ASSAM TIMES POST
উৎপল দাস, গোলাঘাটঃ
ৰেড জ’নৰ পৰা গ্ৰীন জ’নত অন্তৰ্ভুক্ত হোৱা ২৪ ঘণ্টা নৌহওঁতেই শুকুৰবাৰে গোলাঘাটত উদ্ধাৰ হয় বৃহৎ পৰিমাণৰ নিষিদ্ধ গুটখা তথা ধঁপাত জাতীয় সামগ্ৰী। গোলাঘাট আৰক্ষীয়ে অভিযান চলাই দুটা স্থানৰ পৰা উদ্ধাৰ কৰে এই পৰিমাণৰ অখাদ্যসমূহ। ঘটনা সন্দৰ্ভত গোলাঘাট আৰক্ষীয়ে দুজন গুটখা বেপাৰীক আটক কৰাৰ পাছত পোহৰলৈ আহিছে আৰু ন ন তথ্য৷ এই অবৈধ ব্যৱসায়ৰ সৈতে কোন কোন জড়িত হৈ আছে এই নিষিদ্ধ ব্যৱসায়ত সেই তথ্য পোহৰলৈ অহাৰ পূৰ্ণ সম্ভাৱনা আছে।
উল্লেখ্য যে চৌদিশে লকডাউন। তাৰ মাজতে গোলাঘাটত বৃহৎ পৰিমাণৰ নিষিদ্ধ গুটখা, পান মচলা আৰু ধপাত জাতীয় সামগ্ৰী উদ্ধাৰ হোৱা ঘটনাই চাঞ্চল্যৰ সৃষ্টি কৰিছে৷ জানিব পৰা মতে কমলেশ গুপ্তা আৰু মৃত্যুঞ্জয় চৌৰাচিয়া নামৰ গোলাঘাটৰ এই দুটা গুটখা বেপাৰীয়ে লকডাউনৰ সুযোগ লৈ ঘৰৰ পৰা অধিক দামত সংগোপনে নিষিদ্ধ গুটকা পানমচলা আৰু ধঁপাত জাতীয় সামগ্ৰী বিক্ৰী কৰি আহিছিল। লকডাউনৰ বাবে চৰকাৰ তথা প্ৰশাসনে নিষিদ্ধ কৰি থোৱা এই সামগ্ৰীসমূহ শুকুৰবাৰে গোলাঘাট আৰক্ষীয়ে গোপন সূত্ৰৰ পম খেদি নগৰৰ ধ্ৰুৱ নগৰত অবস্থিত দুয়োটা ব্যৱসায়ীৰ ঘৰত তালাচী চলাই বৃহৎ পৰিমাণৰ এই সামগ্ৰী সমূহ উদ্বাৰ কৰে। গুটখা বেপাৰী মৃত্যুঞ্জয় চৌৰাচিয়াৰ স্বীকাৰোক্তি অনুসৰি গোলাঘাটৰ দুৰ্গেশ ভাণ্ডাৰ আৰু অজয় ষ্ট’ৰ নামৰ দুখন ব্যৱসায়িক প্ৰতিষ্ঠানৰ পৰা ক্ৰয় কৰিছিল উদ্বাৰ হোৱা গুটখা, পানমচলা আৰু ধপাত জাতীয় সামগ্ৰী সমূহ। এতিয়া প্ৰশ্ন উত্থাপন হৈছে আটক হোৱা ব্যৱসায়ী দুজনে অভিযোগ কৰা দুখন ব্যৱসায়িক প্ৰতিষ্ঠানত আৰক্ষীয়ে অভিযান চলাবনে।
