বিশ্ব জুনিয়ৰ ট্ৰেক চাইক্লিং চেম্পিয়নশ্বিপত স্বৰ্ণ জয় কৰিলে ভাৰতে৷ ফ্ৰাংকফুৰ্টত অনুষ্ঠিত এই প্ৰতিযোগিতাৰ দলীয় স্প্ৰিণ্ট বিভাগত অষ্ট্ৰেলিয়াক পৰাস্ত কৰি ভাৰতে এই সন্মান অৰ্জন কৰিবলৈ সক্ষম হয়৷
উল্লেখ্য যে চাইক্লিঙৰ যিকোনো প্ৰতিযোগিতাত ভাৰতৰ এয়াই প্ৰথম স্বৰ্ণ পদক৷ ভাৰতীয় দলটোত আছিল ইছাও আলবেন, ৰোনাল্ডো আৰু ৰজিত সিংহ৷ ভাৰতে ৪৪.৬৮১ চেকেণ্ডত সময় লৈ অষ্ট্ৰেলিয়াক পৰাস্ত কৰে৷ অৱশ্যে ভাৰতৰ আৰম্ভণি সুখজনক নাছিল৷ প্ৰথম ৰাউণ্ডৰ শেষত ভাৰত ০.২৪৪ চেকেণ্ডৰ পিছ পৰি আছিল৷ কিন্তু দ্বিতীয় ৰাউণ্ডত দুৰ্দান্ত প্ৰত্যাগমন ঘটে ভাৰতৰ৷
এই ৰাউণ্ডত ভাৰতৰ ব্যৱধান ০.০৩০ ছেকেণ্ডলৈ হ্ৰাস পায়৷ তৃতীয় ৰাউণ্ডত সকলো ব্যৱধান পাছ পেলাই অষ্ট্ৰেলিয়াক পৰাস্ত কৰি ভাৰতে স্বৰ্ণ পদক জয় কৰিবলৈ সক্ষম হয়৷ উল্লেখ্য যে স্বাধীনতা দিৱসত ভাৰতীয় জুনিয়ৰ চাইক্লিং দলৰ এই সাফল্যত উৎফুল্লিত ভাৰতীয় ক্ৰীড়া প্ৰাধিকৰণৰ৷
