বৰপেটা জিলাৰ চেঙা সমষ্টিৰ আলোপতিচৰত আৰক্ষীৰ ড্ৰাগছবিৰোধী অভিযানত দুজন সন্দেহযুক্ত সৰবৰাহকাৰী গ্ৰেপ্তাৰ হৈছে।আৰক্ষীৰ তথ্য অনুসৰি, শনিবাৰে নিশা এক গোপন খবৰৰ ভিত্তিত আলোপতিচৰ আৰক্ষীয়ে আলোপতি-শান্তিপুৰত অভিযান চলায়।
অভিযানৰ সময়ত নিষিদ্ধ ড্ৰাগছ সৰবৰাহৰ অভিযোগত আলোপতি-শান্তিপুৰৰ আব্দুল ওৱাহাব আৰু আছাদুল ইছলামক গ্ৰেপ্তাৰ কৰা হয়।
ধৃত দুয়োজনৰ পৰা আৰক্ষীয়ে ড্ৰাগছ থকা বুলি সন্দেহ কৰা ১৭টা কণ্টেইনাৰ আৰু এখন মটৰচাইকেল জব্দ কৰে।
জব্দ কৰা সামগ্ৰীৰ পৰিমাণ আৰু বজাৰমূল্য সম্পৰ্কে আৰক্ষীয়ে এতিয়ালৈকে সবিশেষ প্ৰকাশ কৰা নাই।আলোপতিচৰ আৰক্ষী থানাৰ ভাৰপ্ৰাপ্ত বিষয়া বিদ্যুৎ ঠাকুৰীয়াৰ নেতৃত্বত এই অভিযান চলোৱা হৈছিল। ঘটনা সন্দৰ্ভত আৰক্ষীয়ে আইনী ব্যৱস্থা গ্ৰহণ কৰাৰ লগতে ড্ৰাগছ সৰবৰাহৰ সৈতে আন কোনো ব্যক্তি জড়িত আছে নেকি, সেই দিশতো তদন্ত অব্যাহত ৰাখিছে।
