ASSAM TIMES POST
বোকাজানঃ উচ্চতম ন্যায়ালয়ে কাজিৰঙা ৰাষ্ট্ৰীয় উদ্যানত আৰু ইয়াৰ আশে-পাশে শিলৰ অবৈধ খননৰ ওপৰত নিষেধাজ্ঞা আৰোপ কৰাৰ পাছৰেপৰা কাৰ্বি আংলং আৰক্ষীয়ে ইয়াৰ বিৰুদ্ধে সকলো প্ৰচেষ্টা অব্যাহত ৰাখিছে যদিও প্ৰশাসনৰ চকুত ধূলি দি এতিয়াও একাংশই ইয়াত অব্যাহত ৰাখিছে চোৰাং কাৰবাৰ।
ইয়াৰ বাবেই মঙলবাৰে দোলামাৰা থানাৰ অন্তৰ্গত গেলেকী এলেকাৰ খাইলুং টেৰণ গাঁৱত থকা মা ফুলেশ্বৰী ষ্ট’ন কাচাৰ নামৰ এটা কোৱেৰীত অভিযান চলাই জিলাখনৰ আৰক্ষী বিভাগে।
অভিযানকালত ইয়াৰে জড়িত দুই ক্ৰমে বোকাখাতৰ গড়মূৰৰ মুনিন বৰা (পিতাঃ ডিম্বেশ্বৰ বৰা) আৰু বিষ্ণুপুৰৰ যুগল বৰুৱা (পিতাঃ প্ৰয়াত পদুম বৰুৱা)ক আটক কৰা হয়।
বোকাজানৰ মহকুমা আৰক্ষী বিষয়াৰ নেতৃত্বত তথা দোলামাৰা আৰু ৰংবংৱে আৰক্ষী থানাৰ ভাৰপ্ৰাপ্ত বিষয়াদ্বয় আৰু বন বিভাগৰ যৌথ অভিযানত এটা শিল ভঙা মেচিন, এখন ট্ৰাক (এএছ ০৯ এ ৪১০২), এখন মটৰ চাইকেল (এএছ ০৫ এফ ১১৮১), দুটা ২৪ ভল্টৰ বেটাৰী, তেলৰ দুটা ড্ৰামো জব্দ কৰা হয়। ঘটনা সন্দৰ্ভত ইতিমধ্যে দোলামাৰা থানাত এটা গোচৰ ৰুজু কৰা হৈছে।
