প্ৰমাণৰ অভাৱত বন্ধ হৈ থকা আত্মহত্যাৰ এক পুৰণি গোচৰ পুনৰ খোলা, আৰু এই ঘটনা সম্পৰ্কত ৰিপাব্লিক টিভি নেটৱৰ্কৰ মুখ্য সম্পাদক অৰ্ণৱ গোস্বামীক গ্ৰেপ্তাৰ কৰাটো অতি দুৰ্ভাগ্যজনক। অৰ্ণৱ গোস্বামীক যি ধৰণে গ্ৰেপ্তাৰ কৰা হৈছে, তাৰ পৰা এইটো স্পষ্ট যে ব্যক্তিগত আক্ৰোশ পূৰণৰ বাবে মহাৰাষ্ট্ৰ আৰক্ষীয়ে এই পদক্ষেপ গ্ৰহণ কৰিছে। অৰ্ণৱ গোস্বামীক অন্যায়ভাৱে গ্ৰেপ্তাৰ কৰা সন্দৰ্ভত গুৱাহাটী প্ৰেছ ক্লাবে এক প্ৰেছ বিবৃতিযোগে এই ঘটনাৰ তীব্ৰ গৰিহণা প্ৰদান কৰে৷
আজি গুৱাহাটী প্ৰেছ ক্লাবত অনুষ্ঠিত কাৰ্যনিৰ্বাহক বৈঠকে এই ঘটনাক তীব্ৰ গৰিহণা দিয়াৰ লগতে জ্যেষ্ঠ সাংবাদিকগৰাকীক অনতি বিলম্বে মুকলি কৰি দিবলৈ মহাৰাষ্ট্ৰ চৰকাৰ আৰু মুম্বাই আৰক্ষীক অনুৰোধ জনায়৷ লগতে তেখেতৰ ওপৰত যাতে কোনো ধৰণৰ শাৰীৰিক-মানসিক অত্যাচাৰ চলোৱা নহয় তাৰ বাবেও আহ্বান জনায়৷
গুৱাহাটী প্ৰেছ ক্লাবৰ সভাপতি মনোজ নাথ আৰু সাধাৰণ সম্পাদক সঞ্জয় ৰায় স্বাক্ষৰিত প্ৰেছ বিবৃতিটোত লগতে উল্লেখ কৰে, “আমাৰ দেশৰ ন্যায় প্ৰদান প্ৰণালীৰ ওপৰত আমাৰ সম্পূৰ্ণ বিশ্বাস আছে আৰু আশাকৰো যে ন্যায় কৰা হ’ব৷”
উল্লেখ্য, গুৱাহাটী প্ৰেছ ক্লাবে লগতে জম্মু-কাশ্মীৰৰ শেহতীয়া ঘটনাক লৈ উদ্বেগ প্ৰকাশ কৰে আৰু গৃহ মন্ত্ৰালয়ক এইটো নিশ্চিত কৰিবলৈ অনুৰোধ জনায় যে তদন্তৰ নামত যাতে ৰাষ্ট্ৰীয় তদন্তকাৰী সংস্থাৰ দ্বাৰা কোনো নিৰ্দোষী সাংবাদিকক উৎপীড়ন কৰা নহয়৷
