ছোনিয়া গান্ধীৰ আত্মজীৱনী (Sonia Gandhi Autobiography) ‘Belonging: A Journey of Love’ ভাৰতত প্ৰকাশ নকৰাৰ সিদ্ধান্তক সমালোচনা কৰিছে কংগ্ৰেছে। তেওঁলোকে দাবী কৰে যে এনে সিদ্ধান্ত ‘বাক স্বাধীনতাক হত্যা কৰা’ৰ সমান। ‘পেংগুইন প্ৰকাশন’ বিক্ৰী হৈ যোৱাৰ অভিযোগো উত্থাপন হৈছে।
শুকুৰবাৰে প্ৰকাশন প্ৰতিষ্ঠান পেংগুইনে এক বিবৃতি প্ৰকাশ কৰি কয় যে তেওঁলোক ভাৰতত ছোনিয়া গান্ধীৰ আত্মজীৱনীৰ প্ৰকাশক নহয়। লোকসভাত বিৰোধী দলৰ নেতা তথা কংগ্ৰেছৰ সাংসদ গৌৰৱ গগৈয়ে এই বক্তব্যক অতি ‘দুৰ্বল’ বুলি কটাক্ষ কৰে। তেওঁ দাবী কৰে, “আৰ এছ এছ (ৰাষ্ট্ৰীয় স্বয়ংসেৱক সংঘ)ৰ ওপৰত লিখা কেইবাখনো গ্ৰন্থ প্ৰকাশ কৰাত পেংগুইন ইণ্ডিয়াৰ কোনো আপত্তি নাই। কিন্তু ছোনিয়া গান্ধীৰ আত্মজীৱনী প্ৰকাশ কৰিবলৈ সক্ষম নহয়।” তেওঁ অভিযোগ কৰে যে বিজেপি চৰকাৰে ভয়তে এই গ্ৰন্থখন ভাৰতত প্ৰকাশ বন্ধ কৰিবলৈ চেষ্টা কৰিছে।
মধ্যপ্ৰদেশৰ প্ৰাক্তন মুখ্যমন্ত্ৰী তথা কংগ্ৰেছ নেতা কমল নাথে একেদৰে পেংগুইনক আক্ৰমণ কৰে। তেওঁৰ মতে, “ছোনিয়া গান্ধীৰ দৰে জ্যেষ্ঠ ৰাজনীতিবিদে কি লিখিব আৰু কি নিলিখে, সেইটো এটা প্ৰকাশন গোষ্ঠীয়ে সিদ্ধান্ত ল’বনে?” কংগ্ৰেছৰ জ্যেষ্ঠ নেতাগৰাকীয়ে পেংগুইন সন্দৰ্ভত এই সিদ্ধান্তৰ আঁৰত কিবা ‘চাপ’ আছে নেকি সেই সন্দৰ্ভতো সন্দেহ প্ৰকাশ কৰে। ৰাজস্থানৰ প্ৰাক্তন মুখ্যমন্ত্ৰী তথা কংগ্ৰেছৰ জ্যেষ্ঠ নেতা অশোক গেহলটে উত্থাপন কৰিছে একে অভিযোগ। তেওঁ দাবী কৰে যে ‘(নৰেন্দ্ৰ) মোদী, আৰএছএছ আৰু মোদীৰ কাৰ্যকালত চীনে ভাৰতৰ ভূখণ্ড দখল কৰা’ আদি অংশ বাদ দিবলৈ পেংগুইন ইণ্ডিয়াৰ ওপৰত হেঁচা প্ৰয়োগ কৰা হৈছিল। সৰ্বভাৰতীয় যুৱ কংগ্ৰেছে পেংগুইনৰ দৰে প্ৰকাশন প্ৰতিষ্ঠান বিক্ৰী হোৱা বুলি অভিযোগ উত্থাপন কৰিছে।
শুকুৰবাৰে পুৱা ইণ্ডিয়ান এক্সপ্ৰেছ কাকতত প্ৰকাশিত এক প্ৰতিবেদনত কোৱা হৈছে যে পেংগুইন ইণ্ডিয়াই ছোনিয়া গান্ধীৰ আত্মজীৱনীৰ পাণ্ডুলিপিৰ কিছু অংশ কিছু পৰিৱৰ্তন আৰু কাটি পেলোৱাৰ প্ৰস্তাৱ দিছিল যদিও কংগ্ৰেছ নেত্ৰীগৰাকীয়ে সেই কথাত সন্মতি নিদিয়াৰ পিছত তেওঁলোকে পিছুৱাই যায়। অৱশ্যে পেংগুইনে নিজৰ বিবৃতিত এই দাবীক মিছা বুলি অভিহিত কৰিছে।
ছোনিয়াৰ আত্মজীৱনীখন ১০ নৱেম্বৰত বিশ্বজুৰি মুক্তি পোৱাৰ কথা। যোৱা সপ্তাহত কংগ্ৰেছ সংসদীয় দলৰ অধ্যক্ষগৰাকীয়ে ছ’চিয়েল মিডিয়াত লিখিছিল, “মোৰ পৰিয়ালৰ বিষয়ে বহু কথা লিখা হৈছে। পৰিয়ালটোৰ মানৱীয় অনুভৱ, কৰ্ম আৰু উদ্দেশ্যৰ সত্যৰ ওচৰলৈ অতি কমসংখ্যক লোকহে আহিছে।” ছোনিয়াৰ আত্মজীৱনী প্ৰকাশৰ দায়িত্বত থকা আমেৰিকাৰ পেংগুইন ৰেণ্ডম হাউছৰ আলফ্ৰেড এ নপফেও ১০ নৱেম্বৰৰ কথা ঘোষণা কৰে। কিন্তু শুকুৰবাৰে তেওঁলোকৰ ভাৰতীয় শাখাই কয় যে ভাৰতত প্ৰকাশিত ছোনিয়াৰ আত্মজীৱনী তেওঁলোকে প্ৰকাশ নকৰে। অৱশ্যে পেংগুইন ইণ্ডিয়াই গ্ৰন্থখন প্ৰকাশৰ বাবে আগ্ৰহী বুলি স্বীকাৰ কৰে। লেখকসকলে প্ৰদান কৰা তথ্যসমূহ পৰীক্ষা কৰি প্ৰয়োজনীয় সংশোধন আৰু পুনৰীক্ষণৰ পৰামৰ্শ দিয়াটো তেওঁলোকৰ দায়িত্ব বুলিও কয়।
পেংগুইন ইণ্ডিয়াই প্ৰত্যাহাৰ কৰাৰ লগে লগে ছোনিয়াৰ আত্মজীৱনী ভাৰতত প্ৰকাশৰ দায়িত্ব কোনে ল’ব সেই সম্পৰ্কে জল্পনা-কল্পনাৰ সৃষ্টি হৈছে। কেইবাটাও কোম্পানীৰ নামো সম্ভাৱ্য প্ৰকাশক হিচাপে আত্মপ্ৰকাশ কৰিছে। এতিয়া লক্ষণীয় হ’ব কোনটো প্ৰকাশন গোষ্ঠীয়ে ছোনিয়াৰ আত্মজীৱনী প্ৰকাশ কৰে।
