ASSAM TIMES POST
বিভাস দুৱৰা
বৰ্তমানৰ বিধায়ক চক্ৰধৰ গগৈৰ পৰিৱৰ্তনৰ প্ৰতিশ্ৰুতি সমূহ যেন ৰাইজৰ বাবে প্ৰতিশ্ৰুতিৰ মাজতে সীমাবদ্ধ হৈ ৰ’ল।চাৰিটা বছৰ পাৰ হোৱাৰ পাছতো সমষ্টিটোৰ গ্ৰাম্যাঞ্চল উন্নয়ন কৰাত চৰম ভাবে ব্যৰ্থ হোৱা বুলি অভিযোগ উঠিছে বিধায়ক জনৰ ওপৰত।
সব কা চাথ,সব কা বিকাশ নামৰ শ্লগানেৰে পৰিৱৰ্তনৰ প্ৰতিশ্ৰুতি দি দিছপুৰ দখল কৰা বিজেপি চৰকাৰে চাৰিটা বছৰ পাৰ কৰিলে যদিও অসমৰ গ্ৰাম্য অঞ্চলৰ বহু পথ আজিও চৰম অৱহেলিত।খোদ ৰাজ্যৰ মুখ্যমন্ত্ৰী জনৰ গৃহ জিলাতে উন্নয়ন বিচাৰি হাহাকাৰ কৰিব লগা হৈছে সৰ্ব্বসাধাৰন ৰাইজ।এক সময়ত মুখ্যমন্ত্ৰী সৰ্বানন্দ সোণোৱালৰ নিজা সমষ্টি মৰাণ আজিও বহু সমস্যাৰ মাজতে জৰ্জৰিত ।
বৰ্তমানৰ বিধায়ক চক্ৰধৰ গগৈৰ পৰিৱৰ্তনৰ প্ৰতিশ্ৰুতি সমূহ যেন ৰাইজৰ বাবে প্ৰতিশ্ৰুতিৰ মাজতে সীমাবদ্ধ হৈ ৰ’ল।চাৰিটা বছৰ পাৰ হোৱাৰ পাছতো সমষ্টিটোৰ গ্ৰাম্যাঞ্চল উন্নয়ন কৰাত চৰম ভাবে ব্যৰ্থ হোৱা বুলি অভিযোগ উঠিছে বিধায়ক জনৰ ওপৰত।ৰাইজৰ অভিযোগলৈ পিঠি দি মৰাণ বিধানসভা সমষ্টিৰ খোৱাং পঞ্চায়তৰ অন্তৰ্গত ৮ নং ৱাৰ্ড অৰ্থাৎ হালধিবাৰী মইনা গাঁও আজিও অৱহেলিত হৈ থাকিল । চাৰিটা বছৰে গাঁওবাসীৰ সমস্যাৰ খবৰ লবলৈকো সময় নাপালে বিধায়ক জনে।কেৱল মাত্ৰ ৰাজনৈতিক স্বাৰ্থ সিদ্ধিৰ বাবে কাম কৰা বিধায়ক জনে চাৰিটা বছৰে গাঁও খনৰ মূল পথটো নিৰ্মাণ কৰিব নোৱাৰাতো বিশেষ তাৎপৰ্য বহন কৰিছে।
বান বিধস্ত ৰাইজে মূল পথটোত শিল পেলাই ছাত্ৰ ছাত্ৰীৰ লগতে বেপাৰ বাণিজ্যৰ লগত জড়িত ৰাইজৰ কষ্ট লাঘৱ কৰিবলৈ বিধায়ক গৰাকীক বাৰম্বাৰ অনুৰোধ কৰাৰ পাছতো আজি পৰ্যন্ত বিধায়ক জনে ৰাইজৰ সমস্যাৰ প্ৰতি কোনো গুৰুত্ব নিদিয়াৰ গুৰুতৰ অভিযোগ উঠিছে।যোৱা বৰ্ষৰ বানপানীৰ সময়ত নাৱত উঠি বিধায়ক জনে গাঁৱৰ সমস্যা বুজ লৈ ৰাইজক প্ৰতিশ্ৰুতি দিছিল যে বুঢ়ীদিহিং নদীৰ গৰাখহনীয়া ৰোধৰ ব্যৱস্থা কৰাৰ লগতে গাঁও খনৰ মূল পথটো শিলৰীকৰন কৰা হব।কিন্তু সকলো ফুটুকাৰ ফেনত পৰিনত হল।ইয়াৰ পৰৱৰ্তী সময়ত ৰাইজে অনুৰোধ কৰাৰ পাছতো বিধায়কে নিজৰ প্ৰতিশ্ৰুতি ৰক্ষা নকৰিলে ।
মূল পথটো কোনো এখন চৰকাৰে নিৰ্মাণ কৰি নিদিয়াত বছৰ বছৰ ধৰি মইনা গাঁৱৰ ৰাইজে বোকা পানী গচকি যাতায়ত কৰি যমৰ যাতনা তথা জীয়াতু ভুগি আহিছে।আজি পৰ্যন্ত গাঁও খনত ৰোগী কঢ়িয়াই নিবলৈ ১০৮ সেৱা বাহনো সোমাব পৰা নাই।সামান্য এজাক বৰষুণৰ পাছতে বোকা হৈ পৰা মূল পথটো;আনকি বাৰিষাৰ সময়তো খোজ কাঢ়িবলৈ নোৱাৰা হৈ পৰা অৱস্থা হয়।বাৰিষা ছাত্ৰ-ছাত্ৰী সকলে প্ৰায় ২ কিলোমিটাৰ দূৰৈত চাইকেল থৈ বিদ্যালয়-মহাবিদ্যালয়লৈ অহা যোৱা কৰিব লগাত পৰে।
আনহাতেদি খোৱাং গাঁও পঞ্চায়তৰ ফালৰ পৰাও পথটো নিৰ্মাণ কৰি ৰাইজৰ দীৰ্ঘদিনীয়া সমস্যাটো সমাধান কৰিবলৈ কোনো চেষ্টা চলোৱা নহ’ল । সকলোৱে কেৱল প্ৰতিশ্ৰুতিৰ পাছত প্ৰতিশ্ৰুতি হে দি আহিছে । উন্নয়ন আৰু পৰিৱৰ্তনৰ ব্যাপক প্ৰচাৰ চলাই থকা সময়ত চৰকাৰী আঁচনীয়ে আজিও মুখ্যমন্ত্ৰীৰ গৃহ জিলাৰ গাঁও সমূহকে ঢুকি নোপোৱা বিষয়টোৱে ব্যাপক চৰ্চা লভিছে।
