ASSAM TIMES POST
অজন্তা তালুকদাৰ, বোকাখাত
বৰ্তমান শতিকাটোৰ সকলো সমস্যাক চেৰ পেলাই বিশ্ব সংহাৰকাৰীৰ ৰূপত মূৰ ডাঙি উঠা ক’ভিদ-১৯ সংহাৰকাৰী মহামাৰীয়ে পৃথিৱীক এখন গোলকীয় মৰিশালিলৈ পৰিণত কৰাৰ উপক্ৰম কৰিছে। বিশ্বৰ উচ্চ প্ৰযুক্তিবিদ্যা সম্পন্ন উন্নত দেশসমূহতো চূড়ান্ত ভাবুকিৰ সৃষ্টি কৰা কৰ’ণা ভাইৰাচে ভাৰতৰ দৰে অত্যন্ত জনবহুল আৰু অধিকাংশ দাৰিদ্ৰ-পীড়িত, পিছপৰা দেশ এখনত প্ৰৱেশ কৰাৰ সম্ভাৱনাৰ ত্ৰাসে এতিয়া জোকাৰি গৈছে দেশখনক।
ইতিমধ্যে সমগ্ৰ দেশৰ লগতে বোকাখাত মহকুমাৰ সাধাৰণ ৰাইজৰ মাজতো মাৰত্মকভাৱে সংক্ৰমক কৰ’ণা ভাইৰাচৰ ভয়াবহ আক্ৰমণ আৰু এই আক্ৰমণৰ প্ৰতিৰোধৰ বিষয়ে প্ৰশাসন, চৰকাৰী, বে-চৰকাৰী সংস্থা সমূহৰ লগতে বোকাখাতৰ সমূহ সাংবাদিকৰ দলবদ্ধ প্ৰচেষ্টাৰে সজাগতা অভিযান তীব্ৰতৰ কৰি তোলা হয়। এই ভাইৰাছৰ আক্ৰমণ প্ৰতিৰোধ কৰিবলৈ আজি দেশৰ প্ৰধানমন্ত্ৰীৰ আহ্বান ক্ৰমে ১৪ ঘণ্টীয়া সৰ্ব-ভাৰতীয় জনতা কাৰ্ফিউৰ প্ৰতি চৰকাৰী, বে-চৰকাৰী খণ্ডৰ লগতে সৰ্বাত্মক সঁহাৰি দিয়া দেখা গৈছে বোকাখাততো।
সমগ্ৰ বোকাখাত মহকুমাটোৰ প্ৰতিটো ৰাজপথ, জনপূৰ্ণ এলেকা, আনকি ব্যক্তিগত আবাসিক পদূলিও আজি জনশূণ্য। ৰাজপথ শূণ্য কৰি হয়তো পোনপ্ৰথমবাৰৰ বাবে স্ব-গৃহতে স্বতঃস্ফূৰ্ট আবদ্ধ হৈ ৰ’ল সংবাদকৰ্মী সকলো। নিজকে স্বতঃস্ফূৰ্ট স্ব-গৃহবন্দী কৰিলে ৰাইজে। কিন্তু কাৰ্ফিউৰ বাবে বাচ, ৰেল, বিমান সকলো বন্ধ হৈ যোৱাৰ ফলত ঘৰলৈ উভতি আহিবলৈ চেষ্টা চলাইও বহিঃৰাজ্যতে আবদ্ধ হৈ পৰা বহু লোকৰ বাবে অসমৰ আন আন অঞ্চলৰ লগতে উদ্বিগ্নতাত ভুগিছে বোকাখাত মহকুমাৰ তেনে পৰিয়ালসমূহো। তথাপিও মাৰত্মক সংক্ৰমক ভাইৰাচবিধ প্ৰতিৰোধ কৰাৰ পদক্ষেপ হিচাপেই সমগ্ৰ দেশৰ লগতে পূৰ্ণ জন-সমৰ্থনেৰে আজি বোকাখাততো জনতা কাৰ্ফিউ সফল কৰি তোলা দেখা গ’ল।
