গুৰুতৰভাৱে অসুস্থ হৈ পৰিছে প্ৰবীণ সমাজ কৰ্মী আন্না হাজাৰে (Anna Hazare is sick)। সোমবাৰে তেওঁক মুম্বাইৰ এখন চিকিৎসালয়ত ভৰ্তি কৰোৱা হয়। প্ৰকাশিত প্ৰতিবেদনত দাবী কৰা হৈছে যে ৮৯ বছৰীয়া আন্নাৰ বৃক্কৰ সংক্ৰমণ দেখা গৈছে।
সূত্ৰ অনুসৰি, আন্না হাজাৰে মহাৰাষ্ট্ৰৰ ৰালেগাওঁ সিদ্ধিৰ এখন চিকিৎসালয়ত চিকিৎসাধীন হৈ আছিল। তাতেই তেওঁৰ শাৰীৰিক অৱস্থাৰ অৱনতি ঘটে। ইয়াৰ পিছত সোমবাৰে তেওঁক মুম্বাইৰ ব্যক্তিগত চিকিৎসালয়লৈ প্ৰেৰণ কৰা হয়।
আন্নাৰ শাৰীৰিক অৱস্থা সন্দৰ্ভত এতিয়াও বিতং তথ্য প্ৰদান কৰা নাই চিকিৎসালয়খনে। অৱশ্যে সূত্ৰৰ পৰা জানিব পৰা মতে, বৰ্তমান তেওঁ চিকিৎসকৰ তীক্ষ্ণ পৰ্যবেক্ষণত আছে। উল্লেখ্য যে ২০১১ চনত ইউপিএ চৰকাৰৰ দিনত আন্না হাজাৰেৰ দুৰ্নীতিবিৰোধী আন্দোলনে সমগ্ৰ দেশতে ধুমুহাৰ সৃষ্টি কৰিছিল। বহুতৰ মতে, দুৰ্নীতিৰ বিৰুদ্ধে লোকপাল আইন কাৰ্যকৰী কৰাৰ দাবীত দিল্লীৰ যন্তৰ-মন্তৰত কৰা অনশনে তদানীন্তন ইউপিএ চৰকাৰৰ ভেটি কঁপাইছিল।
