নাজিৰাৰ বিহুবৰ আৰক্ষী থানাৰ অন্তৰ্গত ৰঙাজান বেংগলি বস্তিত নিশা সংঘটিত এক নৃশংস হত্যাকাণ্ডই সমগ্ৰ অঞ্চলটোত তীব্ৰ চাঞ্চল্যৰ সৃষ্টি কৰিছে। চোকা অস্ত্ৰৰে হানি-খুঁচি বিমান বৰুৱা নামৰ এজন যুৱকক হত্যা কৰাৰ অভিযোগ উত্থাপন হৈছে বিকি সিং নামৰ এজন লোকৰ বিৰুদ্ধে।
স্থানীয় সূত্ৰৰ অভিযোগ অনুসৰি, বিকি সিং ড্ৰাগছৰ অবৈধ ব্যৱসায়ৰ সৈতে জড়িত। কোনো বিষয়ক কেন্দ্ৰ কৰি সৃষ্টি হোৱা সংঘাতৰ মাজতে অভিযুক্তই বিমান বৰুৱাক চোকা অস্ত্ৰৰে উপৰ্যুপৰি আঘাত কৰে। আক্ৰমণত গুৰুতৰভাৱে আহত বিমান বৰুৱাৰ মৃত্যু ঘটে।
ঘটনাটো সংঘটিত কৰিয়েই অভিযুক্ত বিকি সিং ঘটনাস্থলীৰ পৰা পলায়ন কৰা বুলি জানিব পৰা গৈছে। তেওঁৰ বিৰুদ্ধে পূৰ্বেও কেইবাটাও গুৰুতৰ অভিযোগ থকা বুলি স্থানীয় লোকে দাবী কৰিছে।
ঘটনাৰ খবৰ লাভ কৰাৰ পিছতে বিহুবৰ আৰক্ষী ঘটনাস্থলীত উপস্থিত হৈ তদন্ত আৰম্ভ কৰিছে। পলাতক অভিযুক্তক আটক কৰিবলৈ আৰক্ষীয়ে অভিযান চলাই থকা বুলি জানিব পৰা গৈছে। অৱশ্যে হত্যাকাণ্ডৰ প্ৰকৃত কাৰণ আৰক্ষীৰ তদন্তৰ পিছতহে স্পষ্ট হ’ব।
