ASSAM TIMES POST
নিউজ ডেস্ক:
আজি প্ৰধান মন্ত্ৰী নৰেন্দ্ৰ মোদীয়ে নিজৰ ‘মন কী বাত’ত স্বীকাৰ কৰে যে কৰোনা মহামাৰী আৰু তাৰ ফলত সৃষ্টি হোৱা পৰিস্থিতিৰ বাবে দেশত আটাইতকৈ বেছি ক্ষতিগ্ৰস্ত হৈছে প্ৰব্ৰজিত শ্ৰমিক আৰু দুখীয়া লোকসকল। আনহাতে, অৰ্থনৈতিক ক্ৰিয়াকলাপবোৰ স্বাভাৱিক হওঁতে অধিক সতৰ্কতা অৱলম্বন কৰিব লাগিব বুলিও মোদীয়ে মন্তব্য কৰে।
ইফালে আজিৰ ‘মন কী বাত’তো প্ৰধানমন্ত্ৰীয়ে আত্মনিৰ্ভৰ ভাৰতৰ প্ৰসংগ উল্লেখ কৰে। দেশ যদি আত্মনিৰ্ভৰশীল হয় তেতিয়াহ’লে কৰোনাৰ দৰে মহামাৰীৰ মোকাবিলাত সমস্যা কমি বুলিও প্ৰধানমন্ত্ৰীয়ে দাবী কৰে। আনহাতে, পঞ্চম পৰ্যায়ৰ লকডাউনত কণ্টেইনমেণ্ট অঞ্চলক বাদে সমগ্ৰ দেশত লকডাউন উঠাই দিলেও কৰোনাৰ বিপদ অলপো কমা নাই বুলিও তেওঁ সতৰ্ক কৰি দিয়ে।
কৰোনা মোকাবিলাত দেশৰ সেৱা শক্তিয়ে নিজৰ ক্ষমতা দেখুৱাইছে বুলিও উল্লেখ কৰে প্ৰধানমন্ত্ৰীয়ে। কৰোনাৰ সংক্ৰমণ ৰোধ আৰু সামাজিক দূৰত্ব বজাই ৰাখিবলৈ উদ্ভাৱন কৰা ব্যৱস্থাসমূহৰো প্ৰশংসা কৰে মোদীয়ে।আনহাতে, বিশ্বৰ আন দেশৰ তুলনাত ভাৰতত মৃত্যুৰ হাৰ বহু কম বুলি উল্লেখ কৰি মোদীয়ে কয় যে সমগ্ৰ বিশ্বই এই ক্ষেত্ৰত ভাৰতৰ ওপৰত দৃষ্টি ৰাখিছে। মোদীয়ে লগতে কয়– দেশৰ দুখীয়া লোকসকলৰ স্বাৰ্থতে লকডাউন উঠাই জনজীৱন লাহে লাহে স্বাভাৱিক কৰাৰ পদক্ষেপ লোৱা হৈছে।
কিন্তু লকডাউন শিথিল হ’লেও বিপদ এতিয়াও কমা নাই বুলিও সোঁৱৰাই দিয়ে মোদীয়ে। গা এৰা দিয়া মনোভাব দেখুৱালে পূৰ্বৰ সকলো কষ্ট অথলে যাব বুলি তেওঁ উল্লেখ কৰে। আজিৰ ‘মন কীত বাত’ত প্ৰতিকূল পৰিস্থিতি মোকাবিলাৰ কঠিন পৰীক্ষাত দেশ অৱতীৰ্ণ হৈছে বুলি প্ৰকাশ কৰে প্ৰধানমন্ত্ৰী মোদীয়ে।
সেয়েহে এই সময়ত সতৰ্কতা অৱলম্বনৰ বাদে গত্যন্তৰ নাই বুলিও তেওঁ লগতে কয়। ইয়াৰ বাবে স্বাস্থ্য বিভাগে বান্ধি দিয়া নীতি যেনে সামাজিক ব্যৱধান, মাস্ক পৰিধান আদি মানি চলিবলৈও প্ৰধানমন্ত্ৰীয়ে আহ্বান জনায়।
