ASSAM TIMES POST
নগাঁও : নগাঁও পৌৰসভাৰ প্ৰাক্তন পৌৰপতি কিশোৰ কান্তি বসু (৭১)ৰ কালি নিশা নগাঁও চহৰৰ এখন ব্যক্তিগত চিকিৎসালয়ত পৰলোকপ্ৰাপ্তি ঘটে । নগাঁও চহৰৰ এ ডি পি পথৰ বাসিন্দা বসু দীৰ্ঘদিন ধৰি স্নায়ুজনিত ৰোগত আক্ৰান্ত হৈ আছিল। কালি বিয়লি বসুৰ স্বাস্থ্যৰ অৱস্থা অধিক অৱনতি ঘটাত তেওঁক চহৰখনৰ জি.ডি নাৰ্ছিং এণ্ড ৰিচাৰ্চ চেণ্টাৰত ভৰ্ত্তি ককৰোৱা হয় যদিও নিশা প্ৰায় ৯:৩০ বজাত তেওঁ শেষ নিশ্বাস ত্যাগ কৰে ।
কিশোৰ কান্তি বসুৱে ভাৰতীয় ষ্টেট বেংকৰ নগাঁও শাখাত বিষয়া হিচাপে কিছু বছৰ কাৰ্যনিৰ্বাহ কৰি অৱশেষত স্বেচ্ছামূলক অৱসৰ গ্ৰহণ কৰে। পৰৱৰ্ত্তী সময়ত প্ৰত্যক্ষ ৰাজনীতিত জৰিত হৈ বিগত কংগ্ৰেছ চৰকাৰৰ আমোলত তেওঁ নগাঁও পৌৰসভাৰ পৌৰপতি পদত অধিষ্ঠিত হয়। সামাজিক কাম-কাজত জৰিত বসু নগাঁৱৰ বাঙালীসকলৰ সৰ্ববৃহৎ অনুষ্ঠান নগাঁও বাঙ্গালী সন্মিলনৰ সভাপতি হিচাপে দীৰ্ঘ বছৰ কাল কাৰ্যনিৰ্বাহ কৰাৰ উপৰি ৰামকৃষ্ণ সেৱা সমিতিৰো সদস্য আছিল।
নগাঁও পৌৰসভাৰ সভাপতি হিচাপে কাৰ্যনিৰ্বাহ কৰাৰ সময়ত নগাঁও চহৰৰ উন্নয়নৰ বাবে তেওঁ বিশেষ পদক্ষেপ গ্ৰহণ কৰিছিল। প্ৰাক্তন পৌৰপতি বসুৰ মৃত্যুত নগাঁৱত শোকৰ ছাঁ পৰে। তেওঁৰ মৃত্যুত নগাঁও সদৰ সমষ্টিৰ বিধায়ক ৰূপক শৰ্মা, প্ৰাক্তন মুখ্যমন্ত্ৰী প্ৰফুল্ল কুমাৰ মহন্ত, প্ৰাক্তন মন্ত্ৰী ৰকিবুল হুছেইন, গিৰীন্দ্ৰ কুমাৰ বৰুৱা, প্ৰাক্তন বিধায়ক ডঃ দুৰ্লভ চমুৱা, নগাঁও পৌৰসভাৰ বিষয়া-কৰ্মচাৰী, প্ৰাক্তন পৌৰপতি দিগন্ত দাস আদিয়ে গভীৰ শোক প্ৰকাশ কৰে। নগাঁও বঙালী সন্মিলনয়েও বসুৰ মৃত্যুত গভীৰ শোক প্ৰকাশ কৰে। মৃত্যুৰ সময়ত তেওঁ পত্নী আৰু একমাত্ৰ পুত্ৰসহ ভালেসংখ্যক আত্মীয়ক ইহসংসাৰত এৰি থৈ যায়।
