ৰাষ্ট্ৰীয় স্বয়ংসেৱক সংঘৰ মুৰব্বী (RSS Head) মোহন ভাগৱত (Mohan Bhagawat)ৰ নিউয়ৰ্কৰ (NewYork) অনুষ্ঠান আয়োজন কৰা সংস্থা আমেৰিকান হিন্দুছ ফৰ এংগেজমেণ্ট এণ্ড ডাইলগৰ (AHEAD) ব্লক কৰা এক্স হেণ্ডেল বৃহস্পতিবাৰে পুনৰুদ্ধাৰ (Ex handle recovered on Thursday) কৰা হয়। সংস্থাটোৱে দাবী কৰিছিল যে বিৰোধীয়ে অসৎ উদ্দেশ্যত এক্সৰ এলগৰিডিমক প্ৰভাৱিত কৰিবলৈ চেষ্টা কৰিছিল আৰু তেওঁলোকৰ এক্স হেণ্ডেলক ‘বট’ (এবিধ বিশেষ ছফ্টৱেৰ বা প্ৰ’গ্ৰেম যিয়ে মানুহৰ হস্তক্ষেপ অবিহনে ইণ্টাৰনেটত স্বয়ংক্ৰিয়ভাৱে কিছুমান কাম কৰিব পাৰে) ব্যৱহাৰ কৰি ব্লক কৰিছিল।
উল্লেখ্য যে শনিবাৰে (২৯ আগষ্ট) নিউয়ৰ্কৰ মানহাটানত ভাগৱতৰ বৈঠক অনুষ্ঠিত হোৱাৰ কথা। মেডিচন স্কোৱাৰ গাৰ্ডেনত অনুষ্ঠিত হ’বলগা এই অনুষ্ঠানৰ নাম ‘ইউনিভাৰ্চেল ৱাননেছ চেলিব্ৰেচন’। ইতিমধ্যে ভাগৱতৰ বৈঠকক লৈ বিতৰ্কৰ সৃষ্টি হৈছে। নিউয়ৰ্কৰ ভাৰতীয় মূলৰ মেয়ৰ জোহৰাব মামদানীয়ে বুধবাৰে ৰাজহুৱাভাৱে উল্লেখ কৰিছিল যে তেওঁৰ স্বয়ংসেৱক সংঘৰ অনুষ্ঠানৰ আয়োজনত আপত্তি আছে। অৱশ্যে মামদানীয়ে কয় যে নিউয়ৰ্ক চহৰ প্ৰশাসনৰ এই অনুষ্ঠান বাতিল কৰাৰ কৰ্তৃত্ব নাই।
১৯২৫ চনত গঠন হোৱা আৰ এছ এছৰ শতবাৰ্ষিকী উদযাপনৰ কাৰ্যসূচী চলি আছে। ইয়াৰ অংশ হিচাপে ভাগৱতে বিদেশতো বিভিন্ন সভাত ভাষণ দিব। এই কাৰ্যসূচীৰ বাবে মঙলবাৰে তেওঁ নিউয়ৰ্কত উপস্থিত হয়। আমেৰিকাৰ উপৰি তেওঁৰ কানাডা আৰু ব্ৰিটেইনতো সংঘৰ শতবাৰ্ষিকী উদযাপনৰ কাৰ্যসূচী আছে। বিভিন্ন দেশত বসবাস কৰা হিন্দু সম্প্ৰদায়ৰ উদ্যোগত এই কাৰ্যসূচী আয়োজন কৰা হৈছে।
এই পৰিস্থিতিত বৃহস্পতিবাৰে ইণ্টাৰনেটত ‘এহেড’ৰ এক্স হেণ্ডেল অস্থায়ীভাৱে ব্লক কৰাক লৈ বিতৰ্ক বিয়পি পৰে। কিন্তু দ্ৰুতগতিত পুনৰুদ্ধাৰ হোৱাৰ লগে লগে ভাগৱতৰ কাৰ্যসূচী আয়োজন কৰা সংস্থাটোৱে এক্সৰ গ্ৰাহক সেৱা আৰু সহায়ক দল ‘এক্স ছাপ’ৰ্ট’ক ধন্যবাদ জনায়। ইয়াৰ লগতে ছ’চিয়েল মিডিয়াত তেওঁলোকৰ সতৰ্কবাণী, “আমাৰ বিৰোধীসকল এতিয়াও সক্ৰিয়।”
