ASSAM TIMES POST
জিতেন বৰকটকী, নগাঁওঃ বাৰিষাৰ বৰষুণে জেকা কৰা এখন চোতাল। এই চোতালখনতে চল্লিশ উৰ্দ্ধৰ এজন পিতৃয়ে ১৫ বছৰীয়া কন্যাক চুলিত ধৰি, বোকাত লেতিয়াই, চোঁচৰাই পেট, বুকু, পিঠিত ঘোঁচা, গোৰ আদি শোধাই গৈছে। পিতৃৰ প্ৰহাৰত কন্যাই চিঞৰি-চিঞৰি অৱশেষত চেতনালুপ্ত হৈ পৰি ৰয়।
উগ্ৰ মূৰ্তি ধাৰণ কৰা পিতৃৰ এনে কাৰ্য্ক বাধা দিবলৈ হাতত এডাল বাঁহ লৈ আগবঢ়ি আহে সত্তৰ উদ্ধৰ এগৰাকী বৃদ্ধা। বৃদ্ধাগৰাকীয়ে এই দানৱ ৰূপী পিতৃক বাঁহেৰে মৰিয়াই বাধা প্রদান কৰে।
মানৱতাক পদাঘাত কৰা এই ঘটনা সংঘটিত হৈছে অসমত। তাতোকৈও আচৰিত হ’বলগা কথা যে এজন পাষাণ পিতৃয়ে ১৫ বছৰীয়া কন্যাক এনেদৰে শাৰীৰিক নিৰ্যাতন চলাইছে।
ইতিমধ্যে ছ’চিয়েল মিডিয়াত ভাইৰেল হৈ পৰা এই ঘটনাটো সংঘটিত হৈছে নগাঁও জিলাৰ চামগুৰি থানাৰ অন্তর্গত শিৱস্হানত শুকুৰবাৰে। জামালুদ্দিন নামৰ পাষাণ হৃদয়ৰ পিতৃয়ে যমৰূপ ধাৰণ কৰি এনেদৰে কন্যাৰ ওপৰত অমানুষিক অত্যাচাৰ চলোৱা দৃশ্যই প্ৰতিজন হৃদয়বান লোকক ব্যথিত কৰি তুলিছে।
ইপিনে ঘটনা সম্পর্কে স্হানীয় ৰাইজে আৰক্ষীক অৱগত কৰাত আৰক্ষীয়ে নিৰ্যাতিত কিশোৰীগৰাকীক উদ্ধাৰ কৰি নগাঁও অসামৰিক চিকিৎসালয়ত ভৰ্তি কৰায়। চিকিৎসাধীন হৈ থকা কিশোৰীগৰাকীৰ অৱস্থা সংকটজনক। ইপিনে আৰক্ষীয়ে জামালুদ্দিনক গ্ৰেপ্তাৰ কৰি ন্যায়িক জিম্মালৈ প্ৰেৰণ কৰে। জামালুদ্দিনৰ অসৎ নিৰ্দেশ অমান্য কৰাৰ বাবেই তেওঁ কন্যাৰ ওপৰত এনেদৰে শাৰীৰিক নিৰ্যাতন চলোৱা বুলি অভিযোগ উত্থাপন হৈছে।
