ASSAM TIMES POST
নিউজ ডেক্স
অসমত কোভিড-১৯ৰ সংক্ৰমণে বিশেষ পৰ্যায় পাইছেগৈ।২০ মে’ৰ নিশা ১২বজালৈকে কোভিড-১৯ত সংক্ৰমিত হোৱা লোকৰ সংখ্যা অসমত ১৮৮জন হৈছেগৈ।পৰিস্থিতি ভাললৈ আহিব নে বেয়ালৈ যাব তাৰ নিশ্চিয়তা কাৰো হাতত নাই। বিশ্ব স্বাস্থ্য সন্থাই এই ইংগিত দি থৈছে ।তেনে পৰিস্থিতিৰ প্ৰতি লক্ষ্য ৰাখি স্বাস্থ্য মন্ত্ৰী হিমন্ত বিশ্ব শৰ্মাই বুধবাৰে অসমৰ প্ৰতিখন জিলাতেই জিলা উপায়ুক্তসকলক কোভিড-১৯ত আক্ৰান্ত হৈ মৃত্যু হোৱা লোকৰ বাবে আছুতীয়া স্থানত শ্মশান, কবৰ স্থান আদিৰ ব্যৱস্থা কৰিবলৈ দিছে।
স্বাস্থ্য মন্ত্ৰী হিমন্ত বিশ্ব শৰ্মাই কয়- এই সন্দৰ্ভত নিৰ্দেশ পূৰ্বতেই দিয়া হৈছিল জিলা উপায়ুক্তসকলক। সেই নিৰ্দেশ মানি কোনো কোনো উপায়ুক্তই কোভিড-১৯ত আক্ৰান্ত হোৱা ৰোগীৰ অন্ত্যেষ্টিক্ৰিয়াৰ বাবে পৃথক শ্মশান আৰু কবৰ স্থানৰ ব্যৱস্থা কৰিছে যদিও, সৰহ সংখ্যকেই তেনে ব্যৱস্থা কৰা নাছিল।
শেহতীয়াকৈ কোভিড-১৯ত আক্ৰান্ত হোৱা ৰোগীৰ অন্ত্যেষ্টিক্ৰিয়াক লৈ সৃষ্টি হোৱা সমস্যাৰ প্ৰতি লক্ষ্য ৰাখি বুধবাৰে জিলা উপায়ুক্তসকলৰ সৈতে ভিডিঅ’ কনফাৰেন্সিংযোগে হোৱা বৈঠকত এই পদক্ষেপ গ্ৰহণ কৰিবলৈ পুনৰ স্বাস্থ্য মন্ত্ৰীগৰাকীয়ে উনুকিয়াই দিয়ে।
সেই অনুসৰি, অতি শীঘ্ৰেই প্ৰতিখন জিলাত কোভিড-১৯ত আক্ৰান্ত হোৱা লোকৰ অন্ত্যেষ্টিক্ৰিয়া সম্পন্ন কৰিবলৈ পৃথক আৰু আছুতীয়া স্থানত জিলা উপায়ুক্তসকলে শ্মশান আৰু কবৰ স্থানৰ ব্যৱস্থা কৰিব লাগিব।এনে পৰিপ্ৰেক্ষিতত যিকোনো ধৰণৰ পৰিস্থিতিৰ বাবে চৰকাৰ বা প্ৰশাসন সাজু থকা উচিত।এতিয়ালৈকে অসমত আক্ৰান্ত হাৰ ০.১৫ শতাংশ।ইয়াৰে ৪৮জন সুস্থ হৈ উঠিছে আৰু ১৩৩ জন চিকিৎসাধীন হৈ আছে। অৱশ্যে এয়া শংকিত হোৱাৰ সময় নহয় সজাগ আৰু সতৰ্ক হৈ কোৰোনা ভাইৰাছৰ বিৰুদ্ধে যুঁজাৰ সময়।
