নিউজ ডেস্ক:
ক’ৰোনা ভাইৰাছ অতিমাৰিত বহু মানুহে জীবিকা হেৰুৱাইছে। বহুতেই আকৌ জীবিকা সলনি কৰিবলৈ বাধ্য হৈছে। দীর্ঘ লকডাউনৰ অফুৰন্ত সময়ত বহুতেই নিজৰ অপূর্ণ ইচ্ছা পূৰণ বা সৃজনশীলতাক বিকশিত কৰাৰ চেষ্টা কৰিছে। তেনে এক সফল যুৱক পঞ্জাবৰ ধানিৰাম সাগ্গু। যি পেছাত এজন সাধাৰণ কাঠমিস্ত্রি আছিল। কিন্তু এতিয়া তেওঁ আত্মনির্ভৰশীল, তেওঁৰ তৈয়াৰী অভিনৱ চাইকেলৰ অৰ্ডাৰ সুদূৰ কানাডাৰ পৰাও আহিছে।
পঞ্জাবৰ সৰু এখন চহৰ জিৰাকপুৰৰ ধানিয়ে কাম হেৰুৱাই এপ্রিল মাহৰ পৰাই কামত ধৰে আত্মনির্ভৰ হ’বলৈ। বহু ভাবনা-চিন্তাৰ পিছত তেওঁ ঠিক কৰে, যিমান সম্ভৱ পৰিবেশ বান্ধৱ উপাদানেৰে তেওঁ এখন চাইকেল বনাব।
চাইকেল এনেয়ো পৰিবেশ বান্ধৱ, তাৰ উপৰি এইখনৰ উপাদান আকৌ পৰিবেশ বান্ধৱ। এই চাইকেল তৈয়াৰ কৰিবলৈ গৈ প্রথমে দুবাৰমান ব্যর্থও হয় ধানি, কিন্তু চেষ্টা এৰি নিদিয়ে। শেষ পর্যন্ত প্লাইউড, কৰত আৰু কিছু সৰু-সুৰা যন্ত্রপাতিৰে নিৰ্মাণ কৰে কাঠৰ চাইকেল। যাৰ মূল গাঁথনিটো প্লাইউডৰে তৈয়াৰী। চকা, পেডেলৰ দৰে অংশবোৰ অৱশ্যে অন্য চাইকেলৰ দৰে ধাতুৰ।
ধানিৰ এই সাফল্যৰ কথা প্ৰথমে অঞ্চলটোৰ মানুহৰ ওচৰত আৰু পিছত দেশৰ বিভিন্ন প্রান্তত বিয়পি পৰে। বিভিন্ন স্থানৰ পৰা ধানিয়ে কাঠৰ চাইকেলৰ অৰ্ডাৰ পাই থাকে। একোখন চাইকেল ধানিয়ে ১৫ হাজাৰ টকাত বিক্ৰী কৰিছে। লাভো পাইছে তেনেদৰে। কেৱল সেয়াই নহয়, এতিয়া তেওঁ কানাডাৰ পৰাও অৰ্ডাৰ লাভ কৰিছে।
