ASSAM TIMES POST
নগাঁও: নগাঁও চহৰৰ এগৰাকী চিকিৎসকৰ বিৰুদ্ধে হোম কোৱাৰেণ্টীন উলংঘনৰ অভিযোগ উত্থাপিত হৈছে । জানিব পৰা মতে, নগাঁও চহৰৰ পেনাচিয়া লেবৰটৰীত এসপ্তাহ পূৰ্বে চিকিৎসা গ্ৰহণ কৰিবলৈ যোৱা কংকন মুদৈ নামৰ এজন কোভিড-১৯ ত আক্ৰান্ত যুৱকৰ সংস্পৰ্শলৈ অহাৰ সন্দেহত জিলা প্ৰশাসন আৰু স্বাস্থ্যবিভাগে উক্ত লেবৰটৰী ১৪ দিনৰ বাবে বন্ধ কৰি দিয়ে।
আনহাতে স্বাস্থ্য বিভাগে পেনাচিয়া লেবৰটৰীত কৰ্মৰত চিকিৎসক আৰু কৰ্মচাৰীক নিৰ্ধাৰিত সময়ৰ বাবে হোম কোৱাৰেণ্টীনত থকাৰ নিৰ্দেশ প্ৰদান কৰে । সেই অনুসৰি পেনাচিয়া লেবৰটৰীত পেথ’লজিষ্ট হিচাপে কৰ্মৰত ডা: পি দত্তও হোম কোৱাৰেণ্টেীনত থাকিব লগাত পৰে।
ইপিনে স্বাস্থ্যবিভাগে পেনাচিয়াৰ সৈতে জড়িত সকলৰ স্বাৱ সংগ্ৰহ কৰে। আনহাতে প্ৰশাসনৰ নিৰ্দেশনাত চৈধ্য দিনৰ বাবে পেনাচিয়া বন্ধ হলেও পেথ’লজিষ্ট ডা: দত্তই নগাঁৱৰ চাওচৰীয়া নাৰ্ছিং হোমত যোৱা ২৪ জুনত ৰোগীৰ তেজ পৰীক্ষা কৰাৰ ৰিপৰ্ট পোৱাৰ পিছতে নগাঁও জিলা স্বাস্থ্য বিভাগত প্ৰতিক্ৰিয়াৰ সৃষ্টি হয়।
আনহাতে এই সম্পর্কত নাৰ্ছিং হোম খনৰ কৰ্তৃপক্ষই সংবাদ মাধ্যমৰ আগত অজ্ঞতা প্ৰকাশ কৰে যদিও নগাঁও জিলাৰ যুটীয়া স্বাস্থ্য সঞ্চালক গৰাকীয়ে বিষয়টোত উদ্বেগ প্ৰকাশ কৰে।ইপিনে হোম কোৱাৰেণ্টীনত থকা অৱস্থাত চিকিৎসক গৰাকী নগাঁও চহৰৰ আন এখন ব্যক্তিগত নাৰ্ছিংহোমলৈকো যোৱাৰ অভিযোগ উঠিছে।
অৱশ্যে পেনাচিয়াৰ সৈতে জড়িত সকলো চিকিৎসক আৰু কৰ্মচাৰীৰ স্বাৱ পৰীক্ষাৰ ফলাফল নিগেটিভ আহে। তৎসত্বেও হোম কোৱাৰেণ্টীনৰ ম্যাদ সম্পূৰ্ণ নোহোৱাকৈ এগৰাকী চিকিৎসকে ৰোগীৰ স্বাস্থ্য পৰীক্ষা কৰা কাৰ্যক সকলোৱে আশ্চর্য প্ৰকাশ কৰে।
