- এম্বুলেন্সৰ অভাৱত চিভিল হাস্পতালৰ পৰা মৃত পত্নীক পিঠিত নিলে স্বামীয়ে
ASSAM TIMES POST
ডিফুঃ মানৱ অধিকাৰক ভূলুণ্ঠিত কৰি ডিফু চহৰত ঘটিল এক হৃদয়বিদাৰক ঘটনা৷ মৃত পত্নীক ডিফু চিভিল হাস্পতালৰপৰা সোমবাৰে সন্ধিয়া পিঠিত লৈ তিনি কিল‘মিটাৰ দূৰত্বৰ বাট বুলিলে এজন দৰিদ্ৰ স্বামীয়ে৷ প্ৰাপ্ত তথ্য অনুসৰি ডিফুৰ লুম্বাজং পৰিষদীয় সমষ্টিৰ মেনচিং ৰংহাঙ বস্তিৰ মেন বে‘ৰ পত্নী কাদম ৰংহাঙপী(৬০)ক সোমবাৰে সন্ধিয়া ডিচেণ্ট্ৰিৰ বাবে অসুস্থ অৱস্থাত ডিফু অসামৰিক চিকিৎসালয়ত ভৰ্তি কৰে৷
ক্ষন্তেক পিছতে কাদম ৰংহাঙপীৰ মৃত্যু হয়৷ পত্নীৰ মৃতদেহ ঘৰলৈ আনিবলৈ হাস্পতালত এম্বুলেন্স বিচাৰি বিমুখ হোৱাৰ লগতে ধনৰ অভাৱত কোনো ব্যৱস্থা কৰিব নোৱাৰি উপায়হীন হৈ স্বামী মেন বে‘য়ে পত্নীৰ মৃতদেহ নিজৰ পিঠিত লৈ ডিফু চহৰৰ মাজেৰে প্ৰায় চাৰি কিল‘মিটাৰ দূৰত্বত থকা ঘৰলৈ যাবলৈ ওলায়৷
ইফালে ইউনাইটেড কাৰবি ইয়ুথ এছ‘চিয়েচনে ঘটনা সংক্ৰান্তত জানিব পাৰি ঘটনাস্থলীত উপস্থিত হৈ সংগঠনৰ ফালৰ পৰাও মৃতদেহ কঢ়িওৱা গাড়ীৰ চালকক ফোন কৰিও কোনো সদোত্তৰ নাপাই মৃতদেহটো এখন অট‘ৰিক্সা ভাড়া কৰি নিবলৈ ব্যৱস্থা কৰি দিয়ে বুলি জানিবলৈ দিয়ে মেন বে’য়ে।
কিন্তু ঘৰলৈ আধাকিল‘মিটাৰ বাকী থকা অৱস্থাত ৰাস্তাৰ অৱস্থা অতি শোচনীয় হোৱাৰ বাবে পুনৰ পত্নীৰ মৃতদেহ পিঠিতলৈ স্বামীজন ঘৰত উপস্থিত হয়গৈ৷ বুধবাৰে মৃতকৰ ঘৰত উপস্থিত হৈ ইউকেএছৰ নেতৃবৰ্গই পৰিয়ালটোলৈ সমবেদনা জ্ঞাপন কৰি কিছু সামগ্ৰী প্ৰদান কৰে৷ সংগঠনটোৱে দৰিদ্ৰ পৰিয়ালৰ মহিলাগৰাকীৰ মৃতদেহ ঘৰলৈ নিবৰ বাবে হাস্পতাল কৰ্তৃপক্ষই এম্বুলেন্সৰ ব্যৱস্থা কৰি দিব নোৱাৰাত আশ্চৰ্য প্ৰকাশ কৰাৰ লগতে জনপ্ৰতিনিধি সকলে নিৰ্বাচনৰ পূৰ্বে ভোট বিচাৰি আহে যদিও মেনচিং ৰংহাং বস্তিৰ বিধ্বস্ত বাট পথবোৰ নিৰ্মাণত হেমাহি কৰাৰ বাবে সময়মতে হাস্পতাললৈ নিব নোৱাৰাৰ কাৰণেই মহিলা গৰাকীৰ মৃত্যু হোৱা বুলি অভিযোগ কৰে।
