সাপক অত্যাচাৰ চলাই মৰিয়নিৰ দিচৈ চাহ বাগিচাত (Dichow Tea Garden) বন বিভাগৰ হাতত আটক হ’ল এজন লোক। এডাল প্ৰকাণ্ড বিষাক্ত ৰজা ফেঁটী (King Cobra) সাপ ধৰি নিশাৰ ভাগত অত্যাচাৰ চলোৱাৰ অভিযোগত বন বিভাগে লোকজনক আটক কৰিছে। সাপডালক আঘাত কৰি ডিঙিত লৈ বাগিচাৰ লাইনত চোঁচৰাই লৈ ফুৰা ভিডিঅ’ ভাইৰেল হোৱাৰ পাছতে বন বিভাগে নিশাই লোকজনক আটক কৰে।
উল্লেখ্য যে, দিচৈ চাহ বাগিচাৰ এঘৰ লোকৰ ঘৰত এডাল প্ৰকাণ্ড সাপ সোমোৱাৰ খবৰ বন বিভাগক দিয়া হৈছিল। বন বিভাগৰ লোকে সাপডাল উদ্ধাৰ কৰি থকা সময়তে মন চবৰ নামৰ লোকজনে ঘৰত প্ৰৱেশ কৰি সাপডালক মৰিয়াই আঘাত কৰি বাগিচাৰ লাইনত চোঁচৰাই ফুৰাৰ লগতে ডিঙিত লৈ ফটোৰ বাবে প’জ দিয়া ঘটনাই এতিয়া ৰাইজৰ মাজত তীব্ৰ প্ৰতিক্ৰিয়াৰ সৃষ্টি কৰিছে।
বন বিভাগে বন্যপ্ৰাণী সুৰক্ষা আইন ১৯৭২ ৰ অধীনত লোকজনৰ বিৰুদ্ধে গোচৰ ৰুজু কৰি আটক কৰিছে। আঘাতপ্ৰাপ্ত সাপডালক বৰ্তমান চিকিৎসাৰ বাবে কাজিৰঙালৈ প্ৰেৰণ কৰা হৈছে।
