ASSAM TIMES POST
ডিফু, ২০ মাৰ্চ: সম্প্ৰতি বিশ্বজুৰি মহামাৰীৰ আতংকৰ সৃষ্টি কৰা কৰ’না ভাইৰাছক কেন্দ্ৰ কৰি সৃষ্টি হোৱা আতংকৰ পৰিৱেশ ৰাজ্যখনৰসকলো প্ৰান্ততে দেখা গৈছে ৷ বিশেষকৈ বিভিন্ন ৰাজ্যত কৰ্মৰত শ্ৰমিক তথা অন্যান্য কৰ্মচাৰীসকল নিজ ৰাজ্যলৈ ওভতি অহাৰ লগে লগে সাধাৰণ ৰাইজৰ মাজত কৰ’না কেন্দ্ৰীক আতংকই পূৰ্বতকৈ বৃদ্ধি পোৱা দেখিবলৈ পোৱা পৰিলক্ষিত হৈছে ৷
স্থানীয় চিকিৎসালয়ৰ পৰা জানিব পৰা অনুসৰি শেহতীয়াকৈ এলেকাটোত এনে ভালে সংখ্যক কৰ্মৰত যুৱক স্বগৃহলৈ উভতি আহিছে যদিও এইসকলৰ মাজত কৰ’না দেখা পোৱা নাই৷ অৱশ্যে, ইয়াৰ পিছতো এইসকল লোকক নিজ গৃহতে কিছু আছুতীয়াকৈ থকাৰ লগতে কিবা শাৰিৰীক অসুস্থতা অনুভৱ কৰিলেই লগে লগে চিকিৎসকৰ লগত যোগাযোগ কৰিবলৈ জনোৱা হৈছে ৷
এইক্ষেত্ৰত স্থানীয় গাঁওবুঢ়াসকলৰ সৈতে যোগাযোগ কৰি দিহা কৰাৰ বাবে কোৱা হৈছে ৷ ইয়াৰোপৰি স্বাস্থ্যকৰ্মীসকলেও সকলো মুহূৰ্তত চোকা নজৰ ৰাখিছে ৷
ইফালে কৰ’না ভাইৰাছৰ সংক্ৰমন ৰোধ কৰাৰ বাবে আজি কাৰ্বি আংলঙৰ জিলা প্ৰশাসনৰ একাংশ বিষয়ায়ো ডিফু চহৰৰ বিভিন্ন শ্বপিংমল, ৰে’ল ষ্টেছন, পাৱাৰ হাউছ, হোটেল আদি এলেকা পৰিদৰ্শন কৰি পৰিস্থিতিৰ বুজ লোৱাৰ লগতে সংশ্লিষ্ট প্ৰতিষ্ঠানসমূহক কৰ’না ভাইৰাছ সংক্ৰমন প্ৰতিৰোধ কৰাৰ বাবে ল’বলগীয়া বিভিন্ন পদক্ষেপসমূহ সম্পৰ্কে ৰাইজক অৱগত কৰে ৷
দলটোত অতিৰিক্ত উপায়ুক্ত আৰ তিমুঙ, উপাসনা দত্ত, কাৰ্যবাহী দণ্ডাধীশ কে, জেমি আৰু খাদ্য আৰু অসামৰিক যোগান বিষয়া এইছ কেম্প্ৰাই বিৰেণ ৰংপি নেতৃত্বাধীন গ্ৰেটাৰ ডিফু বজাৰ কমিটিৰ সদস্যসকলে অংশগ্ৰহণ কৰে ৷ বকলীয়াঘাটতো আজি সৃষ্টি সাংস্কৃতিক গোষ্ঠী শীৰ্ষক সামাজিক সংগঠনটোৰ উদ্যোগত বকলীয়াঘাট বজাৰ এলেকাত স্থানীয় লোকসকলৰ মাজত কৰ’না ভাইৰাছ সন্দৰ্ভত সজাগতা অভিযান চলোৱা হৈছে ৷
সংগঠনটোৰ কৰ্মীসকলে আজি দিনজোৰা কাৰ্যসূচীৰে বজাৰ এলেকাৰ বিভিন্ন হোটেল ব্যৱসায়িক প্ৰতিষ্ঠান বেংক আদিত উপস্থিত হৈ সজাগতা সৃষ্টি কৰে আৰু পত্ৰিকা বিতৰণ কৰে ৷
