ASSAM TIMES POST
অজন্তা তালুকদাৰ, বোকাখাতঃ মাতৃভূমিৰ মুক্তিৰ বাবে প্ৰাণৰ মমতা এৰি ১৯৩২-ত শ্বহীদ হোৱা শ্বহীদ বিজু বৈষ্ণৱ, ১৯৪৩ ত শ্বহীদ হোৱা শ্বহীদ কমলা মিৰি আৰু অসমৰ প্ৰথমখন অসমীয়া বোলছবি জয়মতীত অভিনয় কৰা প্ৰথম গৰাকী মহিলা অভিনেত্ৰী তথা অসমৰ সাংস্কৃতিক জগতখনত মহিলা শিল্পীৰ বাটকটীয়া আইদেউ সন্দিকৈৰ প্ৰতি সন্মান জনাই সেইসকলৰ স্মৃতিত আজি বোকাখাতত তিনিওৰে একোটিকৈ পূৰ্ণাংগ প্ৰতিমূৰ্তি স্থাপনৰ আধাৰশিলা সম্পন্ন হৈ যায়।
বোকাখাতৰ গড়কাপ্তানি বিভাগৰ পৰিদৰ্শন বঙলাৰ চৌহদত এই আধাৰশিলা স্থাপন কৰে অসম চৰকাৰৰ কৃষি, পশুপালন আৰু খাদ্য সংশাধন বিভাগৰ কেবিনেট মন্ত্ৰী তথা বোকাখাত সমষ্টিৰ বিধায়ক অতুল বৰাই।
বোকাখাত পুৱতি সাহিত্য সভাৰ সম্পাদক গীতাঞ্জলি কলিতাই আঁত ধৰা আধাৰশিলা স্থাপন অনুষ্ঠানত মন্ত্ৰী গৰাকীৰ লগতে উপস্থিত আছিল গোলাঘাট জিলাৰ উপায়ুক্ত ধীৰেণ হাজৰিকা, বোকাখাত মহকুমাৰ মহকুমাধিপতি বিবেক শ্যাম, বোকাখাতৰ চক্ৰ বিষয়া খনিন দাস, শিল্পী আইদেউ সন্দিকৈৰ ভতিজা বিজয় সন্দিকৈ, শ্বহীদ কমলা মিৰিৰ জ্যেষ্ঠ নাতি গোলাপ লয়িং, শ্বহীদ বিজু বৈষ্ণৱৰ নাতি বোৱাৰী জ্যোৎস্না বাউৰী, অসম ৰাজ্যিক সাংবাদিক সন্থাৰ সভাপতি জিতু শৰ্মা ৰাজখোৱা, সমাজকৰ্মী তথা বিজেপীৰ ৰাজ্যিক পৰ্যায়ৰ কেন্দ্ৰীয় কাৰ্যনিৰ্বাহক সদস্য অনিমেষ শইকীয়া, বোকাখাত পুৱতি সাহিত্য সভাৰ প্ৰাক্তন সভাপতিদ্বয় ক্ৰমে নিজৰা বৰঠাকুৰ আৰু কল্পনা চেতিয়া, জ্যেষ্ঠ সাংবাদিক বুবুল দত্ত, অসম ৰাজ্যিক মহিলা কংগ্ৰেছ কমিটিৰ সম্পাদিকা তথা বোকাখাত মিচিং সাহিত্য সভাৰ সভাপতি মিনতি দলে, কবি সাংবাদিক অমৰ শৰ্মা, শ্বহীদ বিজু বৈষ্ণৱ স্মৃতি ৰক্ষা সমিতিৰ সভাপতি চাখিৰাম মাহাত্বো, আটছাৰ বোকাখাত শাখাৰ সভাপতি কুমুদ কালিন্দী, সমাজকৰ্মী ভাস্কৰ কালিন্দী, বোকাখাত পুৱতি সাহিত্য সভাৰ কাৰ্যনিৰ্বাহক সদস্য মৃদুস্মিতা শৰ্মা, লগতে অসম গণ পৰিষদ, বিজেপীৰ অসম শাখাৰ আৰু অসম প্ৰদেশ কংগ্ৰেছ কমিটিৰ ভালেকেইজন বিষয় ববীয়া আৰু সদস্য, ভালেসংখ্যক সাংবাদিক, বিশিষ্ট ব্যক্তি আৰু স্থানীয় ৰাইজ উপস্থিত আছিল।
মন্ত্ৰী অতুল বৰাই উক্ত আধাৰশিলা স্থাপন অনুষ্ঠানত ভাৰতৰ স্বাধীনতা সংগ্ৰামৰ অক্লান্ত সেনানী বীৰ শ্বহীদ কমলা মিৰি আৰু বিজু বৈষ্ণৱ তথা শিল্পী আইদেউ সন্দিকৈলৈ শ্ৰদ্ধা জ্ঞাপন কৰি তিনিওগৰাকী নমস্য ব্যক্তিৰ প্ৰতিমূৰ্তিৰ নিৰ্মান কোনো অসুবিধা নোহোৱাকৈ নিয়াৰিকৈ সম্পূর্ণ হোৱাৰ ক্ষেত্রত বোকাখাতৰ সকলো শ্ৰেণীৰ নাগৰিকৰ সহায় সহযোগিতা আন্তৰিকতাৰে কামনা কৰে।
