ষ্টাফ ৰিপ’ৰ্টাৰ:
ডিফু : প্ৰতি বছৰৰ দৰে এইবছৰো সমগ্ৰ দেশৰ লগত সংগতি ৰাখি বিজেপিৰ কাৰবি আংলং জিলা সমিতিৰ উদ্যোগত লৌহ মানৱ চৰ্দাৰ বল্লভ ভাই পেটেলৰ ১৪৫ সংখ্যক জন্ম বাৰ্ষিকীত নেতাগৰাকীক সুঁৱৰি একতাৰ দৌৰ কাৰ্যসূচী গ্ৰহণ কৰে ৷ আজি দোকমোকালি পুৱাতেই কাৰবি আংলং জিলা বিজেপিৰ সভাপতি ধনছিং টেৰণ আৰু সাধাৰণ সম্পাদক অজিত দে’ৰ নেতৃত্বত বিজেপিৰ কৰ্মকৰ্তা আৰু নেতা, সদস্যসকলে একতাৰ দৌৰত অংশগ্ৰহণ কৰে ৷ একতাৰ দৌৰত অংশগ্ৰহণকাৰীসকলে ডিফুস্থিত বিজেপিৰ কাৰ্যালয় চৌহদৰ পৰা একতাৰ দৌৰ আৰম্ভ কৰি ডিফু চহৰ পৰিভ্ৰমণ কৰি জয়ছিং দলৈ সোঁৱৰণি প্ৰেক্ষাগৃহ পথ হৈ পুনৰ বিজেপি কাৰ্যালয়লৈ ঘূৰি আহে ৷
পিছত সাংবাদিকৰ আগত বিজেপিৰ জিলা সভাপতি ধনছিং টেৰণ আৰু সাধাৰণ সম্পাদক অজিত দে’ই স্বাধীনতা সংগ্ৰামী নেতা লৌহ মানৱ চৰ্দাৰ বল্লভভাই পেটেলৰ আদৰ্শৰ এক আলোকপাত কৰে ৷ চৰ্দাৰ বল্লভভাই পেটলৰ স্বাধীনতা সংগ্ৰামত লোৱা বলিষ্ঠ ভূমিকা আৰু সৱল নেতৃত্ব নৱপ্ৰজন্মৰ আদৰ্শস্বৰূপ হয় বুলি নেতাদ্বয়ে মন্তব্য কৰে ৷
আজিৰ একতাৰ দৌৰত প্ৰাক্তন বিধায়ক বিদ্যাচিং ইংলেঙ, বিজেপিৰ কাৰবি আংলং জিলা সমিতিৰ সম্পাদক মধুৰাম লেকথে, কাৰ্যালয় সম্পাদক জয়চিং ৰংফাৰ, মনোজ টেৰণ, ৱাৰ্ড কমিচনাৰ ছিমন ফাংচ’ জিলা বিজেপিৰ প্ৰচাৰ বিভাগৰ আহ্বায়ক বিদ্যাচিং ৰংপি, লগতে বিজেপিৰ অন্যান্য গণ্যমান্য নেতা-কৰ্মীয়ে অংশগ্ৰহণ কৰিছিল ৷
