গ্ৰেটাৰ নয়ডাত ২৪ মহলাৰ পৰা পৰি মৃত্যু হয় পিতৃ-পুত্ৰৰ। শুকুৰবাৰে পুৱা গ্ৰেটাৰ নয়ডা পশ্চিমৰ ২নং গৌৰ চহৰত সংঘটিত হয় এই ঘটনা। নিহত দুজন হৈছে ৰদীপ পাত্ৰ (৪০) আৰু তেওঁৰ ১১ বছৰীয়া পুত্ৰ আৰব। আৰক্ষীয়ে জনোৱা মতে, দুয়োকে উদ্ধাৰ কৰি চিকিৎসালয়লৈ লৈ যোৱা হয়। কিন্তু চিকিৎসকে তেওঁলোকক মৃত বুলি ঘোষণা কৰে। ৰণদীপৰ পত্নীয়ে দাবী কৰে যে তেওঁলোকে পুৱা খাতুশ্যাম মন্দিৰলৈ যাবলৈ সাজু হৈছিল। পূজাৰ বাবে ফুল আনিবলৈ বেলকনিলৈ গৈছিল ৰণদীপ আৰু আৰব। বৰষুণৰ বাবে বেলকনিখন তিতি আছিল। প্ৰথমে সন্দেহ কৰা হৈছে যে দুয়োজনে ফুল ছিঙি থাকোঁতে পিছলি পৰি যায়।
প্ৰাথমিক তদন্তৰ সময়ত আৰবৰ ভৰিখন প্ৰথমে পিছলি যোৱা বুলি আৰক্ষীয়ে জানিব পাৰে। বেলকনিৰ গ্ৰীলত ওলমি আছিল তেওঁ। তাৰ পৰা পুত্ৰক তুলিবলৈ চেষ্টা কৰি থাকোঁতে ৰণদীপে চম্ভালিব নোৱাৰিলে। ফলত দুয়োজনেই তললৈ পৰি যায়। অৱশ্যে প্ৰথম অৱস্থাত দুৰ্ঘটনা বুলি ধাৰণা কৰা হৈছে যদিও আন সম্ভাৱনাৰ তদন্তও চলি থকা বুলি আৰক্ষীয়ে জানিবলৈ দিয়ে। কিছুদিন পূৰ্বে গ্ৰেটাৰ নয়ডাৰ চেঞ্চুৰিয়ান পাৰ্ক ট্ৰপিকেল গাৰ্ডেন ছ’চাইটীৰ ২২ নং মহলাৰ পৰা পৰি এজন যুৱকৰ মৃত্যু হৈছিল। পত্নীৰ লগত কাজিয়া নহ’বলৈ তেওঁ বেলকনিলৈ যায়। তলৰ মহলালৈ নামিবলৈ চেষ্টা কৰি থাকোঁতে হাতখন পিছলি যায়। ২২নং মহলাৰ পৰা পৰি হৰ্ষিত লাভানিয়া গুৰুতৰভাৱে আহত হয়। পিছথ তেওঁক উদ্ধাৰ কৰি চিকিৎসালয়লৈ লৈ যায় যদিও চিকিৎসকে তেওঁক মৃত ঘোষণা কৰে।
