বাছত উঠি সকলোৱে ৰৈ আছিল। নেপাল-তিব্বত সীমান্তৰ জিৰাং বন্দৰত পৰ্যটক কঢ়িয়াই অনা কেইবাখনো বাছ ৰখাইছিল। হঠাৎ পৰ্যটকৰ মাজত এটা ডাঙৰ গৰ্জন শুনা গ’ল। প্ৰথমতে তেওঁলোকে গম পোৱা নাছিল যে ‘জল দানৱ’টো পাহাৰৰ পৰা নামি আহিছে। তেওঁলোকে গম পোৱাৰ আগতেই কনভয়ত থকা পৰ্যটকৰ বাছ দুখন উটুৱাই লৈ গ’ল। তেওঁলোকৰ তৃতীয়খন বাছ কনভয়ৰ মাজত আছিল আৰু কেনেবাকৈ বানৰ পৰা ৰক্ষা (Save from Nepal flood) পৰিছিল। নেপালৰ পৰা ভাৰতলৈ উভতি অহা তামিলনাডুৰ ২১ গৰাকী পৰ্যটকে (21 tourists from Tamil Nadu) এনে এক ভয়ানক অভিজ্ঞতাৰ কথা বৰ্ণনা (Description of a terrifying experience) কৰে।
শুকুৰবাৰে চেন্নাই বিমানবন্দৰত অৱতৰণ কৰে ২১জন পৰ্যটক। তেওঁলোক ভাৰাক্ৰান্ত, বিধ্বস্ত, মুখত আতংকৰ স্পষ্ট চাপ। কিছুমানে কয় যে তেওঁলোকে এতিয়াও বিশ্বাস কৰিব পৰা নাই যে তেওঁলোক কেনেকৈ জীৱিত অৱস্থাত ঘূৰি আহিল। এই জীয়াই থকাটোক তেওঁলোকে ‘অলৌকিক’ বুলি অভিহিত কৰিছিল। ইয়াৰে এজন পৰ্যটক বিজয় ভুবনেশ্বৰীয়ে কয়, “বোমা বিস্ফোৰণৰ দৰে শব্দ শুনিবলৈ পালোঁ। তাৰ পিছত আমাৰ কনভয়ৰ বাছবোৰত এটা বিশাল বোকা-শিলৰ পানীয়ে খুন্দা মাৰিলে।”
ভুৱনেশ্বৰীয়ে লগতে কয়, ”সেই আকস্মিক বানত আমাৰ কনভয়ৰ দুখন বাছ মোৰ চকুৰ সন্মুখতে নোহোৱা হৈ যোৱা দেখিলোঁ। সেই সময়ত আমি ভাবিছিলোঁ বাছৰ ভিতৰতে আমিও বাচি নাথাকো। কিন্তু আমাৰ সন্মুখ আৰু পিছফালে বাছ আছিল। কেনেবাকৈ বাছৰ পৰা নামি আৰু ওখ ঠাইলৈ গ’লোঁ৷ তাত এটা সশস্ত্ৰ বাহিনীৰ কেম্প আছিল। আমাক টানি আনিলে। বিশ্বাস কৰিব পৰা নাই আমি তাৰ পৰা জীৱিত অৱস্থাত উভতি আহিলোঁ।”
তামিলনাডুৰ শিক্ষামন্ত্ৰী এ ৰাজমোহনে কয় যে ৰাজ্যখনৰ পৰা প্ৰায় ৪০০ লোক ভ্ৰমণৰ বাবে নেপাললৈ গৈছিল। ১৪০ জন লোকক উদ্ধাৰ কৰি সুৰক্ষিত কৰা হৈছে। এতিয়াও সন্ধানহীন হৈ আছে কমেও ৮০জন লোক। আনহাতে, নেপাল আৰক্ষীৰ ২৯ আগষ্টৰ হিচাপ অনুসৰি, নেপালত বানপানীৰ ফলত মৃত্যু হোৱা লোকৰ সংখ্যা ৬১৬ জন। বিভিন্ন প্ৰতিবেদনত নেপাল আৰু তিব্বতত নিৰুদ্দেশ হোৱা লোকৰ সংখ্যা একেলগে প্ৰায় ৩ হাজাৰ বুলি প্ৰকাশ পাইছে।
