এনচিপিআইৰ সাংসদ ইউছুফ পাঠানে (Yusuf Pathan) নিজৰ ঘৰৰ কাষতে থকা বিতৰ্কিত মাটি ‘উপহাৰ’ হিচাপে লাভ কৰে। বিজেপি চৰকাৰে গুজৰাটৰ বদোদৰাত থকা তেওঁৰ ঘৰৰ গাতে লাগি থকা ৯৭৮ বৰ্গমিটাৰ মাটিৰ আধাতকৈও অধিক (৫০০ বৰ্গমিটাৰ) ইউছুফ পাঠানক উপহাৰ হিচাপে দিছে। আৰু বাকী থকা ৪৭৮ বৰ্গমিটাৰ মাটি তেওঁ বৰ্তমানৰ বজাৰ মূল্যৰ ৫৫ শতাংশত ক্ৰয় কৰিছিল। ইয়াৰ পূৰ্বে ইউছুফ পাঠানৰ বিৰুদ্ধে বদোদৰা পৌৰসভাৰ মালিকানাধীন ৯৭৮ বৰ্গমিটাৰ মাটি বলপূৰ্বকভাৱে দখল কৰাৰ অভিযোগ উত্থাপন হৈছিল। পৌৰসভাই অভিযোগ কৰে যে তেওঁ সেই মাটিত দেৱাল স্থাপন কৰি মাটিখিনি নিজৰ সম্পত্তি হিচাপে ব্যৱহাৰ কৰিছিল, যিটো অবৈধ। কিন্তু ২০১২ চনত পৌৰসভা কৰ্তৃপক্ষই ইউছুফ পাঠানক প্ৰস্তাৱ দিছিল যে প্ৰাক্তন ক্ৰিকেটাৰগৰাকীয়ে মাটিখিনি কিনিব লাগে। ইয়াৰ বাবে কোনো নিলাম নহ’ব। লগতে প্ৰতি বৰ্গমিটাৰত ৫৭,২৭০ টকা দিবলৈও প্ৰস্তাৱ আগবঢ়ায়। কিন্তু গুজৰাট চৰকাৰে ২০১৪ চনত পৌৰসভাৰ অনুমোদন বাতিল কৰে। তদানীন্তন বিজেপিৰ কাউন্সিলাৰ বিজয় পাৱাৰে ইউছুফ পাঠানে অবৈধভাৱে মাটি দখল কৰাৰ অভিযোগ উত্থাপন কৰিছিল।
সোমবাৰে বদোদৰা পৌৰ আয়ুক্ত অৰুণ মহেশ বাবুৱে কয় যে ভাৰতৰ প্ৰাক্তন ক্ৰিকেটাৰ ইউছুফ পাঠানে নিজৰ ঘৰৰ গাতে লাগি থকা মাটিখিনি বিচাৰিছিল। শেহতীয়াকৈ চৰকাৰে তেওঁৰ আবেদনত অনুমোদন জনাইছে। অৱশ্যে ইউছুফ পাঠানৰ হাতত মাটিখিনি কেনেদৰে গতাই দিয়া হ’ব সেয়া এতিয়াও চূড়ান্ত হোৱা নাই। পৌৰসভাৰ স্থায়ী সমিতি আৰু সাধাৰণ সভাৰ বৈঠকত এই বিষয়ে আলোচনা কৰা হ’ব বুলি জনোৱা হৈছে।
বিধানসভা নিৰ্বাচনৰ পিছত বেহৰামপুৰৰ সাংসদ ইউছুফ পাঠানে তৃণমূল কংগ্ৰেছ ত্যাগ কৰি অচিনাকি দল এনচিপিআইত যোগদান কৰে। তেওঁৰ সৈতে যোগ দিয়ে সুদীপ বেনাৰ্জী, কাকলি ঘোষ দস্তিদাৰকে ধৰি ১৯জন সাংসদে। এনচিপিআইৰ এই ২০ জন সাংসদ এতিয়া কেন্দ্ৰত শাসকীয় মিত্ৰজোঁট এনডিএৰ সদস্য। কিন্তু এতিয়ালৈকে লোকসভাৰ অধ্যক্ষই তেওঁলোকক এনচিপিআইৰ সাংসদ হিচাপে স্বীকৃতি দিয়া নাই। ফলত ৰাজনৈতিক মহলত প্ৰশ্ন উত্থাপন হৈছে যে গুজৰাটৰ বিজেপি চৰকাৰে তৃণমূল কংগ্ৰেছ ত্যাগ কৰাৰ বাবেই ইউছুফ পাঠানক মাটি উপহাৰ দিলে নেকি?
এই বিতৰ্কিত ভূমিক লৈ প্ৰায় ১৪ বছৰ ধৰি গুজৰাট চৰকাৰ আৰু বদোদৰা পৌৰসভাৰ সৈতে ইউছুফ পাঠানৰ বিবাদ চলি আছিল। উক্ত মাটি দখল কৰাৰ বাবে গুজৰাট উচ্চ ন্যায়ালয়েও বেহৰামপুৰৰ সাংসদগৰাকীক দোষী সাব্যস্ত কৰিছিল।
২০২৪ চনৰ লোকসভা নিৰ্বাচনত ২২ গজৰ ‘পিঞ্চ হিটাৰ’গৰাকীয়ে বংগৰ বেহৰামপুৰ সমষ্টিৰ পৰা তৃণমূলৰ টিকটত প্ৰতিদ্বন্দ্বিতা কৰিছিল। বিদায়ী কংগ্ৰেছ সাংসদ অধীৰ চৌধুৰীক পৰাস্ত কৰি তেওঁ সাংসদ হয়। সেই সময়ত বদোদৰাৰ কেইবাজনো কাউন্সিলাৰে পুনৰবাৰ ইউছুফ পাঠানৰ বিৰুদ্ধে ভূমি বেদখলৰ অভিযোগ উত্থাপন কৰিছিল। উল্লেখ্য যে পৌৰসভাই ইউছুফ পাঠানক জাননী দি মাটি খালী কৰিবলৈ কয়। যাৰ পৰিপ্ৰেক্ষিতত তৃণমূলৰ সাংসদগৰাকী উচ্চ ন্যায়ালয়লৈ যায়।
তেওঁ প্ৰথমে ২০১২ চনত এই মাটিৰ মালিকীস্বত্ব লাভ কৰিব বিচাৰিছিল। তেওঁ কয় যে এজন আন্তঃৰাষ্ট্ৰীয় ক্ৰিকেটাৰ হিচাপে তেওঁৰ ঘৰৰ কাষৰ খালী মাটিয়ে তেওঁৰ নিৰাপত্তাৰ বিপদ বৃদ্ধি কৰিছে। ইউছুফ আৰু তেওঁৰ পৰিয়ালৰ সদস্যসকলে বদোদৰাৰ টাণ্ডালজা অঞ্চলৰ এই ঘৰটোত থাকে। ইউছুফ পাঠানৰ ভাতৃ তথা ভাৰতীয় ক্ৰিকেট দলৰ প্ৰাক্তন সদস্য ইৰফান পাঠানো তাতেই থাকে।
