভিযুক্তৰ নামৰ সৈতে জড়িত কেইবাটাও গোচৰ খাৰিজ কৰিবলৈ অনুৰোধ জনাইছে। প্ৰায় দুবছৰ ধৰি চলি থকা আদানীৰ বিৰুদ্ধে উৎকোচ গোচৰটোও সেই তালিকাত সংযোজন হ’ল।
