নিউজ ডেস্কঃ
অৱশেষত পুনৰ অনুষ্ঠিত হ’ল ভাৰত চৰকাৰ আৰু এনএছচিএন-মুইভা গোটৰ মাজত শান্তি আলোচনা প্ৰক্ৰিয়াৰ বৈঠক৷
সোমবাৰে সুদীৰ্ঘ ৯ মাহৰ মূৰত অন্তত অনুষ্ঠিত বৈঠকখনত উপস্থিত থাকে বিদ্ৰোহী সংগঠনটোৰ ফালৰ পৰা শীৰ্ষ নেতা থুইংগালেং মুইভা আৰু শান্তি আলেচনাৰ বিদ্ৰোহী সংগঠনটোৰ সামূহিক নেতৃবৰ্গ ৷
আনহাতে, ভাৰত চৰকাৰৰ হৈ চোৰাংচোৱা বিভাগৰ অতিৰিক্ত সঞ্চালক এ কে মিশ্ৰ আৰু উত্তৰ-পূৰ্বাঞ্চলৰ সঞ্চালক অৰবিন্দ সিঙে বৈঠকত অংশগ্ৰহণ কৰে। বৈঠকখনত দুয়ো পক্ষৰ মাজত বিশ্বাস পুনৰ গঢ়ি তোলাৰ লগতে শান্তি আলোচনা প্ৰক্ৰিয়া আগবঢ়াই নিয়া সন্দৰ্ভত আলোচনা কৰা হয় ।
উক্ত বৈঠকতে শান্তি আলোচনা প্ৰক্ৰিয়া অব্যাহত ৰাখিবলৈ পৰৱৰ্তী বৈঠকসমূহ অনুষ্ঠিত কৰাৰো সিদ্ধান্ত গ্ৰহণ কৰা হয়৷
