ASSAM TIMES POST
ডিফু: ক’ভিড 19 ৰ বাবে দেশজুৰি চলি থকা ৪০ দিনীয়া লকডাউনৰ পৰিপ্ৰেক্ষিতত আজি আন্তৰ্জাতিক শ্ৰমিক দিৱসটি পাহাৰীয়া জিলা কাৰবি আংলঙৰ সদৰ চহৰ ডিফুত বৰ্ণাঢ্য কাৰিযসূচীৰ বিপৰীতে আনুষ্টুপীয়া নিয়ম ফাঁকি পালন কৰি উদযাপন কৰা হয় ৷
আজি পুৱাৰ ভাগত ডিফু দৈনিক বজাৰত থকা ডিটিচি বিল্ডিঙৰ ওপৰ মহলাত কাৰবি আংলং মটৰ পৰিবহন আৰু চালক সন্থা আৰু কাৰবি আংলং গৃহ নিৰ্মাণ আৰু অনান্য শ্ৰমিক সন্থাই পৃথক পৃথককৈ নিজ পতাকা উত্তোলন কৰে ৷ ইয়াৰ পিছত উপস্থিত শ্ৰমিক আৰু চালক সকলে সামাজিক দুৰত্ব বজাই ৰাখি শ্বহীদ তৰ্পণ কৰে ৷
পতাকা উত্তোলন কৰি সাংবাদিকৰে সৈতে হোৱা বাৰ্তালাপত কাৰবি আংলং মটৰ শ্ৰমিক আৰু চালক সন্থাৰ সভাপতি আব্দুল নুৰে কয়যে কৰ’না বিপত্তিৰ সময়ত মটৰ শ্ৰমিক সকল সকলো দিশৰ পৰা বঞ্চিত হৈ আছে গতিকে চৰকাৰে তেওঁলোকৰ প্ৰতি সহানুভূতি জনাই পৰ্যাপ্ত সাহায্য প্ৰদান কৰিব লাগে ৷ সাধাৰণ সম্পাদক কৃষ্ণ ভট্টৰায়ে কয় যে, মটৰ শ্ৰমিক সকলক চৰকাৰে সামাজিক সুৰক্ষা আইনৰ আওতাত সাঙুৰি নোলোৱাৰ বাবে সমস্যাৰ সৃষ্টি হৈছে ৷
শ্ৰমিকৰ বিভিন্ন দাবী সজোৰে উত্থাপন কৰিবলৈ আজিৰ শ্ৰমিক দিৱসৰ সুযোগটো কৰ’না ভাইৰাছৰ সংক্ৰমনৰ বাবে হেৰুৱাবলগীয়া হ’ল৷ অসংগঠিত মটৰ শ্ৰমিক সকল্ বহু কষ্ট স্বীকাৰ কৰি অত্যাৱশ্যকীঁয় সামগ্ৰী দূৰ-দূৰণিৰ ঠাইলৈ কঢ়িয়াই লৈ যায় যদিও লকডাউনৰ বাবে সেইসকলৰ দূৰাৱস্থা হৈছে ৷
সেয়ে তেওঁলোকৰ সুৰক্ষাৰ প্ৰতি সদয় হব লাগে বুলি দাবী জনায় ৷ ইয়াৰোপৰি অসমত কৰ’না যুঁজখনক সঠিক দিশ প্ৰদান কৰা দুই বলিষ্ঠ নেতা ক্ৰমে মুখ্যমন্ত্ৰী সৰ্বানন্দ সোনোৱাল আৰু স্বাস্থ্য মন্ত্ৰী ডাঃ হিমন্ত বিশ্ব শৰ্মাকো প্ৰশংসা কৰে ৷
আনহাতে সদৌ কাৰবি আংলং গৃহ আৰু অনান্য নিৰ্মাণ শ্ৰমিক সন্থাৰ সাধাৰণ সম্পাদক আছমত আলীয়ে কয়যে, লকডাউনৰ ফলত শ্ৰমিক সকলৰ অপূৰণীয় ক্ষতি সাধন হৈছে চৰকাৰে এই দিশটো গণ্য কৰি বিহীত ব্যৱস্থা গ্ৰহণ কৰিব লাগে ৷ আনহাতে দেশ-বিদেশত আৱদ্ধ হৈ থকা শ্ৰমিক সকলক মানৱতাৰ খাতিৰত উদ্ধাৰ কৰি আনিব লাগে ৷
আজিৰ পতাকা উত্তোলন কাৰ্যসূচীক নিৰ্মান শ্ৰমিক সন্থাৰ উপসভাপতি প্ৰতিৰাজা বৰভূঞা, মটৰ শ্ৰমিক চালক সন্থাৰ কাৰ্যনিৰ্বাহক সদস্য ক্ৰমে দিপেন থাপা, দিলবাহাৰ আলী, মাঞ্জা ইনফৰমেছন চেণ্টাৰৰ প্ৰভাৰী হৰি থাউচেন, কাৰ্যালয় সম্পাদক ছাইদুল ইছলাম আৰু নৱ কুমাৰ বৰা উপস্থিত আছিল ৷
