ASSAM TIMES POST
নগাঁও : দেশজুৰি চলা লকডাউনৰ মাজতে কালি নিশা নগাঁও চহৰৰ চাৰিখুটিত এখন পৰিত্যক্ত টাটা চুমু গাড়ীত অঘৰী জীৱন যাপন কৰা এজন যুৱকৰ অগ্নিদগ্ধ মৃতদেহ উদ্ধাৰ হোৱা ঘটনাক কেন্দ্ৰ কৰি অঞ্চলটোত চাঞ্চল্যৰ সৃষ্টি হয় ।
ঘটনা সন্দৰ্ভত জানিব পৰা মতে, উত্তৰ প্ৰদেশৰ মীৰাট জাকিৰ কলনীৰ বাসিন্দা চাকিব আনচাৰী নামৰ অঘৰী যুৱকজন দীৰ্ঘদিন ধৰি নগাঁও চহৰৰ চাৰিখুটি অঞ্চলৰ পুৰণা গাড়ীৰ সামগ্ৰী বিক্ৰী কৰা এখন দোকানৰ সন্মুখত ৰাখি থোৱা পৰিত্যক্ত এখন টাটা চুমু গাড়ীত আশ্ৰয় লৈ আছিল।
কালি নিশা প্ৰায় ১১ বজাত যুৱকজনে আশ্ৰয় লৈ থকা টাটা চুমুখন দাউ দাউকৈ জ্বলি থকা অঞ্চলটোৰ একাংশ স্থানীয় লোকে প্ৰত্যক্ষ কৰি আৰক্ষীক খবৰ দিয়ে। আনহাতে আৰক্ষীৰ এটা দল ঘটনাস্থলীত উপস্থিত হৈ অগ্নি নিৰ্বাপক বাহিনীৰ লোকৰ সহায়ত জ্বলি থকা গাড়ীখনৰ জুই নুমুৱাবলৈ সক্ষম হয় যদিও গাড়ীখন ভিতৰত আশ্ৰয় লৈ থকা চাকিব সম্পূৰ্ণৰূপে অগ্নিদগ্ধ হৈ অতি কৰুণভাৱে মৃত্যুক আঁকোৱালি লয়।
পাচত আৰক্ষীয়ে যুৱকজনকৰ মৃতদেহ উদ্ধাৰ কৰে। আনহাতে এই ঘটনাক লৈ অঞ্চলটোত এক হুৱাদুৱা পৰিস্থিতিৰ সৃষ্টি হয়। উল্লেখ্য যে চাকিব হুছেইন নামৰ ৩০ বছৰীয়া যুৱকজন কিছু বছৰ পুৰ্বে নগাঁৱলৈ আহিছিল। তেতিয়াৰ পৰা যুৱককেইজনে অঘৰী জীৱন যাপন কৰি আহিছিল । স্থানীয় ৰাইজে সন্দেহ কৰা মতে কোনো দুৰ্বৃত্তই নিৰীহ যুৱকজনক হত্যা কৰি তেওঁক দীৰ্ঘদিন ধৰি আশ্ৰয় লৈ থকা গাড়ীখনত সুমুৱাই জুই লগাই দিয়ে ।
ইপিনে কালি সন্ধিয়া কেইজনমান যুৱকৰ সৈতে কিবা কথাত অঘৰী যুৱকজন কাজিয়াত লিপ্ত হোৱা স্থানীয় একাংশ লোকে দেখা পোৱা বুলি জানিব পৰা গৈছে । উক্ত কাজিয়াৰ পৰিনতিত যুৱকজন হত্যাৰ বলি হোৱা বুলিও একাংশই সন্দেহ প্ৰকাশ কৰে ।অৱশ্যে আৰক্ষীৰ সঠিক তদন্ততহে কি পৰিস্থিতিত যুৱকজন অগ্নিদগ্ধ হৈ মৃত্যুক সাবটি ললে সেই কথা পৰৱৰ্তী সময়ত পোহৰলৈ আহিব।
